Արցախա-ադրբեջանական պատերազմի 21-րդ օրը  համացանցում սկսվեց, հետագայում մեծ թափ առավ Red Balloon Challenge նախաձեռնությունը․ վերցնում ենք կարմիր փուչիկ, պայթեցնում այն, տեսանկարահանում եւ տեղադրում սոցիալական ցանցերում՝ #redballoonchallenge հեշթեգով։

Red balloon-ը լի է Թուրքիայի ագրեսիայով ու բռնությամբ, այն պայթեցնելով՝ աշխարհին կոչ է արվում դադարեցնել Թուրքիայի ահաբեկչական գործունեությունը, բռնությունները ու պատժամիջոցներ կիրառել Թուրքիայի նկատմամբ։

Մարտահրավերի նախաձեռնողներից Մերի Բաբոյանն Infocom-ի հետ զրույցում ասաց, որ գաղափարը ամբողջ աշխարհի ուշադրությունը պատերազմի վրա հրավիրելն ու աշխարհի աջակցությունը ստանալն է։

Իսկ թե ինչու է ընտրվել հենց կարմիր փուչիկը, մեր զրուցակիցն ասաց, որ այն խորհրդանշում է Թուրքիան․

«Ամբողջ աշխարհն արդեն ընդունել է, որ այն, ինչ հիմա կատարվում է Արցախում, ոչ միայն Ադրբեջանի նախաձեռնությամբ է, այլեւ Թուրքիայի»,- շեշտեց նախաձեռնության համահեղինակը՝ հավելելով, որ սա տարածաշրջանային խնդիր է, եւ փուչիկն ուռել ու իսկական պատուհաս է դարձել։

Մարտահրավերն ի սկզբանե նպատակ է ունեցել ոչ միայն լոկալ, այլեւ միջազգային տարածում ունենալ․

«Քանի որ թիրախը ոչ միայն Հայաստանն է, այլեւ արտասահմանը, տարածման շնորհիվ 500 մասնակիցների մեջ կան մարդիկ նաեւ ԱՄՆ-ից, Գերմանիայից, Իտալիայից, Չինաստանից, Ռուսաստանի Դաշնությունից»։

Ու թեեւ հիմա ֆեյսբուքյան եւ ինստագրամյան տիրույթներում մարտահրավերն առավել ակտիվ է տարածվում, քան թվիթերում, սակայն Բաբոյանը շեշտեց, որ համաշխարհային առավել լայն տարածման եւ միջազգային հանրությանը ներգրավելու համար այդ հարթակը եւս կթիրախավորվի։ 

Սեդա Առաքելյան