armenpress.am Հայաստանի Ազգային ժողովի փոխնախագահ Ռուբեն Ռուբինյանի կարծիքով՝ ընտրակաշառք բաժանելու հանգամանքով՝ ընտրական գործընթացում ի սկզբանե պետք է չեղյալ հայտարարվեին «Ուժեղ Հայաստանը»-ի, «Հայաստան» դաշինքի և «Բարգավաճ Հայաստան»-ի գրանցումները։
Ռուբեն Ռուբինյանը նման համոզմունք հայտնեց լրագրողների հետ ճեպազրույցում:
Անդրադառնալով հարցին, թե արդյոք «Քաղաքացիական պայմանագիր» կուսակցությունը մտադիր է հունիսի 7-ի խորհրդարանական ընտրությունների արդյունքները չեղյալ հայտարարելու հարցով դիմել Սահմանադրական դատարան, Ռուբինյանը պատասխանեց․
«Ոչ, որովհետև խորհրդարանական մեծամասնությունը լեգիտիմ է, մեր ստացած ձայները լեգիտիմ են և մենք ձևավորելու ենք Կառավարություն»,-ընդգծեց նա։
Կենտրոնական ընտրական հանձնաժողովը հունիսի 14-ին ամփոփել է Հայաստանում հունիսի 7-ին կայացած խորհրդարանական ընտրությունների վերջնական արդյունքները։ Ընտրությունների արդյունքներով խորհրդարան է անցել 3 քաղաքական ուժ՝ «Քաղաքացիական պայմանագիր» կուսակցությունը, որը կունենա 64 մանդատ, «Ուժեղ Հայաստան» դաշինքը, որը կունենա 29 մանդատ և «Հայաստան» դաշինքը, որը կունենա 12 մանդատ։
Հիշեցնենք, որ քարոզարշավի ամբողջ հնթացքում Հայաստանի հակակոռուպցիոն կոմիտեն պարբերաբար հայտնում էր «Ուժեղ Հայաստան» դաշինքի, «Հայաստան» դաշինքի և «Բարգավաճ Հայաստան» կուսակցության ներկայացուցիչների կողմից ընտրակաշառք բաժանելու դեպքեր բացահայտելու մասին՝ ներկայացնելով նաև դրա մասին վկայող ձայնագրություններ։
