azatutyun.am: Կորոնավիրուսի դեպքերի թիվն աշխարհում անցել է 23,9 միլիոնը, մահացել է մոտ 820 հազար, բուժվել՝ 15,6 միլիոն մարդ, վկայում են ԱՄՆ Ջոնս Հոփքինսի համալսարանի հրապարակած տվյալները:
Օքսֆորդի համալսարանի պատվաստանյութի մշակումը մտել է կլինիկական փորձարկումների փուլ: Դրան կմասնակցի մոտ 50 հազար մարդ աշխարհի տարբեր երկրներից:
Հարավային Կորեայում նոր դեպքերի թվի աճի պատճառով իշխանությունները որոշում են կայացրել փակել Սեուլի և մայրաքաղաքի մերձակայքում գտնվող դպրոցներն ու մանկապարտեզները: Երեխաները սովորելու են հեռակա կարգով մինչև սեպտեմբերի 11-ը:
Ինդոնեզիայի Բալի կղզին օտարերկրյա զբոսաշրջիկների չի ընդունի մինչև տարեվերջ, հայտնել են իշխանությունները: Ավելի վաղ հաղորդվել էր, որ կղզին սեպտեմբերից կսկսի այլ երկրներից այցելուների ընդունել: Բայց իշխանությունները որոշել են հրաժարվել այս ծրագրից՝ երկրում վարակի նոր դեպքերի թվի աճի պատճառով:
