Ջո Բայդեն

ԱՄՆ 46-րդ նախագահը՝ Դեմոկրատական կուսակցությունից։

Ծնվել է 1942 թվականի նոյեմբերի 20-ին, ԱՄՆ-ի Փենսիլվանիա նահանգում։ Ամերիկացի քաղաքական գործիչ է, 2009 թվականի հունվարի 20-ին դարձել է Միացյալ նահանգների փոխնախագահը։ Մինչ փոխնախագահ դառնալը՝ նա սենատոր է եղել Դելավեր նահանգից՝ 1973-2009 թվականներին։ Նա ԱՄՆ դեմոկրատական կուսակցությունից առաջադրվել է 2020 թվականի նախագահական ընտրություններում՝ ընդդեմ գործող նախագահ Դոնալդ Թրամփի եւ նոյեմբերի 7-ին` վերջնական արդյունքներով ընտրվել է ԱՄՆ-ի նախագահ։

Սովորել է Դելավերի համալսարանում՝ ստանալով իրավաբանի մասնագիտություն։ 1970 թվականին ընտրվել է Նյու Քասլի շրջանի խորհրդում եւ դարձել վեցերորդ ամենաերիտասարդ սենատորը ԱՄՆ-ի պատմության մեջ, երբ 1972 թվականի ԱՄՆ-ի սենատորների ընտրություններում հաղթեց Դելավերում։ Բայդենը երկար ժամանակ Սենատի արտաքին հարաբերությունների հանձնաժողովի անդամ է եղել, նաեւ հանձնաժողովի նախագահ։ Նա դեմ էր 1991 թվականի Իրաք-քուվեյթյան պատերազմին, սակայն կողմ էր ՆԱՏՕ-ի ընդարձակմանը՝ դեպի Արեւելյան Եվրոպա եւ նրա ներքաշմանը 1990-ականների Հարավսլավիայի պատերազմներին։ Նա կողմ էր 2002 թվականի Իրաքի պատերազմի բանաձեւին, բայց դեմ էր 2007 թվականին Իրաքի պատերազմում ԱՄՆ զորքերի ավելացմանը։ Բայդենը ղեկավարել է Սենատի դատական հանձնաժողովը՝ 1987 թվականից մինչեւ 1995 թվականը, զբաղվել թմրանյութերի քաղաքականությամբ, հանցագործությունների կանխարգելմամբ եւ քաղաքացիական ազատությունների խնդիրներով։

Բայդենը վերընտրվել է Սենատում վեց անգամ եւ հրաժարվել Սենատորի պաշտոնից 2008 թվականի նախագահական ընտրություններին մասնակցելու համար՝ որպես Բարաք Օբամայի փոխնախագահ։ Օբաման եւ Բայդենը վերընտրվել են 2012 թվականին։

Ջո Բայդենը հրաժարվել է հրաժարական տալ |news.am|

news.am: ԱՄՆ նախագահ Ջո Բայդենը, հրաժարվելով երկրորդ ժամկետով վերընտրվելու իր փորձից, հայտարարել է, որ կշարունակի պաշտոնավարել որպես պետության ղեկավար: Նա համապատասխան հայտարարություն է հրապարակել X սոցիալական ցանցի իր էջում: «Մենք Ամերիկայի Միացյալ Նահանգներն ենք, չկա մի բան, որը մենք չկարողանանք անել, եթե դա անենք միասին: Պարզապես պետք է հիշել, թե ով ենք մենք։ Ես իմ նախագահությունը նվիրել եմ դա ապացուցելուն, և կշարունակեմ դա անել այսօր, վաղը և ամեն օր, քանի դեռ ես պատիվ ունեմ ծառայելու որպես ձեր նախագահ», - ասված է ԱՄՆ նախագահի հայտարարության մեջ: Այն բանից հետո, երբ Բայդենը դուրս եկավ նախագահական մրցապայքարից, Ներկայացուցիչների պալատի խոսնակ, հանրապետական Մայք Ջոնսոնը պետության ղեկավարին կոչ արեց հրաժարական տալ։ «Եթե Ջո Բայդենը պիտանի չէ նախագահական ընտրություններում առաջադրվելու համար, նա պիտանի չէ նախագահ լինելու համար: Նա պետք է անհապաղ հրաժարական տա»,- գրել է Ջոնսոնը սոցիալական ցանցի իր X էջում: Այն, որ Բայդենը որոշել է հանել իր թեկնածությունն ընտրություններից, հայտնի դարձավ անցած կիրակի։ Նա ասել է, որ ծրագրում է դիմել ժողովրդին այս շաբաթվա վերջին՝ «բացատրելու իր որոշումը»: Բայդենը հավանություն է տվել փոխնախագահ Քամալա Հարիսին որպես իր իրավահաջորդ։ Նոր թեկնածուի մասին որոշումը պետք է կայացնի Դեմոկրատական կուսակցության համագումարը, որը կկայանա մի քանի շաբաթից։ 81-ամյա Բայդենը՝ Ամերիկայի նախագահներից ամենատարեցը, հայտնվել էր ուժեղ ճնշման տակ Դոնալդ Թրամփի հետ աղետալի բանավեճից հետո, որին հաջորդեցին հրապարակային ելույթներում նոր սայթաքումներ. հուլիսի 12-ին ՆԱՏՕ-ի գագաթնաժողովում Բայդենը Ուկրաինայի նախագահ Վլադիմիր Զելենսկուն անվանել է Վլադիմիր Պուտին, իսկ 5 օր անց BET-ին տված հարցազրույցի ժամանակ նա չի կարողացել հիշել պաշտպանության նախարար Լլոյդ Օսթինի անունը՝ նրան անվանելով «սևամորթ»: Եվ չնայած Բայդենի վարկանիշն աղետալի անկում չի ապրել (ըստ NYT/Sienna-ի հարցման՝ հուլիսի սկզբին նա ուներ 43%՝ Թրամփի 49%-ի դիմաց), ավելի քան 20 կոնգրեսականներ, այդ թվում՝ Սենատի մեծամասնության դեմոկրատ ղեկավար Չակ Շումերը, հրապարակավ կոչ են արել, որ նա հանի իր թեկնածությունը, իսկ Դեմոկրատական կուսակցության դոնորները սկսել են հետ կանչել նվիրատվությունները:

09:47 - 23 հուլիսի, 2024

Քամալա Հարիսը հայտարարում է՝ պատրաստ է պաշտոնապես առաջադրվել որպես նախագահի թեկնածու |azatutyun.am|

azatutyun.am: ԱՄՆ փոխնախագահ Քամալա Հարիսը հայտարարել է, որ մտադիր է պաշտոնապես առաջադրվել Դեմոկրատական կուսակցությունից և հաղթել հանրապետական թեկնածու Դոնալդ Թրամփին 2024 թվականի նոյեմբերի ընտրություններում։ Այս մասին հայտնում է «Ազատության» Настоящее Время ծառայությունը։ Ավելի վաղ Ջո Բայդենը, որը հրաժարվել էր մասնակցել ընտրություններին, հորդորել էր նրան առաջադրել որպես նախագահի թեկնածու։ «Ես կանեմ ինձնից կախված ամեն ինչ՝ միավորելու Դեմոկրատական կուսակցությունը և միավորելու մեր երկիրը՝ Դոնալդ Թրամփին հաղթելու համար»,- ասել է Հարիսը։ Քանալա Հարիսը շնորհակալություն է հայտնել Բայդենին իրեն առաջադրելու համար և նախագահական մրցապայքարից դուրս գալու նրա որոշումը համարել է «անձնուրաց և հայրենասիրական»։ «Մենք 107 օր ունենք մինչև ընտրությունները։ Միասին մենք կպայքարենք։ Միասին մենք կհաղթենք»,- ասել է Հարիսը։ Դոնալդ Թրամփն էլ, մեկնաբանելով Բայդենի՝ ընտրապայքարից դուրս գալու որոշումը, հայտարարել է, թե վերջինս պատմության մեջ կմտնի որպես «վատագույն նախագահ»։ Այսպես է նա CNN-ին տված հարցազրույցում մեկնաբանել Բայդենի դուրս գալը ԱՄՆ նախագահական ընտրարշավից: Նա նաև հայտարարել է, թե Քամալա Հարիսին հաղթելը ընտրություններում անհամեմատ ավելի հեշտ կլինի, քան Բայդենին: Նշենք, որ տարբեր հարցումների համաձայն՝ Բայդենը պարտվել էր հանրապետական Թրամփին նախընտրական բանավեճում: Այդ ֆոնին ԱՄՆ Դեմոկրատական կուսակցության ներկայացուցիչները սկսեցին ակտիվորեն կոչ անել առաջադրել մեկ այլ թեկնածուի: Դեմոկրատների հավանական այլընտրանքային թեկնածուն փոխնախագահ Հարիսն է: Տեսականորեն կուսակցությունը թեկնածուին փոխարինելու հնարավորություն կունենա օգոստոսին կայանալիք համագումարում, սակայն դրա համար անհրաժեշտ է նախնական ընտրություններում հաղթած թեկնածուի համաձայնությունը: Ավելի վաղ Բայդենը հայտարարում էր, որ մտադիր է գնալ մինչև վերջ: ԱՄՆ նախագահի ընտրությունները տեղի կունենան նոյեմբերի 5-ին:

09:56 - 22 հուլիսի, 2024

Բայդենն ասել է, որ կարող է դուրս գալ նախագահական մրցապայքարից, եթե առողջական խնդիրներ ունենա |shantnews.am|

shantnews.am: ԱՄՆ նախագահ Ջո Բայդենը հայտարարել է, որ դուրս կգա նախագահական մրցապայքարից, եթե բժիշկները պարզեն, որ նա առողջական խնդիրներ ունի։ Այս մասին նա ասել է BET-ին տված հարցազրույցում։ «Անկեղծ ասած, ես կարծում եմ, որ միակ բանը, որ տարիքը բերում է՝ իմաստությունն է»,- հավելել է Բայդենը։ Բայդենն ավելի վաղ ասել էր, որ ինքը կհրաժարվի նախընտրական մրցապայքարից միայն այն դեպքում, եթե «Աստված իրեն ասի դա անել»։

12:02 - 17 հուլիսի, 2024

Ջո Բայդեն. «Քաղաքականությունը երբեք չպետք է դառնա ռազմի դաշտ» |amerikayidzayn.com|

amerikayidzayn.com: ԱՄՆ նախագահը դիմել է երկրին ուղերձով Դոնալդ Թրամփի դեմ մահափորձի կապակցությամբ՝ կոչ անելով քաղաքական դաշտի բոլոր կողմերին մեղմացնել իրենց հռետորաբանությունը։ Նախագահ Ջո Բայդենը դատապարտել է գալիք նոյեմբերի ընտրություններում իր ենթադրյալ մրցակից Դոնալդ Թրամփի դեմ մահափորձը՝ ասելով, որ Ամերիկայում բռնության տեղ չկա և ընդգծելով, որ քաղաքականությունը «չպետք է դառնա ռազմի դաշտ», և որ բոլոր տարաձայնությունները պետք է լուծվեն քվեաթերթիկների միջոցով։ Բայդենն այս հայտարարությունն արել է երկրին ուղղված հեռուստաուղերձի ժամանակ, որը հեռարձակվել է արևելյան ժամանակով երեկոյան 20:00-ին՝ արձագանքելով Թրամփի դեմ մահափորձին, որը տեղի է ունեցել շաբաթ երեկոյան Փենսիլվանիայում ընթացող հանրահավաքում: Ջո Բայդենը օգտագործեց Սպիտակ տան Օվալաձև գրասենյակի պաշտոնական միջավայրը՝ շեշտելու Թրամփի մահափորձից հետո ամերիկացիների համախմբման անհրաժեշտությունը: «Թրամփի վրա կրակելը ազդանշան էր բոլորիս համար՝ հետ կանգնելու համար», - ասել է Բայդենը։ Բարեբախտաբար, Դոնալդ Թրամփը լուրջ վնասվածքներ չի ստացել, հավելել է նա։ «Մենք չենք կարող թույլ տալ, որ այս բռնությունը դառնա նորմ։ Այս երկրում քաղաքական հռետորաբանությունը շատ թեժացել է։ Ժամանակն է սառեցնել այն»,- ասել է Բայդենը: «Մենք բոլորս պատասխանատվություն ենք կրում դրա համար»,- հավելել է նախագահը: Ամերիկացիների համար կարևոր հարցերի վերաբերյալ Օվալաձև գրասենյակի ուղերձը Բայդենի երրորդն էր 2021 թվականին պաշտոնը ստանձնելուց հետո: Բայդենի ելույթը թույլ տվեց նրան ցույց տալ նախագահության հեղինակությունն ու կշիռը, ինչը կարևոր խորհրդանշական ազդանշան է իր դեմոկրատական կուսակցության այն հետևորդներին, ովքեր կոչ են անում 81-ամյա առաջնորդին հրաժարվել վերընտրվելուց՝ մտավախություն ունենալով, որ նրա առողջական վիճակը կխանգարի նրան հաջողությամբ կատարել Սպիտակ տան ղեկավարի պարտականությունները հաջորդ չորս տարում։ Կիրակի ավելի վաղ Բայդենը հրամայել էր դաշնային անվտանգության վերանայում անցկացնել այն բանից հետո, երբ մահափորձ էր արվել Դոնալդ Թրամփի դեմ, իսկ հանրահավաքին ներկաներից մեկը զոհվել էր: Ենթադրյալ հրաձիգը կարողացել է շրջանցել Գաղտնի ծառայության գործակալներին, որոնց հանձնարարվել է պաշտպանել Թրամփին, բարձրացել է թեկնածուի ելույթի մոտ գտնվող շենքի տանիք և մի քանի կրակոց է արձակել, նախքան իրավապահների կողմից սպանվելը։ Այսօր կեսօրին ելույթ ունենալով Սպիտակ տանը՝ Բայդենն ասել է, որ հանձնարարել է Գաղտնի ծառայությանը վերանայել այս շաբաթ Միլվոկիում Հանրապետականների ազգային համագումարի համար նախատեսված անվտանգության բոլոր միջոցները, որտեղ Թրամփը պաշտոնապես կառաջադրվի որպես հանրապետականների նախագահի թեկնածու: Նա նաև ասել է, որ երեկվա հանդիպմանը հանձնարարել է «Ազգային անվտանգության անկախ վերանայում կատարել՝ ճշգրիտ գնահատելու, թե ինչ է տեղի ունեցել»։ Նա ասաց, որ հետաքննության արդյունքները կներկայացվեն ամերիկացի ժողովրդին: Բայդենն ընդգծել է, որ միջադեպի առնչությամբ ՀԴԲ-ի հետաքննությունը գտնվում է վաղ փուլում և հրամայել է այն իրականացնել մանրակրկիտ և արագ։ «Ես խրախուսում եմ բոլորին, բոլորին, խնդրում եմ, ենթադրություններ մի արեք [կրակողի] դրդապատճառների կամ կապերի մասին։ Թող ՀԴԲ-ն և նրանց գործընկեր գործակալությունները իրենց գործն անեն»,- ասաց նա: Շարունակությունը՝ սկզբնաղբյուր կայքում

09:34 - 15 հուլիսի, 2024

Բայդենը և Սթարմերը խոստացել են շարունակել աջակցությունն Ուկրաինային |armenpress.am|

armenpress.am: Վաշինգտոնում անցկացվող ՆԱՏՕ-ի գագաթնաժողովի շրջանակներում ԱՄՆ նախագահ Ջո Բայդենը Սպիտակ տանը երկկողմ հանդիպում է անցկացրել Մեծ Բրիտանիայի վարչապետ Քիր Սթարմերի հետ։ Այս մասին հաղորդագրություն է տարածել Սպիտակ տունը։ Բայդենը շնորհավորել է Սթարմերին խորհրդարանական ընտրությունների արդյունքներով Մեծ Բրիտանիայի վարչապետի պաշտոնը ստանձնելու համար և նշել, որ Բրիտանիան ԱՄՆ-ի կարևոր գործընկերն է։ «Ղեկավարները վերահաստատել են իրենց հանձնառությունը ԱՄՆ-Մեծ Բրիտանիա համագործակցությանը համաշխարհային մակարդակով, մինչ նրանք հասցեագրում են ընդհանուր մարտահրավերները և հնարավորությունները։ Նրանք ընդգծել են իրենց ընդհանուր հանձնառությունը Ուկրաինային աջակցությանը, մինչ երկիրը պայքարում է ռուսական ագրեսիայի դեմ», - նշված է Սպիտակ տան հայտարարությունում։ Իր հերթին Բրիտանիայի վարչապետի գրասենյակը հավելել է, որ կողմերը համաձայնել են անել ամեն բան Ուկրաինային աջակցության համար և երաշխավորել, որ ՌԴ նախագահ Վլադիմիր Պուտինը չհաղթի պատերազմում։ Կողմերը նաև ընդգծել են Իսրայելի և պաղեստինյան ՀԱՄԱՍ արմատական շարժման միջև հրադադարի կարևորությունը՝ շեշտելով իրենց հանձնառությունը երկու պետությունների ստեղծման միջոցով խնդրի լուծմանը։ Բրիտանիայի վարչապետի գրասենյակը նաև հայտարարություն է տարածել Ուկրաինային մինչև 2030-2031 ֆինանսական տարին տարեկան առնվազն 3 մլրդ ֆունտ ստեռլինգի (3,85 մլրդ դոլար) ռազմական աջակցությունը շարունակելու մասին, ինչպես խոստացել էր իր նախորդ Ռիշի Սունակը։

10:15 - 11 հուլիսի, 2024

Ուկրաինան ՀՕՊ համակարգեր կստանա․ Բայդենը՝ ՆԱՏՕ-ի գագաթնաժողովում |azatutyun.am|

azatutyun.am: ԱՄՆ նախագահ Ջո Բայդենը երեկ Վաշինգտոնում, ՆԱՏՕ-ի գագաթնաժողովի բացման ժամանակ, հայտարարել է Ուկրաինային զենիթահրթիռային համակարգեր մատակարարելու ծրագրերի մասին։ «Միացյալ Նահանգները կանի հնարավորը, որպեսզի Ուկրաինան հակաօդային պաշտպանության համակարգերի առաջին ստացողներից լինի», - հայտարարել է Բայդենը։ Միացյալ Նահանգները, Գերմանիան և Ռումինիան Կիևին կտրամադրեն մեկական Patriot զենիթահրթիռային համակարգեր, Նիդեռլանդները ևս, այլ երկրների հետ համագործակցելով, Ուկրաինային կմատակարարի ևս մեկ Patriot համակարգ։ Ուկրաինան, ըստ նախագահ Բայդենի, տարվա ընթացքում ստացել է հարյուրավոր որսացող սարքեր, որոնք կօգնեն պաշտպանել ուկրաինական քաղաքները ռուսական հրթիռներից։ ԱՄՆ նախագահը հայտարարել է Ուկրաինային աջակցելու պատրաստակամության մասին։ «Պուտինը ցանկանում է Ուկրաինայի լիակատար հպատակեցումը, ցանկանում է վերջ դնել ուկրաինական ժողովրդավարությանը, ոչնչացնել Ուկրաինայի մշակույթը և ջնջել այն քարտեզից։ Մենք գիտենք, որ Պուտինը դրանով կանգ չի առնելու, բայց Ուկրաինան կարող է և կկանգնեցնի Պուտինին», - հայտարարել է Բայդենը։ Իր ելույթում ԱՄՆ նախագահը նաև շեշտել է՝ ամերիկացիների ճնշող մեծամասնությունը հասկանում է, որ ՆԱՏՕ-ի դաշինքն աշխարհն ավելի անվտանգ է դարձնում։ «Ամերիկացիները գիտեն, որ մենք ավելի ուժեղ ենք, երբ գործում ենք ընկերների հետ միասին», - ասել է ԱՄՆ նախագահը։ Երեկ Վաշինգտոն այցից հետո Ուկրաինայի նախագահ Վլադիմիր Զելենսկին ասել է, որ կդիմի ՆԱՏՕ-ի երկրների ղեկավարներին՝ լրացուցիչ հակաօդային պաշտպանության համակարգեր, F-16 կործանիչներ ստանալու խնդրանքով, ինչպես նաև անվտանգության լրացուցիչ երաշխիքներ կպահանջի: Վաշինգտոնում ընթանում է ՆԱՏՕ-ի հոբելյանական գագաթնաժողովը։ Գագաթնաժողովի հիմնական թեման ուկրաինական հակամարտությունն է։

10:39 - 10 հուլիսի, 2024

Ամերիկայի Միացյալ Նահանգները Հայաստանի Հանրապետության կարևորագույն գործընկերներից է. ՀՀ նախագահ

Հանրապետության նախագահ Վահագն Խաչատուրյանը շնորհավորական ուղերձ է հղել Ամերիկայի Միացյալ Նահանգների նախագահ Ջո Բայդենին ազգային տոնի՝ Անկախության օրվա կապակցությամբ: «Ամերիկայի Միացյալ Նահանգները Հայաստանի Հանրապետության կարևորագույն գործընկերներից է: Վստահ եմ, որ այսուհետ ևս համատեղ ջանքերով կզարգացնենք մեր երկրների միջև ավելի քան երեսնամյա բազմաշերտ հարաբերությունները։ Բարձր ենք գնահատում Միացյալ Նահանգների շարունակական աջակցությունն ու ջանքերը՝ ուղղված ինչպես Հարավային Կովկասում խաղաղության և կայունության պահպանմանը, այնպես էլ Հայաստանում ժողովրդավարական ու տնտեսական բարեփոխումների իրականացմանը: Հայ-ամերիկյան համագործակցությանը մեծապես նպաստում են նաև ԱՄՆ-ում բնակվող մեր հայրենակիցները, որոնք նշանակալի ավանդ ունեն երկու ժողովուրդների բարեկամության ամրապնդման գործում»,- մասնավորապես ասվում է նախագահ Խաչատուրյանի ուղերձում:

12:52 - 04 հուլիսի, 2024

Նիկոլ Փաշինյանը ԱՄՆ Անկախության օրվա առթիվ շնորհավորական ուղերձ է հղել Ջո Բայդենին

Վարչապետ Նիկոլ Փաշինյանը շնորհավորական ուղերձ է հղել Ամերիկայի Միացյալ Նահանգների նախագահ Ջո Բայդենին՝ Անկախության օրվա առթիվ: Շնորհավորական ուղերձում ասված է. «Մեծարգո նախագահ Բայդեն, Հայաստանի Հանրապետության կառավարության և անձամբ իմ անունից ջերմորեն շնորհավորում եմ Ձեզ և Ամերիկայի Միացյալ Նահանգների ժողովրդին` Անկախության օրվա առթիվ։ Ամերիկայի Միացյալ Նահանգների ստեղծման հիմքում դրված ազատության, արդարության և ժողովրդավարության համընդհանուր արժեքները, ինչպես նաև Անկախության հռչակագրում արտացոլված գաղափարները շարունակում են ոգեշնչման և քաջալերանքի աղբյուր լինել ողջ աշխարհում: Հայաստանի և Միացյալ Նահանգների միջև բազմաշերտ և սերտ կապերը, վերջին տարիներին համագործակցության զգալի աճն ու զարգացումը, նոր ոլորտների ընդգրկումը երկկողմ օրակարգում ընդգծում են մեր գործընկերության ամրությունը՝ հիմնված ժողովրդավարական սկզբունքների, օրենքի գերակայության և մարդու իրավունքների պաշտպանության վրա: Ուրախ եմ արձանագրելու, որ ժողովրդավարական բարեփոխումների, տնտեսական և էներգետիկ դիմակայունության խթանման, արդարադատության, կոռուպցիայի դեմ պայքարի, անվտանգային համագործակցության և այլ ոլորտներում մեր փոխգործակցության հետագա ընդլայնման հանձնառությունն արտացոլվել է Հայաստանի և ԱՄՆ-ի միջև ռազմավարական երկխոսությունը ռազմավարական գործընկերության մակարդակի բարձրացնելու տեսլականում: Հայաստանը մեծապես կարևորում է Միացյալ Նահանգների դերը մեր տարածաշրջանում խաղաղության հաստատման գործընթացում և խորապես գնահատում է ԱՄՆ-ի աջակցությունը Հայաստանի Հանրապետության ինքնիշխանությանը, անկախությանը, ժողովրդավարությանը, տարածքային ամբողջականությանը և սահմանների անխախտելիությանը՝ 1991 թվականի Ալմա-Աթայի հռչակագրին համապատասխան: Օգտվելով առիթից՝ ցանկանում եմ վերահաստատել Հայաստանի հանձնառությունը խաղաղության օրակարգին և վստահություն հայտնել, որ մեր շարունակական ու ամրապնդվող գործընկերությունն այս կարևորագույն ժամանակաշրջանում կնպաստի խաղաղ և ավելի բարեկեցիկ ապագայի կերտմանը` մեր երկու երկրների և տարածաշրջանի համար: Կրկին շնորհավորելով Անկախության օրվա առթիվ՝ մաղթում եմ Ձեզ և ԱՄՆ-ի բարեկամ ժողովրդին խաղաղություն, բարօրություն և շարունակական առաջընթաց»:

11:05 - 04 հուլիսի, 2024

Բայդենը դուրս չի գա ընտրապայքարից․ խոսնակ |1lurer.am|

1lurer.am: ԱՄՆ նախագահ Ջո Բայդենը մտադիր չէ դուրս գալ նախագահական ընտրապայքարից Դոնալդ Թրամփի հետ անհաջող բանավեճից հետո: Այդ մասին հայտնել է Բայդենի քարոզարշավի խոսնակ Սեթ Շուստերը: Անդրադառնալով բանավեճին՝ ԱՄՆ գործող նախագահն ասել է․ «դժվար է ստախոսի հետ բանավիճել»։ Ավելի վաղ ԱՄՆ Ջորջիա նահանգի Ատլանտա քաղաքում՝ CNN-ի տաղավարում, տեղի էր ունեցել Ջո Բայդենի և Դոնալդ Թրամփի նախընտրական առաջին բանավեճը։ Դրանից հետո CNN-ը հեռուստադիտողների շրջանում հարցում է անցկացրել։ Արդյունքների համաձայն՝ գրանցված ունկնդիրների 67%-ը նախապատվությունը տվել է Թրամփին: Այդ բանավեճերից հետո Բայդենի համախոհները կարծիք էին հայտնել, որ նա պետք է դուրս գա ընտրապայքարից։

21:37 - 28 հունիսի, 2024

ԱՄՆ-ում կայացավ Բայդեն-Թրամփ առաջին բանավեճը |azatutyun.am|

azatutyun.am: ԱՄՆ-ում տեղի է ունեցել առաջին բանավեճը ԱՄՆ նախագահի դեմոկրատ թեկնածու Ջո Բայդենի և հանրապետական թեկնածու Դոնալդ Թրամփի միջև։ Բանավեճի կազմակերպիչը CNN-ն էր։ Հաղորդավարներն առաջարկել են թեկնածուներին պատասխանել ամերիկացիների համար առավել հրատապ խնդիրներին վերաբերող հարցերի. բարձր գնաճ, կանանց աբորտի իրավունքի նկատմամբ վերաբերմունք, անօրինական միգրացիա, օգնություն Ուկրաինային, աֆրոամերիկացիների խնդիրներ, երեխաներ ունեցող ընտանիքներին աջակցություն, կլիմայի փոփոխության դեմ պայքար և այլ, սակայն, նշվում է, որ երկու թեկնածուներն էլ խուսափել են պատասխանել շատ հարցերի՝ 90 րոպեանոց բանավեճի ընթացքում կրկնելով նախօրոք պատրաստած թեզերը: Բայդենը պնդել է, թե իր ղեկավարության շնորհիվ երկիրը հաջողությամբ հաղթահարել է COVID-ի առաջացրած հետևանքները, և որ գնաճը նվազում է։ Բայդենը խոստացել է վերընտրվելու դեպքում բարձրացնել հարկերը բարձր եկամուտ ունեցող ամերիկացիների համար, որպեսզի սոցիալական ծրագրերը կարողանան ֆինանսավորել։ Թրամփն իր հերթին հայտարարել է, որ ներկայիս տնտեսական աճը իրականում իր նախագահության արդյունքն է։ Նա Բայդենին մեղադրել է անօրինական միգրացիան ներելու և նույնիսկ խրախուսելու համար, ինչը, ըստ Թրամփի, ծանր հարվածներ է հասցնում ցածր եկամուտ ունեցող ամերիկացիներին: Բանավեճի թեժ քննարկման թեմաներից էր Ուկրաինա ռուսական ներխուժումը։ Դոնալդ Թրամփը մի քանի անգամ կրկնել է, որ եթե ինքը լիներ Սպիտակ տանը, Ռուսաստանը չէր ներխուժի Ուկրաինա։ Նա ասել է, թե Աֆղանստանից ամերիկյան բանակի «ամոթալի» դուրսբերումը Պուտինին Ուկրաինայի դեմ պատերազմ սկսելու վճռականություն է տվել։ Նրա խոսքով՝ Բայդենի քաղաքականությունը տանում է դեպի երրորդ համաշխարհային պատերազմի։ Բայդենն առարկել է։ Թրամփը նաև ասել է, որ համաձայն չէ Պուտինի առաջարկած խաղաղության ծրագրին, Ռուսաստանի նախագահին անվանել է հանցագործ, սակայն կրկնել է, որ նախագահ ընտրվելու դեպքում ինքը կկարողանա ավարտել պատերազմն Ուկրաինայում նույնիսկ մինչև նախագահի պաշտոնի պաշտոնապես ստանձնումը։ Բանավեճից հետո The Wall Street Journal-ը «Թրամփը ջախջախում է Բայդենին բանավեճի ժամանակ» վերտառությամբ հոդված է հրապարակում։ The New York Times-ն էլ գրում է Բայդենի «ամոթալի բանավեճի» և Դեմոկրատական կուսակցությունում «խուճապի» մասին։

09:22 - 28 հունիսի, 2024

Բայդենը Սթոլթենբերգի հետ քննարկել է իրավիճակն Ուկրաինայում եւ Հնդկական-խաղաղօվկիանոսյան տարածաշրջանում |news.am|

news.am: ԱՄՆ նախագահ Ջո Բայդենը ՆԱՏՕ-ի գլխավոր քարտուղար Յենս Սթոլթենբերգի հետ երկուշաբթի Սպիտակ տանը հանդիպման ժամանակ քննարկել է իրավիճակը Ուկրաինայում և Հնդկական-Խաղաղօվկիանոսյան տարածաշրջանում։ Այս մասին զրույցից հետո հայտարարել է Սպիտակ տունը։ «Նախագահը ողջունել է ՆԱՏՕ-ի դաշնակիցների կողմից Ուկրաինային աջակցելու և գործընկերային հարաբերությունների խորացմանն ուղղված քայլերը, այդ թվում՝ Հնդկական-խաղաղօվկիանոսյան տարածաշրջանում։ Նախագահ Բայդենը և գլխավոր քարտուղար Սթոլթենբերգը նաև քննարկել են պաշտպանության ծախսերի զգալի առաջընթացը, ներառյալ այն, որ ռեկորդային 23 դաշնակիցներ իրենց ռազմական ծախսերը կհասցնեն ՀՆԱ-ի 2%-ին՝ ավելի քան կրկնապատկելով այդ թիվը նախագահ Բայդենի պաշտոնավարումից ի վեր»,- նշվում է փաստաթղթում։

10:18 - 18 հունիսի, 2024

«Եթե նա մարդ է, որին կարելի է հարգել, ապա նա դա չի անի». Զելենսկին պատմել է Սի Ծինփինի՝ իրեն տված խոստման մասին |tert.am|

tert.am: Չինաստանի ղեկավար Սի Ծինփինն Ուկրաինայի նախագահ Վլադիմիր Զելենսկիին խոստացել է «ոչ մի զենք» չվաճառել Ռուսաստանին։ Այս մասին Զելենսկին պատմել է ԱՄՆ նախագահ Ջո Բայդենի հետ մամուլի ասուլիսում։ «Եթե նա մարդ է, որին կարելի է հարգել, ապա նա դա չի անի, նա խոսք է տվել», - հավելել է Ուկրաինայի նախագահը: Զելենսկին այսպես է պատասխանել հարցին, թե արդյոք Չինաստանը զենք է փոխանցում Ռուսաստանին Ուկրաինայի հետ հակամարտության համար։

11:00 - 14 հունիսի, 2024

ԱՄՆ-ն ու Ուկրաինան անվտանգության ոլորտում համագործակցության համաձայնագիր են ստորագրել |azatutyun.am|

azatutyun.am: ԱՄՆ-ի և Ուկրաինայի նախագահներ Ջո Բայդենը և Վլադիմիր Զելենսկին անվտանգության ոլորտում համագործակցության համաձայնագիր են ստորագրել։ Համաձայնագիրը նախատեսված է 10 տարվա համար։ Ստորագրման արարողությունը տեղի է ունեցել Իտալիայում՝ G7-ի գագաթնաժողովի շրջանակներում։ Զելենսկին հրավիրված է եղել աշխարհի յոթ առաջատար ժողովրդավարական երկրների ղեկավարների հանդիպմանը, որտեղ քննարկվել է նաև Ռուսաստանի հետ պատերազմում Ուկրաինային աջակցելու հարցը։ Ըստ Reuters-ի՝ համաձայնագրի տեքստում ուղղակիորեն նշվում է, որ փաստաթղթի նպատակն է նաև օգնել Ուկրաինային դեպի ՆԱՏՕ ճանապարհին։ Փաստաթուղթը չի պարունակում ռազմական աջակցության պարտավորություն Ուկրաինայի դեմ ագրեսիայի դեպքում, ինչպես նախատեսված է Հյուսիսատլանտյան պայմանագրով։ Սակայն ագրեսիայի կամ դրա սպառնալիքի դեպքում 24 ժամվա ընթացքում տրամադրվում է խորհրդատվական մեխանիզմ՝ որոշելու, թե ինչ քայլեր կարելի է ձեռնարկել Ուկրաինայի պաշտպանական ներուժն ուժեղացնելու համար։ Համաձայնագիրը նաև վերահաստատում է ԱՄՆ հավատարմությունը Ուկրաինայի ինքնիշխանությանն ու տարածքային ամբողջականությանը։ Միացյալ Նահանգները պարտավորվում է օգնել Ուկրաինային զենքի երկարաժամկետ մատակարարումներով, զինվորական անձնակազմի վերապատրաստմամբ և խորհրդատվություններով։ Ընդգծելով, որ համաձայնագիրը չի նախատեսում Կոնգրեսի կողմից հաստատում՝ The Washington Post-ը նշում է, որ համաձայնագիրը կարող է ցանկացած պահի չեղյալ համարվել ԱՄՆ-ի ցանկացած հաջորդ նախագահի կողմից:

09:38 - 14 հունիսի, 2024

ԱՄՆ-ը և Ֆրանսիան աջակցում են Հարավային Կովկասում արդար և կայուն խաղաղության հաստատմանը |1lurer.am|

1lurer.am: Միացյալ Նահանգները և Ֆրանսիան աջակցում են Հարավային Կովկասում արդար և կայուն խաղաղության հաստատմանը։ Այդ մասին ասված է ԱՄՆ-ի և Ֆրանսիայի նախագահներ Ջո Բայդենի և Էմանուել Մակրոնի՝ Փարիզում կայացած բանակցությունների ավարտին հրապարակված համատեղ հայտարարության մեջ։ «Միացյալ Նահանգները և Ֆրանսիան աջակցում են Հարավային Կովկասում արդար և կայուն խաղաղության հաստատմանը` հիմնված միջազգային իրավունքի և ինքնիշխանության, սահմանների անխախտելիության և տարածքային ամբողջականության սկզբունքների վրա: Նրանք աջակցում են Հարավային Կովկասում հետագա տարածաշրջանային ինտեգրացիային՝ ի շահ տարածաշրջանի բոլոր ժողովուրդների»,- ասված է երկու երկրների ղեկավարների հայտարարության մեջ։ Հայտարարության մեջ, որն ամբողջությամբ հրապարակվել է Սպիտակ տան կայքում, անդրադարձ կա նաև միջազգային օրակարգի տարբեր թեմաների՝ Ուկրաինա, ՆԱՏՕ, Մոլդովա, Բալկանյան երկրներ, Մերձավոր Արևելք, գլոբալ անվտանգություն, կլիմայի փոփոխություններ և այլն:

12:58 - 09 հունիսի, 2024

Այսօր աշխարհում ժողովրդավարությունն ավելի մեծ վտանգի առջև է, քան երբևէ՝ Երկրորդ աշխարհամարտից հետո. Բայդեն |golosameriki.com|

golosameriki.com: v class="intro intro--bold"> ԱՄՆ նախագահ Ջո Բայդենը հանդես է եկել ելույթով՝ Երկրորդ աշխարհամարտի ժամանակ՝ 1944 թվականի հունիսի 6-ին, Ֆրանսիայի հյուսիսում՝ Նորմանդիայում արևմտյան դաշնակիցների կողմից իրականացված ափհանման գործողության՝ D-Day-ի 80-ամյակի տոնակատարություններին: Սպիտակ տան ղեկավարը ընդգծել է, որ այսօր Ուկրաինա է ներխուժել «տիրապետության ձգտող բռնակալը», և որ ներկայում ժողովրդավարությունն ավելի մեծ վտանգի առջև է, քան երբևէ՝ Երկրորդ աշխարհամարտից հետո: «Իզոլյացիոնիզմը պատասխանը չէր 80 տարի առաջ, և այսօր էլ պատախան չէ։ Մենք գլուխ չենք խոնարհի։ Չենք կարող հանձնվել ագրեսորին։ Դա աներևակայելի է։ Եթե մենք անենք այդ, մեր ազատությունը կավարտվի, ողջ Եվրոպան կհայտնվի սպառնալիքի տակ»,- Ֆրանսիայի հյուսիսային՝ Կոլվիլ-սյուր-Մեր բնակավայրում ունեցած ելույթի ժամանակ հայտարարել է Բայդենը։ ԱՄՆ նախագահն ու տարբեր երկրների ղեկավարներ հարգանքի տուրք են մատուցել Երկրորդ աշխարհամարտի ժամանակ ընկածների հիշատակին և ի պատիվ ողջ վետերանների: 80 տարի առաջ այս օրը արևմտյան դաշնակիցների մոտ 160 հազար զինվոր (որոնցից 73 հազարը ամերիկացիներ էին) ափ դուրս եկան Նորմանդիա՝ լայնածավալ գրոհ ձեռնարկելով ֆաշիստական Գերմանիայի զորքերի դեմ: Այդ օրը մարտի դաշտում զոհվեցին դաշնակիցների 4 414 զինվորներ, այդ թվում՝ 2 501 ամերիկացի։ Ավելի քան 5 հազարը վիրավորվեցին։ Երկրորդ աշխարամարտի վետերանների թիվը տարեցտարի նվազում է․ նրանցից շատերն արդեն բոլորել են իրենց 100-ամյակը, և յուրաքանչյուր տարի՝ D-Day-ին նվիրված միջոցառումներին կարելի է նկատել, որ վետերանների շարքերը նոսրանում են։ Ֆրանսիայի նախագահ Էմանյուել Մակրոնը Ֆրանսիայի բարձրագույն պարգևը՝ Պատվո լեգեոնի շքանշանը, հանձնել է 103-ամյա Քրիստիան Լամբին՝ Մեծ Բրիտանիայի ռազմածովային ուժերի կանանց ստորաբաժանման անդամին, ով օգնել է ափհանումը ծրագրելու գործում: Կոլվիլ-սյուր-Մերում տեղի ունեցած արարողության ժամանակ Մակրոնը Պատվո լեգեոնի շքանշան շնորհեց նաև ամերիկացի վետերաններին: Նրանցից շատերն անվասայլակներով էին։ «Այսօր դուք կրկին այստեղ եք՝ տանը»,- անգլերենով հայտարարել է Ֆրանսիայի նախագահը՝ հավելելով, թե իր երկիրը չի մոռանա նրանց գործը։ Ավելի վաղ նախագահ Ջո Բայդենն էր հանդիպել վետերաններին, և ԱՄՆ առաջին տիկին Ջիլ Բայդենի հետ լուսանկարվել նրանց հետ։ Նախագահը յուրաքանչյուրին նվիրել է հատուկ հուշամեդալ։ Բայդենը, Մեծ Բրիտանիայի թագավոր Չարլզ Երրորդը և Կանադայի վարչապետ Ջասթին Թրյուդոն՝ Երկրորդ աշխարմարտի ժամանակ դաշնակից տերությունների ներկայիս ղեկավարները, հարգանքի տուրք են մատուցել արևմտյան զինվորների հիշատակին, որոնք 80 տարի առաջ այս օրը ափ դուրս եկան Նորմանդիայում: «Հիշում ենք այն դասը, որը տասնամյակների ընթացքում կրկնվում է։ Ազատ ժողովուրդները պետք է միավորվեն բռնապետությանը դիմակայելու համար։ Եկեք աղոթենք, որ նման զոհաբերություն այլևս երբեք չլինի»,- ասել է Մեծ Բրիտանիայի միապետը: «Այսօր ժողովրդավարությունը տակավին վտանգված է։ Սպառնում են ագրեսորները, որոնք ցանկանում են վերագծել սահմանները»,- նշել է Կանադայի վարչապետը: Շարունակությունը՝ սկզբնաղբյուր կայքում

09:33 - 07 հունիսի, 2024

Բայդենը եռօրյա այցով ժամանել է Ֆրանսիա |tert.am|

tert.am: ԱՄՆ նախագահ Ջո Բայդենը եռօրյա այցով ժամանել է Ֆրանսիա՝ նշելու Նորմանդիայում դաշնակցային ուժերի վայրէջքի 80-ամյակը, նրա ինքնաթիռը վայրէջք է կատարել Փարիզի «Օռլի» օդանավակայանում, հաղորդում է Agence France-Presse-ը:«ԱՄՆ նախագահը վայրէջք է կատարել Փարիզի մերձակայքում գտնվող «Օռլի» օդանավակայանում: Այնտեղ նրան դիմավորել է Ֆրանսիայի վարչապետ Գաբրիել Աթալը»,- ասվում է գործակալության հաղորդագրության մեջ։Բայդենը կմասնակցի Նորմանդիայում դաշնակից զորքերի վայրէջքի կապակցությամբ հոբելյանական միջոցառումներին և երկկողմ բանակցություններ կվարի Ֆրանսիայի նախագահ Էմանուել Մակրոնի հետ Ուկրաինայի, Մերձավոր Արևելքի և կլիմայի վերաբերյալ:ԱՄՆ-ի, Մեծ Բրիտանիայի և Կանադայի զորքերի վայրէջքը Նորմանդիայում տեղի է ունեցել 1944 թվականի հունիսի 6-ին։ Դաշնակիցների կողմից գործողությանը մասնակցել է 156,000 մարդ, ընդհանուր կորուստները կազմել են մոտ 10,000 մարդ, որոնցից 2,500-ը՝ ամերիկացի զինվորներ։

13:09 - 05 հունիսի, 2024