azatutyun.am «Ռուսաստանը Հարավկովկասյան երկաթուղու կոնցեսիոն կառավարումը դադարեցնելու հարցով որևէ դիմում Հայաստանից չի ստացել, սակայն մենք անդադար հրապարակային հայտարարություններ ենք լսում այդ մասին», – «Ինտերֆաքս»-ի հարցին ի պատասխան՝ այսօր հայտարարել է Ռուսաստանի փոխվարչապետ Ալեքսեյ Օվերչուկը։
Ռուսաստանցի պաշտոնյայի խոսքով՝ «Մոսկվան պատրաստ է շարունակել աշխատանքը՝ իրականացնելով կոնցեսիոն կառավարումը»։
Դրա հետ մեկտեղ, Օվերչուկը նշել է, թե ինքը ցանկանում է, որ խնդիրը լուծվի «հանդարտ մթնոլորտում՝ խորհրդակցությունների ռեժիմով»։
Հայաստանի վարչապետ Նիկոլ Փաշինյանը վերջերս հայտարարեց, որ հայկական երկաթուղու կառավարումը ռուսական կողմից հետ վերցնելուն այլընտրանք չկա:
«Ռուսական երկաթուղիներ»-ն էլ հակադարձեց՝ եթե հայկական կողմը մտադիր է փոխել կամ դադարեցնել կառավարման պայմանները, պետք է վերադարձնի ներդրումները։
