ՀՀ առողջապահության նախարարություն

Գործադիր իշխանության հանրապետական մարմին է, որը մշակում եւ իրականացնում է առողջապահության բնագավառում ՀՀ կառավարության քաղաքականությունը։ Նախարարության ենթակայության տակ են գտնվում Առողջապահության ազգային ինստիտուտը, Դեղերի եւ բժշկական տեխնոլոգիաների փորձագիտական կենտրոնը, Հանրապետական գիտաբժշկական գրադարանը, Ստացիոնար բուժօգնություն իրականացնող կազմակերպությունները, Առաջնային բուժօգնություն իրականացնող կազմակերպությունները, այլ կազմակերպություններ։

ՀՀ առողջապահության նախարարն է Անահիտ Ավանեսյան, տեղակալներն են՝ Լենա Նանուշյանը, Գեւորգ Սիմոնյանը, Արտյոմ Սմբատյանը։

Մենք պետք է հետևենք զարգացած երկրների օրինակին, որտեղ դոնորության ցուցանիշը 80%-ից ավելի է. Ավանեսյան

Մենք պետք է հետևենք զարգացած երկրների օրինակին, որտեղ դոնորության ցուցանիշը 80%-ից ավելի է. Ավանեսյան

Առողջապահության նախարարությունից տեղեկացնում են, որ Արյան դոնորի միջազգային օրվա կապակցությամբ, արյուն են հանձնել առողջապահության նախարար Անահիտ Ավանեսյանը, նախարարի առաջին տեղակալ Լենա Նանուշյանը, «Յոլյան» արյունաբանության կենտրոնի տնօրեն Հայկ Գրիգորյանը: Ակցիային միացել են նաև տարբեր գերատեսչությունների աշխատակիցներ, միջազգային կազմակերպությունների ներկայացուցիչներ, բազմաթիվ քաղաքացիներ և օտարերկրացիներ: Անահիտ Ավանեսյանը զրուցել է նաև ԶԼՄ ներկայացուցիչների հետ և նշել, որ երկրի արյան պաշարները համալրելու կարիք միշտ կա, իսկ արյուն տալով` ոչ միայն կյանք ենք փրկում, այլև արյունատվությունը բարենպաստ ազդեցություն է թողնում օրգանիզմի վրա: «Մենք պետք է հետևենք զարգացած երկրների օրինակներին, որտեղ անվարձահատույց դոնորության ցուցանիշները շատ բարձր են` 80%-ից ավելի: Արյունատվության մշակույթը պետք է նոր մակարդակի հասցնենք, ինչին կնպաստի Արյան բանկի նոր շենքի կառուցումը` ժամանակակից լաբորատոր ու բժշկական սարքերով»,- նշել է նախարարը: Անահիտ Ավանեսյանը շնորհակալություն է հայտնել բոլոր դոնորներին` ժամանակ հատկացնելու և մարդասիրական քայլ կատարելու համար:
19:37 - 14 հունիսի, 2024
Ոստիկանությունը գործել է իրավաչափ, տուժած 8 անձ դեռ հիվանդանոցում է․Ավանեսյան
 |arm.sputniknews.ru|

Ոստիկանությունը գործել է իրավաչափ, տուժած 8 անձ դեռ հիվանդանոցում է․Ավանեսյան |arm.sputniknews.ru|

arm.sputniknews.ru: ԱԺ-ի մոտ հունիսի 12-ին բախումների հետևանքով տուժած 8 անձ հիվանդանոցում է։ Կառավարության նիստից հետո լրագրողների հետ զրույցում ասաց ՀՀ առողջապահության նախարար Անահիտ Ավանեսյանը։ «Վիրահատված պացիենտի վիճակը բավարար է գնահատվում, մյուսներն էլ, կարծում եմ, այս 1-2 օրվա մեջ դուրս կգրվեն»,- ասաց նախարարը՝ նշելով, որ դեռևս տուժածներին չի այցելել, բայց պատրաստվում է։ Պատասխանելով լրագրողների հարցերին, թե ինչպես է գնահատում ոստիկանության գործողությունները՝ հաշվի առնելով տուժածների, այդ թվում՝ վնասվածքներ ստացած լրագրողների թիվը, Ավանեսյանը նշեց՝ ոստիկանությունը համաչափ է գործել։ «Կարծում եմ՝ ոստիկանությունը գործել է իրավաչափ, համաչափ և իրականացրել է իր պարտքը՝ պաշտպանելու հասարակական կարգը Հայաստանում։ Այո՛, երբ որ ցուցարարները չեն պահպանում հասարակական կարգը, օրինապահ չեն, այո, ոստիկանությունն ուժ կիրառող կառույց է»,- ասաց Ավանեսյանը։
11:35 - 14 հունիսի, 2024
Գազալցակայանի պայթյունից տուժածներից 2-ի վիճակը մնում է ծայրահեղ ծանր. նախարարը մանրամասներ հայտնեց
 |tert.am|

Գազալցակայանի պայթյունից տուժածներից 2-ի վիճակը մնում է ծայրահեղ ծանր. նախարարը մանրամասներ հայտնեց |tert.am|

tert.am: Երևան-Սևան ավտոճանապարհին  գազալցակայանի պայթյունի հետևանքով տուժածներից 2–ի վիճակը շարունակում է մնալ ծայրահեղ ծանր, 4–ի մոտ դրական դինամիկա կա: Այս մասին հայտնեց Առողջապահության նախարար Անահիտ Ավանեսյանը ԱԺ–ում կառավարության հետ հարցուպատասխանին:  Պայթյունի հետևանքով տուժել է 7 քաղաքացի, մեկն այդ օրը ստացել է անհրաժեշտ բուժօգնությունն ու դուրս է գրվել:  «Հոսպիտալացվել է 6 հոգի, նրանցից երկուսը ծայրահեղ ծանր վիճակում են ընդունվել, հետազոտվել են ու ստանում են համապատասխան վերակենդանացման բաժանմունքում բուժօգնությունը: Նրանց վիճակը շարունակում է մնալ ծայրահեղ ծանր, մյուս 4 հոգունը միջին ծանրության է: Վերջին 2 օրվա ընթացքում նրանց բուժման առումով ունենք դրական դինամիկա, ինչը ուրախալի է»,–ասաց Ավանեսյանը:   Երևան-Սևան ավտոճանապարհի թիվ 6/1 հասցեում՝ «Գազ օիլ» ՍՊԸ-ի գազաբենզալցակայանում, պայթել էր հեղուկ գազի ցիստեռն, ինչի հետևանքով հրդեհ էր բռնկվել:  
19:42 - 12 հունիսի, 2024
Պայթյnւնից տուժած 2 պացիենտի վիճակը ծայրահեղ ծանր է, ստացել են 60 տոկոս այրվածք. «Այրվածքաբանության և մաշկաբանության ազգային կենտրոն»-ի տնօրեն

Պայթյnւնից տուժած 2 պացիենտի վիճակը ծայրահեղ ծանր է, ստացել են 60 տոկոս այրվածք. «Այրվածքաբանության և մաշկաբանության ազգային կենտրոն»-ի տնօրեն

«Այրվածքաբանության և մաշկաբանության ազգային կենտրոն» երեկ տեղափոխվել է 7 այրվածքով պացիենտ, որոնցից մեկի վիճակը թեթև է եղել, ամբուլատոր սպասարկվել է և գնացել տուն։ 4-ի վիճակը գնահատվում է միջին ծանրության կայուն, նրանք գտնվում են բաժանմունքում, ստանում են անհրաժեշտ բուժում Ունեն մոտավոր 20-25 տոկոս մակերեսի այրվածք և մոտավորապես 2-րդ աստիճանի խորություն։ Այս մասին լրագրողների հետ զրույցում ասաց Կենտրոնի տնօրեն Հովհաննես Հովհաննիսյանը։ «Երկուսի վիճակը գնահատվում է ծայրահեղ ծանր, նրանք գտնվում են վերակենդանացման բաժանմունքում և պայքար է գնում կյանքի համար։ Վերակենդանացման բաժանմունքում գտնվող բուժառուների մոտ  ունենք 60 տոկոս այրվածք՝ այդ թվում նաև թոքային հյուսվածքի վնասում։ Ունենք 3-րդ, 4-րդ աստիճանի խորություն, անգամ ածխացման նշաններ կան, ծայրահեղ ծանր է նրանց վիճակը»,- ասաց նա։ Նա հավելեց, որ ծանր վիճակում գտնվող պացիենտների մոտ գրեթե ամբողջությամբ այրված է մեջքը և վերջույթները։ «Ծանր վիճակում գտնվողները շոկային վիճակում են, դրա համար մենք միջամտում ենք, որ անջատենք իրենց գիտակցությունը, որ ցավային ռեակցիան շատ արտահայտված չլինի: Նման պացիենտների անգամ վիրակապությունը չափազանց ծանր  միջամտություն է: Մենք դրան վիրահատություն ենք ասում, և անգամ հնարավոր է ընդհանուր նարկոզով դա արվի»,-ասաց նա: Նրա խոսքով՝ կարևոր է վիճակի փոփոխությունը 5-7-րդ օրը և 7-10-րդ օրը, երբ թունավորումը հասնում է իր մաքսիմալ աստիճանին: Այս օրերին մենք սպասում ենք պացիենտի վիճակի վատացում: Այս պահին գնահատել, թե ինչ է լինելու, չենք կարող: Նա նաև հավելեց, որ տուժածներից 6-ը միջին տարիքի տղամարդիկ են, մեկը՝ կին, որը ծայրահեղ ծանր վիճակում գտնվողներից մեկի կինն է: Նա դուրս է գրվել, դրսում է:
15:03 - 07 հունիսի, 2024
ԱՆ-ն նոր տվյալներ է հաղորդել պայթյունի հետևանքով տուժած քաղաքացիների առողջական վիճակի մասին

ԱՆ-ն նոր տվյալներ է հաղորդել պայթյունի հետևանքով տուժած քաղաքացիների առողջական վիճակի մասին

Երևան֊Սևան ճանապարհին տեղի ունեցած պայթյունի հետևանքով հոսպիտալացված տուժածներից երկուսը շարունակում են մնալ վերակենդանացման բաժանմունքում, առողջական վիճակը` ծայրահեղ ծանր։ Մյուս չորս բուժառուի մոտ նկատվում է դրական դինամիկա։ Այս մասին հայտնում են ՀՀ առողջապահության նախարարությունից։ Բժիշկների գնահատմամբ՝ նրանց առողջական վիճակը գնահատվում է միջին ծանրության. շարունակում են ստանալ համարժեք բուժօգնություն։ Հիշեցնենք, որ երեկ երեկոյան պայթյուն է տեղի ունեցել Երևան-Սևան ավտոճանապարհի թիվ 6/1 հասցեում՝ «Գազ օիլ» ՍՊԸ-ի գազաբենզալցակայանում, նախնական տվյլաներով պայթել է հեղուկ գազի ցիստեռն, ինչի հետևանքով հրդեհ է բռնկվել: Պայթյունի հետևանքով «Սուրբ Գրիգոր Լուսավորիչ» ԲԿ են տեղափոխվել Կ․ Ս․-ն (ծնված 1980 թ․) և Գ․ Չ․-ն (ծնված 1991 թ․), այնուհետև՝ տեղափոխվել «Այրվածքաբանության ազգային կենտրոն» ՓԲԸ, որտեղ բժիշկները նրանց առողջական վիճակը գնահատել են ծանր։ Աբովյանի ԲԿ են տեղափոխվել Լ․ Հ․-ն (ծնված 2007 թ․), Հ․ Խ․-ն (ծնված 2001 թ․), Մ․ Գ․-ն (ծնված 1989 թ․), Ա․ Ա․-ն (ծնված 1990 թ․) և Լ․ Ս․-ն (ծնված 1963 թ․). Լ. Հ․-ն ստացել է համապատասխան բուժօգնություն և դուրս գրվել, իսկ մյուսները տեղափոխվել «Այրվածքաբանության ազգային կենտրոն» ՓԲԸ:  
08:46 - 07 հունիսի, 2024
Չորս տարիների ընթացքում առողջապահության բյուջեն կրկնապատկվել է․ Ավանեսյան

Չորս տարիների ընթացքում առողջապահության բյուջեն կրկնապատկվել է․ Ավանեսյան

Առողջապահության նախարար Անահիտ Ավանեսյանը մասնակցել է Կանանց միջազգային ասոցիացիայի (AIWA) 9-րդ միջազգային համաժողովին:   Կանանց ներգրավվածությունը, խթանումը կարևորելով առողջապահական, կրթական, սոցիալական և տնտեսական ոլորտում` համաժողովը մեկ հարթակում համախմբել էր պետական և հասարակական կառույցների ներակայացուցիչներին` երկխոսության կամուրջ ստեղծելու նպատակով:   Նախարար Անահիտ Ավանեսյանը ներկայացրել է առողջապահական այն ծրագրերը, որոնք ուղղված են կանանց առողջության պահպանմանը, մոր և մանկան առողջությանը, հիվանդությունների կանխարգելմանը: «Այս չորս տարիների ընթացքում առողջապահության բյուջեն կրկնապատկվել է: Այն բոլոր փոփոխությունները, որոնք արվել են համակարգում, բավականին փոխել են պատկերը, բայց դա, իհարկե, բավարար չէ. առողջության համապարփակ ապահովագրության համակարգի ներդրմամբ, կընդլայնվի երեխաների և կանանց տրամադրվող կանխարգելիչ ծառայությունների ծավալը»,-նշել է Անահիտ Ավանեսյանը: Նա անդրադարձել է նաև կանանց վերարտադրողական առողջության իրավունքին և ներկայացրել անպտղության հաղթահարման ծրագրի ներդրման և ընդլայնման ընթացքը և արդյունքները: Նախարարին ուղղված հարցերից էր նաև, թե որոնք են կանանց առողջությանը վնասող և հիվանդացության պատճառ հանդիսացող ռիսկի գործոնները: Ոլորտի պատասխանատուն ներկայացրել է մարզերում իրականացվող կրծքագեղձի քաղցկեղի սքրինինգային անվճար ծրագիրը, արգանդի պարանոցի քաղցկեղի կանխարգելիչ միջոցառումները, ակտիվ շարունակվող առողջ ապրելակերպին և առողջ ծերացմանն ուղղված հանրային արշավները, որոնց նպատակը նաև կենսաձևի փոփոխությամբ` առողջության նոր մշակույթի ձևավորումն է:
21:12 - 31 մայիսի, 2024
Զոհված զինծառայողների ծնողների համար վերարտադրողական օժանդակ տեխնոլոգիաներից օգտվելու տարիքային շեմը կբարձրացվի
 |armenpress.am|

Զոհված զինծառայողների ծնողների համար վերարտադրողական օժանդակ տեխնոլոգիաներից օգտվելու տարիքային շեմը կբարձրացվի |armenpress.am|

armenpress.am: Պետության աջակցությամբ վերարտադրողական օժանդակ տեխնոլոգիաներից օգտվելու իրավունք ունեցող անձանց տարիքային առավելագույն շեմը կվերանայվի: Այս մասին հայտնեց Առողջապահության նախարար Անահիտ Ավանեսյանը ԱԺ մշտական հանձնաժողովների համատեղ նիստում «Հայաստանի Հանրապետության 2023 թվականի պետական բյուջեի կատարման մասին» տարեկան հաշվետվության նախնական քննարկմանը: Ֆինանսավարկային և բյուջետային հարցերի մշտական հանձնաժողովի նախագահ Ծովինար Վարդանյանը հիշեցրեց, որ 44–օրյա պատերազմում զավակներին կորցրած ծնողները պետության աջակցությամբ կարողանում են վերարտադրողական ժանդակ տեխնոլոգիաների կիրառմամբ երեխա ունենալ: Սակայն պատգամավորը նկատել է, որ ծրագրից օգտվելու համար սահմանված տարիքային շեմի հետ կապված դժգոհություն կա: «Պետության կողմից այս կարիքին արագ արձագանքելու շնորհիվ հնարավոր եղավ բազմաթիվ ընտանիքներին զավակ ունենալու բերկրանքը պարգևել: Այո, մենք ունենք ծնողներ, որոնք լինելով օրենքով սահմանված տարիքային շեմի մեջ, փորձել են, բայց, ցավոք սրտի, չի ստացվել: Հիմա ունենք պահանջ՝ վերանայելու այդ տարիքային շեմը», - ասաց Ավանեսյանը: Նախարարը հայտնեց, որ պատգամավոր Նարեկ Զեյնալյանի հետ երկար քննարկումների արդյունքում նախաձեռնվել է օրենսդրական փոփոխություն: Տարիքային շեմի վերանայման նախագիծը շրջանառության մեջ է: Նախարարը հուսով է, որ շուտով արդեն կքննարկվի Ազգային ժողովում: «Հուսով եմ, որ առաջիկայում կընդունվի, և 53 տարեկանի շեմը կվերանայվի և ներառյալ 55–ը կսահմանվի որպես տարիքային շեմ», - ասաց Ավանեսյանը: Ըստ նրա՝ տվյալ օժանդակ տեխնոլոգիաների կիրառումը նաև որոշակի ռիսկեր է պարունակում կնոջ ու ապագա զավակի համար: Այս բոլոր մասնագիտական նրբությունները հաշվի առնելով՝ եզրահանգել են, որ կսահմանեն 55 տարեկանի շեմը:
16:45 - 30 մայիսի, 2024