azatutyun.am Ռուսական ուժերը գիշերը հարվածներ են հասցրել Ուկրաինայի մի շարք քաղաքների՝ կիրառելով անօդաչուներ և կառավարվող ավիառումբեր։
Դոնեցկի մարզի Կրամատորսկ քաղաքում հարվածի թիրախներից մեկը եղել է բեռնափոխադրող «Նովա Պոշտա» ընկերության շենքը։ Ընկերության տվյալներով՝ անօդաչուի հարվածից շենքն ավերվել է, զոհվել է 19-ամյա աշխատակից, ևս չորսը վիրավորվել են։
Անօդաչուներով զանգվածային հարձակման է ենթարկվել նաև Սումի քաղաքը։ Տեղական իշխանությունների հաղորդմամբ՝ վնասվել են բնակելի տներ և քաղաքացիական ենթակառուցվածքներ, հրդեհներ են բռնկվել։
Խարկովի մարզի Իզյում քաղաքում կառավարվող ավիառումբերի հարվածներից առնվազն չորս մարդ է վիրավորվել։ Վնասվել են առանձնատներ, Իզյումն ու հարակից բնակավայրերը մնացել են առանց էլեկտրաէներգիայի։
