Ուղիղ օդանավակայանում ոչ մեկի չեն կարող ծանուցում տալ։ Ծանուցման համար կա կարգ․ այն արվում է ըստ այդ կարգի։ Այնտեղ ծանուցում իրականացնել ֆիզիկապես հնարավոր չէ։
Այս մասին Factor.am-ի հարցին ի պատասխան ասել է ՀՀ պաշտպանության նախարար Սուրեն Պապիկյանը՝ անդրադառնալով լրատվամիջոցների տեղեկություններին, որ Ռազմական ոստիկանությունն ուժեղացված ծառայություն է իրականացնում սահմանային կետերում և վարժական հավաքներին մասնակցելու ծանուցագրեր են հաձնվում ՌԴ-ից Հայաստան եկող տղամարդկանց:
Հարցին, թե բացառո՞ւմ է, որ ՌԴ-ից եկած քաղաքացիներին կարող են ծանուցագրեր ուղարկվել, ասաց․ «Ինչպես կարող եմ բացառել. ՌԴ-ից եկավ ՀՀ քաղաքացին, ով զինապարտ ա, հայրենիքի հանդեպ պարտավորություններ չունի՞»:
Նա նշեց, որ նույնը վերաբերում է Ֆրանսիայից, ԱՄՆ-ից եկած ՀՀ քաղաքացիներին։
Նա անդրադարձել է նաև Ռազմական ոստիկանության ներկայության հարցին՝ նշելով․ «Ռազմական ոստիկանությունը ֆունկցիաներ ունի, որը իրականացնում է ըստ անհրաժեշտության»:
Հարցին թե այս փուլում ինչ գործառույթ են իրականցնում, Պապիկյանը նշել է, որ կարող է լինեն օպերատիվ ինֆորմացիայի հիման վրա, կարող է լինել այլ ֆունկցիոնալ պարտականությունների շրջանակում, այդ թվում հետախուզվող անձանց փնտրտուքի շրջանակում։
