armtimes.com: Առողջապահության նախարար Արսեն Թորոսյանը, ինչպես հայտնի է, հայտարարել է, որ կորոնավիրուսով հիվանդների հետ շփված անձինք ու նաեւ այն վարակակիրները, որոնց մոտ հիվանդությունը ծանր ընթացք չունի, արդեն այսօրվանից կմնան կբուժվեն իրենց տներում առողջության առաջնային օղակի բժիշկների հսկողության ներքո:

Մինչ այս կառավարությունը տասնյակ հյուրանոցներից եւ հյուրատներից ծառայություններ է գնել՝ հիվանդների հետ շփում ունեցած անձանց, ինչպես նաեւ արտերկրից ժամանած ՀՀ քաղաքացիներին պահելու եւ նրանց առողջությանը հետեւելու համար:

Այս ամենի համար կատարված հատկացումների մասին հարցմանն ի պատասախան՝ Էկոնոմիկայի նախարարության գլխավոր քարտուղար Արմեն Խաչատրյանը նշել է, որ COVID-19 կորոնավիրուսային վարակի տարածումը կանխարգելելու միջոցառումների շրջանակներում ծավալվող աշխատանքների կազմակերպման գործընթացում ներգրավված է 45 հյուրանոցային տնտեսության օբյեկտ (ՀՏՕ), որոնցից 36-ից կառավարությունը ծառայությունը ձեռք է բերել վճարովի հիմունքներով: Մյուսները դա արել են որպես բարեգործություն:

Հյուրանոցային ծառայությունների մատուցման պատրաստակամություն է հայտնել 101 ՀՏՕ, որոնցից՝ 49 կազմակերպություն մարզերից (Արարատի մարզ՝ 2 կազմակերպություն, Արմավիրի մարզ՝ 2 կազմակերպություն, Գեղարքունիքի մարզ՝ 5 կազմակերպություն, Շիրակի մարզ՝ 3 կազմակերպություն, Կոտայքի մարզ՝ 13 կազմակերպություն, Սյունիքի մարզ՝ 6 կազմակերպություն, Վայոց ձորի մարզ՝ 2 կազմակերպություն, Տավուշի մարզ՝ 16 կազմակերպություն) եւ 52 կազմակերպություն Երեւանից:

Ի՞նչ նվազագույն եւ ի՞նչ առավելագույն արժեք է ունեցել մեկ անձի մեկ օրվա համար գնված ծառայությունը (կեցությունը, սնունդը, ախտահանման նյութերն ու ծառայությունները) հարցին ի պատասխան՝ Խաչատրյանը նշել է, որ հյուրանոցների մեկ համարի առավելագույն արժեքը կազմել է 22 հազար դրամ, իսկ նվազագույն արժեքը՝ 5 հազար դրամ, ներառյալ՝ հարկերը, անկախ՝ համարում մեկուսացած անձանց քանակից։

Կախված տվյալ ժամանակամիջոցում հյուրանոցային ծառայություն մատուցող ՀՏՕ-ից եւ նույն ժամանակամիջոցում մեկուսացված անձանց քանակից՝ 14-օրյա կեցության արժեքը տարբեր է եղել:

Ընդհանուր առմամբ ՀՀ էկոնոմիկայի նախարարությանը հատկացված «Կորոնավիրուսով (COVID-19) պայմանավորված մեկուսացված անձանց կեցության ապահովում» 07-04-01-09 ծրագրի շրջանակներում 2020 թվականի մայիսի 14-ի դրությամբ նախարարությունը հյուրանոցներում եւ հյուրատներում մեկուսացված անձանց կեցության համար վճարել է ավելի քան 620 միլիոն 797 հազար դրամ, իսկ սննդի տրամադրման համար՝ ավելի քան 125 միլիոն 997 հազար դրամ: Էկոնոմիկայի նախարարությունն ախտահանիչ նյութերի ձեռքբերման եւ տարածքների ախտահանման ծառայությունների կազմակերպման աշխատանքներում ներգրավված չէ:

Գումարի ո՞ր մասն է տրամադրվել պետբյուջեից, ո՞ր մասը՝ COVID-19-ի դեմ պայքարի հիմնադրամի հանգանակությունից հարցը, ըստ էության, անպատասխան է մնացել: Խաչատրյանը հղում է կատարել այն որոշումներին, որոնցով իրականացվել են գնումները: Նշվում է, որ կորոնավիրուսի տարածումը կանխարգելելու միջոցառումների շրջանակներում հյուրանոցային ծառայությունների գնման գործընթացի եւ սննդի կազմակերպման ծառայությունների իրականացման համար Էկոնոմիկայի նախարարության ֆինանսավորումը կատարվել է ՀՀ վարչապետի՝ 2020 թվականի մարտի 28-ի թիվ N388-Ն, 2020 թվականի ապրիլի 23-ի թիվ 592-Ն եւ 2020 թվականի ապրիլի 28-ի թիվ 636-Ն որոշումների հիման վրա: Այս որոշումները ծախսային վերաբաշխումների, նոր կորոնավիրուսի տարածման հետ կապված միջոցառումներին գումար հատկացնելու մասին են ընդհանուր առմամբ: Ծախսերի համամասնության մասին ոչինչ նշված չէ:

Շարունակությունը՝ armtimes.com-ում