Ես հետազոտող եմ և տվյալների վերլուծաբան՝ մասնագիտացած հետխորհրդային ուսումնասիրությունների, արտաքին քաղաքականության վերլուծության և հանրային քաղաքականության ոլորտներում։ 2024 թ․ միացել եմ «Ինֆոքոմի» թիմին, որտեղ իրականացնում եմ տվյալահեն նախագծեր, ստեղծում եմ ավտոմատացման գործիքներ, վեբ հավելվածներ և ինտերակտիվ վիզուալներ։

2017 թ․-ից քաղաքագիտության ուղղությամբ ասպիրանտական հետազոտություններ եմ իրականացնում Հելսինկիի համալսարանում:

Ունեմ նշանակալի փորձ տվյալների սքրեյփինգի, քանակական տեքստային վերլուծության և վիճակագրական մոդելավորման ոլորտներում, աշխատում եմ մեծածավալ տվյալների հետ Python և R լեզուներով՝ սկսած հավաքագրումից ու մշակման գործընթացից մինչև վերլուծություն և վիզուալիզացիա։ Տարիներ շարունակ Ռուսաստանի և Հայաստանի առաջատար ակադեմիական հաստատություններում և հետազոտական կենտրոններում վարել եմ դասընթացներ քանակական մեթոդների, արտաքին քաղաքականության վերլուծության և քաղաքական ռեժիմների վերաբերյալ։

2024 թ․ հիմնել եմ տվյալների վերլուծության և հետաքննությունների Scrapalyze Lab լաբորատորիան, որը հետազոտում է հասարակության, քաղաքականության և տեխնոլոգիայի հատման կետերը հետխորհրդային տարածաշրջանում։

Իմ աշխատանքը միավորում է ակադեմիական հետազոտությունը, լրագրությունը և հանրային քաղաքականության վերլուծությունը՝ մշտապես հիմնված տվյալների և հստակության սկզբունքի վրա։ Բաց եմ համագործակցության համար այնպիսի նախագծերում, որոնք թվերին տալիս են իրական իմաստ։