1lurer.am Ստամբուլում Մոսկվայի և Կիևի միջև բանակցությունների երրորդ փուլն անցել է Թուրքիայի արտգործնախարար Հաքան Ֆիդանի նախագահությամբ:
Նա հայտարարել է, որ Թուրքիան ունի անհրաժեշտ ենթակառուցվածք՝ Ուկրաինայում հրադադարի հնարավոր ռեժիմի պահպանման մոնիթորինգի համար: Անկարան պատրաստ է իր ներդրումն ունենալ նաև գերիների փոխանակման հարցում՝ առաջարկելով ավելի կառուցվածքային մեթոդաբանություն:
Թուրքիայի արտգործնախարարի խոսքով՝ Ստամբուլում ընթացող բանակցություններն ավելի կառուցողական և արդյունավետ են դառնում: Ֆիդանը հայտնել է, որ մասնակիցները պայմանավորվել են մշակել քաղաքական, հումանիտար և ռազմական հարցերով աշխատանքային խմբեր ստեղծելու գաղափարը: Նախարարն ընդգծել է, որ Թուրքիան կշարունակի աշխատել Ռուսաստանի և Ուկրաինայի միջև կայուն խաղաղություն հաստատելու ուղղությամբ:
