news.am: ՄԱԿ-ի Գլխավոր ասամբլեան հինգշաբթի՝ փետրվարի 23-ին, Ուկրաինայի հարցով հատուկ նստաշրջանի ընթացքում հակառուսական բանաձեւ է ընդունել՝ նվիրված հատուկ ռազմական գործողության տարելիցին, հայտնում է ՏԱՍՍ-ի թղթակիցը։ Փաստաթղթին կողմ է քվեարկել 141, դեմ՝ 7 երկիր (Ռուսաստան, Բելառուս, Հյուսիսային Կորեա, Մալի, Նիկարագուա, Սիրիա և Էրիթրեա)։ Ձեռնպահ է մնացել 32 պատվիրակություն, այդ թվում՝ Հայաստանը։ Ձեռնպահների թվում են Չինաստանը, Հնդկաստանը, ԱՊՀ անդամ Կենտրոնական Ասիայի երկրները։
Միաժամանակ, քվեարկության ընթացքում չեն հաստատվել Բելառուսի առաջարկած փոփոխությունները, որոնք նախատեսում էին փաստաթղթից հանել այն դրույթները, ըստ որոնց հակամարտությունը սկսելու պատասխանատվությունը կրում է Ռուսաստանը։ Փոփոխություններով առաջարկվում էր նաև հանել այն կետը, որով կոչ է արվում Ռուսաստանի Դաշնությանը անհապաղ դուրս բերել զորքերը Ուկրաինայից և դատապարտել Մինսկի ձևաչափի երկրների այն առաջնորդներին, որոնք իրականում չեն ձգտել կարգավորման Ուկրաինայում։
Բացի այդ, բելառուսական կողմը կողմ է եղել, որ բանաձեւում ներառվի բանակցությունների միջոցով խաղաղ կարգավորման կոչը։ Բանաձևի սկզբնական տեքստը պարունակում է միայն կոչ երկրներին և միջազգային կազմակերպություններին «կրկնապատկել դիվանագիտական ջանքերը Ուկրաինայում արդար, համապարփակ և կայուն խաղաղության հասնելու համար՝ ՄԱԿ-ի կանոնադրության համաձայն»: Մինսկն առաջարկել է նաեւ բանաձեւում ներառել Կիեւին զենք մատակարարելու արգելքը։
Ուկրաինան, արևմտյան երկրների աջակցությամբ, ՄԱԿ-ի Գլխավոր ասամբլեային առաջարկեց բանաձեւի նախագիծ, որն իբր ուղղված է խաղաղության հասնելուն։ Այն չի պահանջում խաղաղ բանակցություններ կամ զինադադար: Հակամարտությունը սկսելու պատասխանատվությունը կրում է բացառապես Ռուսաստանը։ Տեքստը կողմերին կոչ է անում կատարել իրենց պարտավորությունները քաղաքացիական անձանց և ռազմագերիների նկատմամբ, ինչպես նաև ընդգծվում է «պատշաճ, արդար և անկախ հետաքննության, ինչպես նաեւ ազգային կամ միջազգային մակարդակով դատաքննություն իրականացնելու միջոցով Ուկրաինայի տարածքում կատարված ամենալուրջ հանցագործությունների համար պատասխանատվության ենթարկելու անհրաժեշտությունը՝ միջազգային իրավունքի համաձայն»:
Ինչպես հայտարարել է ՄԱԿ-ում Ռուսաստանի մշտական ներկայացուցիչ Վասիլի Նեբենզյան, բանաձեւը չի նպաստի «Ռուսաստանի և Արևմուտքի միջև մեկ տարի առաջ սրված հակասությունների խաղաղ լուծմանը» անցմանը։ Ըստ նրա՝ փաստաթուղթը միակողմանի է և իրականությունից բաժանված։
