Armtimes.com: Երեւան քաղաքի ընդհանուր իրավասության դատարանի Շենգավիթի նստավայրը, դատավոր Ռոբերտ Պապոյանի նախագահությամբ, քիչ առաջ մասնակի բավարարեց նախկին փոխվարչապետ, մարտի 1-ի գործով մեղադրյալ Արմեն Գեւորգյանի գույքի վրա կալանք դնելու որոշման դեմ նրա պաշտպանների բողոքը:
Ըստ դատարանի որոշման՝ Գեւորգյանի գույքի վրա կալանք դնելը խախտել է նրա իրավունքը, սակայն վարույթն իրականացնող մարմնին չպարտավորեցրեց վերացնել խախտումը:
Բանն այն է, որ Գեւորգյանի գույքի վրա կալանք է դրվել Հատուկ քննչական ծառայության քննիչի որոշմամբ, բայց նրա վերաբերյալ գործն այլեւս ՀՔԾ-ի վարույթում չէ, ուղարկվել է առաջին ատյանի դատարան:
Պաշտպանական կողմը պահանջում էր դատարանից՝ վարույթն իրականացնող մարմնին պարտավորեցնել վերացնել նրա իրավունքների եւ ազատությունների խախտումը:
Ըստ պաշտպանական կողմի՝ կայացված որոշման արդյունքում Արմեն Գեւորգյանը զրկված է նաեւ աշխատանքի դիմաց վարձատրություն ստանալու, իր ու ընտանիքի կարիքները հոգալու հնարավորությունից:
