shantnews.am: ՌԴ նախագահի մամուլի քարտուղար Դմիտրի Պեսկովը հայտարարել է, որ Ռուսաստանը պարտավորություններ ունի Բելառուսին ռազմական օգնություն ցուցաբերել միջազգային համաձայնագրերի շրջանակներում, սակայն այժմ նման օգնության անհրաժեշտություն չկա: Այս մասին հայտնում է Meduza պարբերականը:
Պեսկովը նաև ասել է, որ Ռուսաստանն ընդունում է Բելառուսում անցկացված ընտրությունների արդյունքները և այդ երկրում տիրող իրավիճակը համարում է Բելառուսի ներքին գործը:
ՌԴ նախագահի մամուլի քարտուղարը նաև նշել է, որ Բելառուսում տիրող իրավիճակին արտաքին միջամտության փորձեր են կատարվում: Թե ով է նման փորձեր կատարում, Պեսկովը չի հստակեցրել:
Հիշեցնենք, որ ՌԴ նախագահ Վլադիմիր Պուտինի և Բելառուսի նախագահ Ալեքսանդր Լուկաշենկոյի միջև օգոստոսի 14-ին և 15-ին հեռախոսազրույցներ են տեղի ունեցել, որոնցից հետո Կրեմլը հայտնել է, որ Ռուսաստանը պատրաստ է աջակցություն ցուցաբերել Բելառուսին՝ երկու երկրների միջև գործող համաձայնագրերի հիման վրա:
