Ռուսական զբոսաշրջային ընկերությունները սկսել են այցեր առաջարկել արտասահման այն անձանց համար, ովքեր ուզում են այնտեղի բանկերում միջազգային վճարային համակարգերի քարտեր ձևակերպել, հաղորդում է «Կոմերսանտը»՝ վկայակոչելով Ռուսաստանի զբոսաշրջային ընկերությունների ասոցիացիայի հայտարարությունը։

Visa-ն և MasterCard-ն արտասահմանում այլևս չեն սպասարկում ռուսական քարտերն ուկրաինական պատերազմի մեկնարկից հետո։

Ասոցիացիան գրում է, որ նրանց համար, ովքեր ուզում են ճամփորդել և աշխատանքի բերումով այլ երկրներ այցելել, «խելամիտ այլընտրանք է» այլ երկրներ մեկնելն ու այնտեղ Visa և Mastercard քարտեր ձևակերպելը, որոնք հնարավոր կլինի արտասահմանում օգտագործել։ Այս պահին այդպիսի ճամփորդություններ են առաջարկվում դեպի Ուզբեկստան, մոտ ապագայում պլանավորվում են ուղևորություններ նաև դեպի Հայաստան, Ղազախստան, Ղրղզստան և Թուրքիա։

Նման ճամփորդության առաջարկի մասին երեկ առաջինը հայտարարել է «ՎԵԴԻ Գրուպ» զբոսաշրջային ընկերությունը։ «VISA-ի համար՝ դեպի Ուզբեկստան» առաջարկը նախատեսում է երեք օր և երկու գիշեր անցկացնել Տաշքենդի հյուրանոցում։ Երկրորդ օրը զբոսաշրջիկները «կարող են առավոտից, իրենց ցանկությամբ, մեկ ժամ ծախսել» Visa կամ Mastercard ձևակերպելու և ստանալու վրա։ Ուղևորությունը մեկ հոգու համար արժե 23 հազար ռուբլի, ավիատոմսն առանձին է հաշվարկվում։

«Ռուսկի էքսպրես» ընկերությունն այդպիսի ուղևորություն է նախապատրաստում դեպի Ուզբեկստան և մի քանի այլ երկրներ, այդ թվում՝ Հայաստան, Ղազախստան և Ղրղզստան։ «Ինտուրիստը» նույնպես քննարկում է այդպիսի ուղևորությունների հնարավորությունը, այն նաև դիտարկում է Թուրքիայի ուղղությունը։

Նշենք, որ Ռուսաստանի կողմից Ուկրաինայում ռազմական գործողություններ սկսելուց հետո Visa-ն ու MasterCard-ը լքել են ռուսական շուկան։ ՌԴ դեմ արևմտյան երկրների սահմանած պատժամիջոցների շրջանակում մի քանի ռուսական բանկեր անջատվել են դրամական փոխանցումների SWIFT միջազգային համակարգից։ Երկրում իրենց աշխատանքը դադարեցրել են Apple Pay-ն ու Google Pay-ը, JCB-ն, PayPal-ը, Western Union-ը։

Նորա Վանյան