Ադրբեջանը պետք է դադարեցնի Լաչինի միջանցքի շրջափակումը։ Այս մասին թվիթերյան միկրոբլոգում գրել է «Ամնեսթի Ինթերնեշնլ» միջազգային իրավապաշտպան կազմակերպությունը։
«Ադրբեջանը պետք է դադարեցնի Լաչինի միջանցքի շրջափակումը, որի հետևանքով Լեռնային Ղարաբաղի բնակիչները մնացել են առանց առաջին անհրաժեշտության ապրանքների և ծառայությունների հասանելիության։
Պետք է ապահովել տուժած բնակչության տեղաշարժի ազատությունը և տնտեսական ու սոցիալական իրավունքների պաշտպանությունը»,- նշված է գրառման մեջ։
2022թ․ դեկտեմբերի 12-ից Ադրբեջանը փակել է Արցախը ՀՀ-ին կապող Լաչինի միջանցքը, ինչի հետևանքով շրջափակման մեջ է հայտնվել Արցախի 120 000 բնակիչ, այդ թվում՝ 30 000 երեխա։ 1100 քաղաքացիական անձ, այդ թվում՝ 270 անչափահաս, չի կարողանում ՀՀ-ից վերադառնալ Արցախ։
Շրջափակման պատճառով ՀՀ-ից ամեն օր 400 տոննա սննդամթերք ու դեղորայք հնարավոր չի լինում հասցնել Արցախ, ինչի հետևանքով առկա է սննդի, դեղորայքի պակաս:
350 հիվանդ չի կարողանում բուժում ստանալ ՀՀ-ում: 13 երեխա նորածնային և վերակենդանացման բաժանմունքներում է, 13 բուժառու՝ վերակենդանացման բաժանմունքում․ 6-ը ծայրահեղ ծանր վիճակում են։ Այս օրերի ընթացքում շտապ բուժօգնության կարիք ունեցող 17 հայ և 4 օտարերկրացի է միայն Կարմիր խաչի միջնորդությամբ տեղափոխվել ՀՀ, իսկ Արցախում բուժօգնության կարիք ունեցող և ծանր վիճակում գտնվող հիվանդներից մեկը մահացել է:
Հունվարի 10-ի վթարի պատճառով Արցախի էլեկտրամատակարարումն իրականացվում է տեղական սահմանափակ ռեսուրսի միջոցով:
Արցախը շրջափակման մեջ է։
