Օրեր առաջ Ռուսաստանը ՄԱԿ Անվտանգության խորհրդի նիստում հաղորդել էր, որ Մարիուպոլի №1 ծննդատունն օգտագործվել է որպես ուկրաինական «Азов» գումարտակի բազա, ուկրաինացի ուլտրանացիոնալիստներն այնտեղից վռնդել են ողջ անձնակազմին ու ծննդկաններին։ TASS-ի փոխանցմամբ՝ այս մասին հայտարարել է ՌԴ արտգործնախարար Սերգեյ Լավրովը․

«Առաջին անգամը չէ, որ մենք պաթետիկ աղաղակներ ենք լսում այսպես կոչված վայրագությունների մասին, որոնք իրականացնում են ռուսական զինված ուժերը։ Երեք օր առաջ՝ մարտի 7-ին, ՄԱԿ-ի Անվտանգության խորհրդի նիստի ժամանակ մեր պատվիրակությունը փաստեր է ներկայացրել այն մասին, որ այդ ծննդատունը վաղուց գրավվել է «Азов» գումարտակի եւ մյուս ծայրահեղականների կողմից, այդտեղից վտարել են բոլոր ծննդկաններին, բուժքույրերին, առհասարակ ողջ անձնակազմին։ Այն ծայրահեղ արմատական «Азов»-ի բազան էր։ Այդ տվյալները ներկայացվել են երեք օր առաջ, ուստի ինքներդ եզրակացություն արեք՝ ինչպես է մանիպուլացվում հասարակական կարծիքն ամբողջ աշխարհում»։

Նա հավելել է, որ արեւմտյան լրատվամիջոցները շատ հուզական սյուժեներ են պատրաստել ծննդատան ոչնչացման մասին, բայց իրավիճակի վերաբերյալ նրանց տեսակետն օբյեկտիվ չէ։