armenpress.am Սաուդյան Արաբիայի օդուժը 32 ավիահարված է հասցրել Եմենի արևմուտքի չորս նահանգների: Այս մասին հաղորդում է ՏԱՍՍ գործակալությունը՝ վկայակոչելով հութիների «Անսար Ալլահ» խռովարար շարժման մամուլի ծառայության հաղորդագրությունը:
Շարժման տվյալներով՝ հարվածները հասցվել են Էլ Ջաուֆի, Մարիբի, Էլ Հոդեյդայի և Թաիզի նահանգներին: Ավերածությունների և զոհերի մասին չի հաղորդվում:
Սեպտեմբերի 8-ի առավոտյան SPA գործակալությունը հաղորդել է, որ Սաուդյան Արաբիայի քաղաքների վրա հութիների հարձակումների հետևանքով 73 մարդ է վիրավորվել, այդ թվում՝ կանայք և երեխաներ: Գործակալության տվյալներով՝ թիրախավորվել են քաղաքացիական և տնտեսական օբյեկտներ մի շարք քաղաքներում:
Եմենում պատերազմը սկսվել է 2014 թվականին, երբ հութիները գրավեցին Սանան, ինչը հաջորդ տարի հանգեցրեց Սաուդյան Արաբիայի կողմից ռազմական միջամտության։
Մարտերը վերսկսվեցին 2026 թ․ հուլիսին, երբ կառավարական ուժերը հարվածեցին հութիների կողմից վերահսկվող Սանայի օդանավակայանին՝ խոչընդոտելով Իրանից եկող ինքնաթիռի վայրէջքը։ Իսկ անցյալ շաբաթ հութիները խոշոր հարձակում սկսեցին՝ փորձելով առաջ շարժվել արևմտյան Թաիզով և հարավային Հոդեյդայով դեպի ալ-Մոխա նավահանգստային քաղաք և Կարմիր ծովում գտնվող Բաբ էլ-Մանդեբի նեղուց։ Հութիները նաև հայտարարել են Բաբ էլ-Մանդեբով անցնող սաուդյան նավերի ծովային շրջափակման մասին:
