Շվեդական «Spotify» հոսքային աուդիոյի համացանցային ծառայությունը փակել է իր գրասենյակը Ռուսաստանում անորոշ ժամանակով՝ ի պատասխան Ռուսաստանի ներխուժմանն Ուկրաինա։ Այս մասին գրում է Reuters-ը։
«Մեր առաջնահերթ խնդիրը նախորդ շաբաթ եղել է ապահովել,որ մեր աշխատակիցներն անվտանգ լինեն, և «Spotify»-ը շարունակի ծառայել որպես համաշխարհային և տարածաշրջանային նորությունների կարևոր աղբյուր այն փուլում, երբ տեղեկությունների հասանելիությունն, ավելի քան երբևէ, կարևոր է»,- նշել է «Spotify»-ն իր հայտարարությունում։
Ընկերությունը հայտնել է, որ Ուկրաինայում պատերազմի մեկնարկից ի վեր՝ ուսումնասիրել է ահռելի քանակությամբ բովանդակություն և սահմանափակել ռուսական իշխանամետ լրատվամիջոցներին պատկանող և դրանց կողմից կառավարվող հաղորդումների որոնման հնարավորությունը։
«Spotify» ծառայությունը գործարկվել է 2008 թ-ին, իսկ Ռուսաստանում աշխատում էր 2020 թ-ի ամռանից։ Այսօրվա դրությամբ այն ունի ավելի քան 381 մլն օգտատեր, այդ թվում՝ «Spotify Premium»-ի 172 մլն օգտատեր աշխարհի 178 երկրներում։
Նորա Վանյան
