azatutyun.am: Միացյալ Նահանգների Հիվանդությունների վերահսկման և կանխարգելման կենտրոնի (CDC) խորհրդատուները միաձայն հաստատել են Pfizer/BioNTech պատվաստանյութի օգտագործումը 5-11 տարեկան երեխաների համար, ինչից հետո պատվաստումները թույլատրելու հրամանը ստորագրել է կենտրոնի տնօրեն Ռեյչըլ Վալենսկին։ Առաջին պատվաստումները կարող են կատարվել արդեն այսօր։
Փորձագետները եզրակացրել են, որ պատվաստանյութի օգտագործման դրական ազդեցությունը զգալիորեն գերազանցում է հնարավոր ռիսկերը։ Քննարկվել են սրտամկանի բորբոքման հազվագյուտ դեպքերը, որոնք նկատվել են այս պատվաստանյութի օգտագործումից հետո՝ հիմնականում երիտասարդների մոտ։
Սննդի և դեղերի վարչությունը (FDA) ուրբաթ օրը հաստատել էր տվյալ տարիքային խմբի համար արտակարգ իրավիճակներում պատվաստանյութի օգտագործումը:
ԱՄՆ դաշնային կառավարությունն ու Pfizer-ն արդեն սկսել են պատվաստանյութի բաշխումը` նախապատրաստելով երեխաների պատվաստումը: Երեխաներից շատերը վերադարձել են դպրոց՝ առկա ուսուցման:
Սպիտակ տունն ավելի վաղ հայտարարել էր, որ երկիրն ունի պատվաստանյութերի բավարար պաշարներ 28 միլիոն երեխայի պատվաստելու համար։
