tert.am: Սիրիայի Արաբական Հանրապետությունում այսօր կանցկացվեն նախագահական ընտրություններ: Այս մասին գրում է EurAsia Daily-ն՝ նշելով, որ ֆավորիտն է պետության ներկայիս ղեկավար Բաշար ալ-Ասադը:
Դամասկոսում կայացած մամուլի ասուլիսում երկրի ներքին գործերի նախարար Մուհամմեդ Ռահմոնը հայտնել է, որ ընտրություններին կմասնակցի ավելի քան 18 միլիոն քաղաքացի: Նրա խոսքով՝ քվեարկություն տեղի կունենա 12 102 ընտրատեղամասում, որոնք կբացվեն ժամը 07:00-ին և կաշխատեն մինչև 19:00-ն:
Ռահմոնը նշել է նաև, որ իշխանությունները նախապես ձեռնարկել են անհրաժեշտ սանիտարական և կանխարգելիչ միջոցառումներ՝ հաշվի առնելով կորոնավիրուսային վարակի սպառնալիքը:
«Ամեն ինչ արվել է քաղաքացիների հարմարավետության համար: Նրանց մնում է պահպանել սոցիալական հեռավորությունը և օգտագործել պաշտպանիչ դիմակներ», – շեշտել է նա:
Պետության ղեկավարի պաշտոնի համար պայքարում է 3 թեկնածու՝ Ասադը,
նախկին պատգամավոր Աբդալլահ Սալում Աբդալլահը և հայրենասիրական ընդդիմության ներկայացուցիչ Մահմուդ Ահմեդ Մուրային:
Սիրիայում նախագահը պաշտոնավարում է 7 տարի ժամկետով:
