lragir.am: Դպրոցների ուսուցիչների աշխատավարձերի բարձրացման համար մշակվել է բանաձև, որով կսահմանվի ուսուցիչների աշխատավարձի նվազագույն շեմ: Այս մասին այսօր ԱԺ-կառավարություն հարց ու պատասխանի ժամանակ ասաց Կրթության և գիտության նախարար Արայիկ Հարությունյանը:
«Նախկինում, երբ մարզպետները վերաբաշխումներ էին անում, այդ վերաբաշխումները չեն արվի, և այդ բանաձևի միջոցով արդեն դպրոցները ֆինանսավորում կստանան դասարանների քանակով, այլ պարամետրեր հաշվի կառնվեն: Եվ փոքր համակազմ ունեցող դպրոցներն ավելի լուրջ հնարավորություններ կստանան: Այսինքն՝ մենք սահմանելու ենք աշխատավարձերի ստորին շեմ, որտեղից արդեն ցանկացած հաջորդ բարձրացում այդ շեմն է բարձրացնելու”,- ասաց Արայիկ Հարությունյանը:
Լուսավոր Հայաստան խմբակցության պատգամավոր Մանե Թանդիլյանը նկատեց, որ դպրոցների ֆինանսավորման հարցը լուրջ խնդիր է: Նա նշեց, որ որոշ դպրոցներից աշակերտներ են հեռանում, քիչ աշակերտ ունեցող դպրոցն այսօր ավելի քիչ ֆինասնավորում է ստանում:
«Սեպտեմբերը գալու է, և մանկավարժները ձեր հայտարարություններին համապատասխան սպասելու են բարձրացման: Ես կխնդրեմ հստակեցնել՝ ի՞նչ մեխանիզմով է բարձրանալու»,- հարցրեց պատգամավորը:
Ի պատասխան ԿԳ նախարարը կրկնեց՝ բանաձևը սահմանելու է ստորին շեմ, արդեն հաջորդ բարձրացումներն ըստ դրա են լինելու:
