ՊԵԿ նախագահ Էդուարդ Հակոբյանը հյուրընկալել է Հայաստանում ԵՄ պատվիրակության, ՎԶԵԲ-ի և ՄԱԿ-ի Զարգացման ծրագրի ներկայացուցիչներին: Այս մասին հայտնում են ՊԵԿ-ից։
«Հանդիպման ընթացքում քննարկվել են համատեղ ծրագրերի իրականացման ընթացքը, մասնավորապես, Մեղրիի սահմանային անցակետի արդիականացման և Սյունիքի մաքսային ու լոգիստիկ կենտրոնի նախագծի շրջանակում իրականացվող աշխատանքները։
Գոհունակությամբ արձանագրվել է, որ Մեղրիի սահմանային անցակետի արդիականացման ծրագիրը զգալի առաջընթաց է գրանցել։ Միաժամանակ, անդրադարձ է եղել ծրագրի իրականացման ժամկետների հնարավոր երկարաձգմանն առնչվող հարցերին։
Քննարկվել են նաև համատեղ ծրագրերի իրականացման համար ՀՀ կարողությունների զարգացմանն առնչվող հարցերը և նախանշել հետագա համագործակցության ուղղությունները։ Մասնավորապես, անդրադարձ է կատարվել նոր սահմանային անցակետերի ենթակառուցվածքների ներդրման և զարգացման հնարավորություններին, որոնց իրականացումը կնպաստի տարածաշրջանային առևտրային կապերի ընդլայնմանը»,- նշված է հաղորդագրությունում։
