azatutyun.am: Տարածաշրջանային այցի շրջանակում Վրաստան է ժամանել Իրանի արտգործնախարար Մոհամադ Ջավադ Զարիֆը։
Թբիլիսիում այսօր Զարիֆը հանդիպումներ կունենա Վրաստանի վարչապետի, նախագահի, արտգործնախարարության բարձրաստիճան ներկայացուցիչների հետ։
Իրանի դիվանագիտական գերատեսչության ղեկավարը Վրաստան է այցելում Ադրբեջանից, Ռուսաստանից, Հայաստանից հետո և նախատեսում է լինել նաև Թուրքիայում։
Զարիֆն ավելի վաղ կողմ է արտահայտվել տարածաշրջանային վեցակողմ՝ Ռուսաստան, Իրան, Թուրքիա, Ադրբեջան, Վրաստան, Հայաստան, համագործակցության նախաձեռնությանը։
Վրաստանի արտգործնախարարությունը հայտարարել էր, որ Ռուսաստանի հետ համատեղ ձևաչափի մասին խոսք անգամ լինել չի կարող, քանի դեռ Մոսկվան օկուպացրած է պահում երկրի տարածքների 20 տոկոսը։
