Ուկրաինայի նախագահը բաց նամակով դիմել է Ռուսաստանի նախագահին՝ կոչ անելով ավարտել ռուս-ուկրաինական պատերազմը և անցնել ուղիղ բանակցությունների։ Նամակը հրապարակվել է նախագահի պաշտոնաաական կայքում։
Նամակում Ուկրաինայի նախագահը նշել է, որ Ռուսաստանի ղեկավարության ավելի քան 26 տարիների ընթացքում երկու երկրների հարաբերությունները քաղաքացիական ու տնտեսական համագործակցությունից վերածվել են պատերազմի, հարվածների և կորուստների շուրջ քննարկումների։
Նա պնդել է, որ պատերազմը Ռուսաստանի նախագահի անձնական որոշման հետևանք է և ընդգծել, որ ուկրաինական կողմը պատրաստ է շարունակել դիմադրությունը, եթե պատերազմը չդադարեցվի։
Բաց նամակում անդրադարձ է կատարվում նաև ռազմաճակատում ռուսական բանակի կրած կորուստներին, Ռուսաստանի տնտեսական և քաղաքական խնդիրներին, ինչպես նաև միջազգային պատժամիջոցների ազդեցությանը։
Նամակի բովանդակությունը՝ ստորև․
« Բաց նամակ
Ռուսաստանի Դաշնության նախագահին
Ուկրաինայի նախագահի կողմից
Երբ ավելի քան 26 տարի առաջ Դուք եկաք իշխանության Ռուսաստանում, Ուկրաինայում շատ մարդիկ դրական էին վերաբերվում Ձեզ։ Այդպես էր։ Բայց դա արդեն անցյալում է։
Այժմ ուկրաինացիների ճնշող մեծամասնությունը դրական է գնահատում այն փաստը, որ մեր հեռահար անօդաչու սարքերը այցելեցին Սանկտ Պետերբուրգում անցկացվող Ձեր ֆորումի բացմանը՝ հաղթահարելով ավելի քան 1000 կիլոմետր հեռավորություն։ Ինչպես Դուք շատ լավ գիտեք, այդ հեռավորությունը մեր հնարավորությունների սահմանը չէ։
Ձեր իշխանության 26 տարիները լիովին փոխեցին Ուկրաինա–Ռուսաստան հարաբերությունների օրակարգը։ Առևտրի և այլ քաղաքացիական հարցերի քննարկումներից մեր ժողովուրդները գրեթե ամբողջությամբ անցան հարվածների և կորուստների մասին խոսելուն։
Ձեր իշխանության գրեթե կեսը Դուք անցկացրել եք Ուկրաինայի դեմ պատերազմ վարելով։
Ինչ էլ որ ասեք ՆԱՏՕ-ի, աշխարհաքաղաքականության կամ ռուսաց լեզվի մասին, այս պատերազմը Ձեր անձնական ընտրությունն է՝ պատերազմ առանց իրական պատճառի։ Պատմությունը հենց այդպես էլ կհիշի այն։
Այդ տարիները կարող էին բոլորովին այլ լինել։
Մենք հաճախ լսում ենք, որ Դուք հարմարավետ եք զգում այս պատերազմի պայմաններում։ Իհարկե, բացառությամբ այն դեպքերի, երբ խոսքը վերաբերում է Ձեր Վալդայի նստավայրի անվտանգությանը կամ Մոսկվայում անցկացվող շքերթին։ Ձեր սեփական կյանքը թանկ է Ձեզ համար։
Բայց այժմ բոլորս տեսնում ենք, որ ռուսաստանցիները գնալով ավելի քիչ են հարմարվում այս իրականությանը՝ այն փաստին, որ պատերազմը ավելի ու ավելի բացասական հետևանքներ է բերում Ռուսաստանին։
Նրանց դուր չեն գալիս մեր անօդաչու սարքերն ու հրթիռները։
Նրանց դուր չեն գալիս բենզինի պակասը և անընդհատ աճող գները։
Նրանց դուր չեն գալիս մշտական սահմանափակումները։
Նրանց դուր չի գալիս պատերազմի ընդլայնման նպատակով երկրորդ զորահավաքի Ձեր մտադրությունը՝ այն Ուկրաինայի այլ ուղղություններով կամ Ռուսաստանի հարևան այլ երկրների դեմ օգտագործելու համար։
Նրանց դուր չի գալիս, որ Ձեր պատերազմը վերջ չունի։
Այո, Դուք դեռ կարող եք ստիպել ռուսաստանցիներին ապրել այս կերպ։ Սակայն Ձեր ռեսուրսները զգալիորեն նվազում են։
Դուք այլևս բավարար գումար կամ քաղաքական կապիտալ չեք ունենա՝ ռուսաստանցիների հավատարմությունը գնելու համար այնպես, ինչպես արել եք վերջին 26 տարիներին։
Իսկ մենք կանենք ամեն ինչ, որպեսզի աշխարհը օգնի այդ պահը մոտեցնել։
Ինչպես Դուք եք սիրում ասել՝ «պետք է թվերը հաշվել»։
Երեկ ես ստացա հաշվետվություն Ուկրաինայի ճակատում մայիս ամսվա ընթացքում Ձեր բանակի կորուստների մասին։ Եվս մեկ անգամ զոհվածների ու ծանր վիրավորների թիվը գերազանցել է 30 հազարը։ Մենք ամիս առ ամիս պահպանում ենք այդ մակարդակը, և յուրաքանչյուր կորուստի վերաբերյալ ունենք տեսանյութային հաստատում․ դրանք դատարկ հայտարարություններ չեն։
Մենք գիտենք, որ Ձեր մարտական կորուստների 63 տոկոսը սպանվածներ են, իսկ միայն 37 տոկոսը՝ վիրավորներ։ 21-րդ դարում ոչ մի բանակ չի կարող իրեն թույլ տալ նման հարաբերակցություն։ Իսկ սպանվածների բաժինը շարունակելու է աճել։
Այնպես չէ, որ մենք Ուկրաինայում անհանգստանում ենք ռուս զինվորների ճակատագրի համար այն ամենից հետո, ինչ Ձեր պատերազմը բերել է մեր երկրին։
Բայց ես հոգ եմ տանում ուկրաինացիների մասին։
Մենք կորցնում ենք մեր մարդկանց, և յուրաքանչյուր կորուստ ցավալի է մեզ համար։ Նույնիսկ եթե ուկրաինական և ռուսական կորուստների հարաբերակցությունը մեկի դիմաց հինգ կամ վեց է, դա մեզ համար մեծ նշանակություն ունի։
Նշանակություն ունի նաև այն, որ Դուք պարբերաբար հետաձգում եք մեր շրջանների, հատկապես Դոնեցկի մարզի գրավման Ձեր իսկ սահմանած ժամկետները։ Եվ այս տարի նույնպես Դուք չեք գրավի այն։
Բայց մենք Ուկրաինայում չենք ցանկանում հավերժական պատերազմ։
Մենք շատ լավ գիտենք, որ առանց պատերազմի կյանքը անհամեմատ ավելի լավ է։ Եվ մենք ցանկանում ենք հասնել դրան։
Համոզված եմ, որ ռուսաստանցիների մեծամասնությունը նույնպես դրական կարձագանքի դրան, և Դուք դա գիտեք։
Շատերը չէին հավատում, որ Ուկրաինան կկարողանա այսքան երկար դիմանալ։ Դուք էլ չէիք հավատում։ Եվ չէին հավատում նաև նրանք, ովքեր խորհուրդ էին տալիս Ձեզ։ Դա սխալ էր։
Դուք չէիք սպասում Ուկրաինայի լիարժեք դիմադրությանը և չէիք կանխատեսում, որ ամեն ինչ այսքան հեռու կգնա։ Սակայն ահա մենք այստեղ ենք՝ լայնածավալ պատերազմի հինգերորդ տարում։
Մի՛ վախեցեք ընտրել այս պատերազմից դուրս գալու ճանապարհը։ Հենց դա է այժմ Ձեզանից պահանջվում։
Ուկրաինան պահպանել է իր անկախությունը։ Եվ կպահպանի այն՝ հակառակ բոլոր կանխատեսումներին։
Շարունակությունը՝ սկզբնաղբյուր կայքում
