Մայիսի 29-ին փաստաբան Ռոման Երիցյանը հայտարարել էր, որ արցախցիները իրավունք ունեն մասնակցելու հունիսի 7-ին կայանալիք ԱԺ ընտրություններին։ Հայտնի էր դարձել, որ Վարչական դատարանը պարտավորեցրել է ընտրողների ցուցակում ընդգրկել երեք արցախցու։ Ըստ որոշման՝ ՀՀ քաղաքացի հանդիսացող անձանց քաղաքացիությունը չի կարող դադարեցված համարվել կառավարության կողմից ժամանակավոր պաշտպանություն ստանալու փաստի ուժով։ ՆԳՆ-ն բողոքարկել է վճիռները՝ նշելով, որ դատարանը չի անդրադարձել քաղաքացիության ինստիտուտի բովանդակությանը եւ թույլ է տվել դատավարական նորմերի խախտումներ։ Մինչդեռ Երիցյանի պնդմամբ՝ այդ որոշումը բողոքարկման ենթակա չէ։
Հայ ազգային կոնգրեսի ընտրական շտաբը հայտարարություն է տարածել Վարչական դատարանի կայացրած որոշումների վերաբերյալ․
«Վարչական դատարանի կայացրած վերջին որոշումները, որով Արցախից բռնահանված և այսօր Հայաստանի Հանրապետությունում բնակվող մեր հայրենակիցներին հնարավորություն է տրվում մասնակցել առաջիկա խորհրդարանական ընտրություններին, կարևորագույն իրավական նշանակություն ունեն»։
Հայտարարության մեջ նշվում է, որ սա ոչ միայն արդարության վերականգնում է, այլև քայլ՝ հասարակության համախմբման և պետականության ամրապնդման ճանապարհին․
Մենք ողջունում ենք փաստաբան Ռոման Երիցյանի և Հայաքվե քաղաքացիական նախաձեռնության անդամ Սայիդա Պողոսյանի կատարած աշխատանքն այդ ուղղությամբ և կոչ ենք անում բոլոր արցախահայերին ակտիվորեն ներգրավվել նշված գործընթացում»։
«Հայ Ազգային Կոնգրեսի նախընտրական շտաբները ևս կանգնած են ձեր կողքին և մեր խողովակներով ու միջոցներով պատրաստ են ցուցաբերել անհրաժեշտ կազմակերպչական ու իրավական ամբողջական աջակցությունը, որպեսզի ոչ մի արցախցու ձայն չանտեսվի։
