Ես Արցախ տեղափոխվելու որոշումս կայացրել էի՝ չմտածելով պաշտոնի մասին։ Այս մասին Արցախի հանրային հեռուստաընկերությանը տված հարցազրույցում ասել է Արցախի նախկին պետնախարար Ռուբեն Վարդանյանը:
«Պաշտոն զբաղեցնելը չի եղել իմ՝ Արցախ տեղափոխվելու նպատակը: Իմ նպատակը եղել է օգնել Արցախին պահպանել իր անկախությունը։ Հետևաբար, կլինեմ պետնախարար, թե չեմ լինի, իմ նպատակը դրանից չի փոխվում»,- ասել է Վարդանյանը:
«Ես երբեք չեմ մտածել, որ իմ անունը կքննարկվի ՄԱԿ-ի ԱԽ-ում կամ Եվրախորհրդարանում: Բայց Ադրբեջանը փորձեց հնարավորինս անձնավորել Արցախում ստեղծված իրավիճակը: Հավանաբար այստեղ մի քանի իրադարձություններ տեղի ունեցան: Առաջինն այն էր, որ նման մարդու ժամանումն Արցախ բավական անսպասելի էր, և դա դավադրությունների տեսությունների շրջանառման տեղիք տվեց: Ոչ ոք չէր պատկերացնում, որ մարդ կարող է հայրենասեր լինել և գալ իր երկիր, սիրել ու մտահոգվել այն ամենով, ինչ կատարվում է Արցախում: Եվ հետաքրքիր է տեսնել, թե ինչպես են մարդիկ դեռ ապրում այս դավադիր տեսությունների տիրույթում»,- հարցազրույցում ասել է Վարդանյանը։
Անդրադառնալով Ադրբեջանի գործոնին՝ Վարդանյանը հիշեցրեց, որ դեռ անցած ամառ Ադրբեջանն ասում էր, որ բանակցություններ չի վարելու հայերի հետ:
«Հիմա անցել է 6 ամիս, ասում են՝ պատրաստ են բանակցել ոչ թե Վարդանյանի, այլ Արցախի հայ բնակչության ներկայացուցչի հետ: Ես կարծում եմ, որ իմ այցը բերեց Արցախի հանրայնացման կտրուկ աճին: Շրջափակումը, ամեն ինչ միասին բերեցին դրան»,- ասաց նա:
Անդրադառնալով իր՝ պաշտոնից ազատելու, Վարդանյանը նշեց՝ կարծում է, որ սա սխալ որոշում է: «Եթե ես օգնեցի իմ գործողություններով, շատ լավ է: Եթե ես խանգարում եմ, պետք է գնամ: Սա է նախագահի որոշումը »։
