Ստամբուլի Սկյուտար շրջանի Բաղլարբաշը թաղամասի Սուրբ Կարապետ եկեղեցու թաղային խորհուրդը տեղեկացրել է, որ հուլիսի 7-ի լույս 8-ի գիշերը մի անձ մուտք գործելով գերեզմանատուն՝ վնասել է վեց դամբարան և աղբյուր։ Այս մասին հայտնում են Պոլսո Հայոց պատրիարքությունից:
«Թաղային խորհուրդն անմիջապես դիմել է անվտանգության պատկան իշխանությանը, որոնք ձեռնարկել են օրինական, բծախնդիր գործողություններ արարքի հեղինակի ինքնությունը ճշտելու և պատասխանատվության ենթարկելու համար»,- նշված է հաղորդագրությունում։
Պատրիարքությունը դատապարտում է հայ համայնքի սրբազան արժեքների դեմ հարձակումը և շնորհակալություն է հայտնում անվտանգության պաշտոնատարներին՝ դեպքը բացահայտելու նպատակով իրենց գործունեություն իրականացնելու համար՝ նշելով, որ շարունակում է հետևել դեպքի վերաբերյալ բոլոր զարգացումներին։
