Տավուշի մարզի Բերդ համայնքում հեղուկ գազի, բենզինի և դիզելային վառելիքի մանրածախ առևտրով զբաղվող ընկերությունը շուրջ 415 մլն դրամ հարկ չի վճարել։ Այս մասին հայտնում է ՀՀ պետական եկամուտների կոմիտեն։
Ձեռք են բերվել և հետազոտվել են ընկերության գործունեության վերաբերյալ տվյալները, այդ թվում` ներքին հաշվառման և սևագիր փաստաթղթերը: Տվյալները համադրվել են ՀՀ ՊԵԿ տեղեկատվական բազայում առկա՝ նույն ժամանակաշրջաններին վերաբերող, ընկերության կողմից ներկայացված հարկային հաշվարկների տվյալների հետ:
Պարզվել է, որ 2021-2026թթ-ի ընթացքում ձևավորված հասույթից թերհայտարարագրվել է շուրջ 1,3 մլրդ դրամ, ինչի արդյունքում էլ առանձնապես խոշոր չափերի հարկեր չեն հաշվարկվել։
Փաստի առթիվ հաղորդում է ներկայացվել ՀՀ քննչական կոմիտե, որտեղ նախաձեռնվել է քրեական վարույթ։
Կոմիտեն հորդորում է տնտեսվարողներին գործել թափանցիկ, իսկ գնորդներին՝ մշտապես պահանջել ՀԴՄ կտրոններ։
