78 բացակայություն 83 նիստից. համայնքային ավագանիների բացակայության պատկերը

Հայաստանում կա 69 մարզային համայնք։ Մեր ուսումնասիրության շրջանակից դուրս ենք թողել՝ 

• ազգային փոքրամասնությունների համայնքները, որտեղ ՏԻՄ ձևավորման և գործունեության սկզբունքներն ունեն որոշակի առանձնահատկություններ,

• Վանաձոր համայնքը, որտեղ մեր դիտարկած ժամանակահատվածում ավագանու նիստեր չեն գումարվել (կայացել են միայն արտահերթ նիստեր),

• մանդատը վայր դրած ավագանու անդամներին, որպեսզի նրանց վերաբերյալ նախկին տվյալները չազդեն գործող կազմի ընդհանուր պատկերի վրա:

  Արդյունքում վերջնական վերլուծության մեջ ներառվել են 59 համայնք և ավագանու 1260 գործող անդամ։ Տվյալները հավաքել և մշակել ենք 2026 թվականի մարտի 23-30-ն ընկած ժամանակահատվածում։

  Յուրաքանչյուր համայնքապետարանի պաշտոնական կայքից դուրս ենք բերել ավագանու անդամի անունը, խմբակցությունը, քվեարկությունների պատկերը (կողմ, դեմ, ձեռնպահ), բացակայությունները և առկայության դեպքում լիազորությունների դադարեցման ժամկետները։ Եթե որևէ համայնքի կայքում տվյալները եղել են թերի կամ բացակայել են, հիմք ենք ընդունել Կենտրոնական ընտրական հանձնաժողովի հրապարակած տվյալները։ 

  Հաշվի առնելով այն հանգամանքը, որ միևնույն համայնքում ավագանու անդամների պաշտոնավարման ժամկետները կարող են էապես տարբերվել, քանի որ նրանք կարող են մանդատը ստանալ ավելի ուշ կամ վայր դնել գումարման ավարտից առաջ, ցուցանիշների առավելագույն ճշգրտությունն ապահովելու համար մենք կիրառել ենք հարաբերական հաշվարկի բանաձևը։ Անհատապես հաշվել ենք, թե ավագանու յուրաքանչյուր անդամ, իր պաշտոնավարման կոնկրետ ժամանակահատվածից ելնելով, քանի նիստի էր պարտավոր մասնակցել։ Այդ նիստերի թվի և դրանցից փաստացի բացակայությունների հարաբերակցությամբ էլ հստակ առանձնացրել ենք այն անձանց, որոնք բացակայել են իրենց նիստերի ավելի քան 50 տոկոսից և, ըստ օրենքի, հայտնվել են մանդատը կորցնելու ռիսկային գոտում: 

  Մեր ուսումնասիրությամբ պարզել ենք, որ բացակայության ամենամեծ՝ 100 տոկոս գործակիցն ունեն Անի համայնքի 7, Վայք համայնքի 3, Սիսիան համայնքի 3, Սևան, Վարդենիս, Արենի և Տաշիր համայնքների 1-ական ավագանու անդամներ։