azatutyun.am: Սահմանադրական դատարանի (ՍԴ) նախագահ Հրայր Թովմասյանը այսօր հրաժարվեց մեկնաբանել «Ազատությանը» տված բացառիկ հարցազրույցում վարչապետ Նիկոլ Փաշինյանի արած հայտարարությունները:
«Ես քաղաքական հայտարարությունները չեմ մեկնաբանում, ես մեկնաբանում եմ իրավական ակտերը», – հայտարարեց Թովմասյանը՝ ընդգծելով․ – «Սահմանադրական դատարանը մեկնաբանում է իրավական ակտերը»:
Հարցին՝ իսկ հրաժարականի մասին քննարկումներ կա՞ն, Սահմանադրական դատարանի նախագահը հակադարձեց․ – «Իսկ էնտեղ էդպիսի բան ա՞ եղել»:
Հարցին էլ՝ իսկ ի՞նքն ինչպես է լուծումը պատկերացնում ստեղծված իրավիճակում, ՍԴ նախագահը պատասխանեց․ – «Ես կրկնում եմ՝ քաղաքական հարցերին ես լուծում չեմ տալիս: Մնացածը մեր հայտարարության մեջ կա»:
«Երբ որ ես գտնեմ, որ կա անհրաժեշտություն, ես հարցազրույց կտամ», – նշեց Թովմասյանը:
Բացառո՞ւմ է արդյոք, որ ինքը, Սահմանադրական դատարանի անդամները հրաժարական կտան՝ այս առնչությամբ Հրայր Թովմասյանն ասաց․ – «Իսկ Դուք բացառում ե՞ք, որ վաղը երկրաշարժ կլինի Հայաստանում, Դուք բացառում ե՞ք, որ վաղը աշխարհը շուռ կգա: Այդ Ձեր հարցը էդ դասից ա: Շնորհակալություն»:
Հայաստանի վարչապետը երեկ «Ազատությանը» տված հարցազրույցում ծավալուն անդրադարձ կատարեց Սահմանադրական դատարանի շուրջ ստեղծված իրավիճակին՝ հայտարարելով, մասնավորապես, որ «Հրայր Թովմասյանը սեփականաշնորհել է Սահմանադրական դատարանը», և ՍԴ-ն «այս սեփականաշնորհված բուդկայի կարգավիճակից պետք ա դուրս գա»:
