Մոտ 50 հայ ուսանող ուրբաթ առավոտյան հավաքվել էր Անենբերգ սրահի մոտ՝ բողոքելու Հարավային Կալիֆորնիայի համալսարանի որոշման դեմ՝ ԱՄՆ-ում Թուրքիայի դեսպան Հասան Մուրատ Մերջանի մասնակցությամբ միջոցառում կազմակերպելու համար:
Դահլիճում հայ ուսանողներից մեկը ոտքի է կանգնել՝ բարձրացնելով Հայաստանի դրոշը և պահանջել է դադարեցնել միջոցառումը։ Ոստիկանները նրան դուրս են ուղեկցել, իսկ մյուս ուսանողները սկսել են վանկարկել «Ամո՛թ USC-ին (Հս․ Կալիֆորնիայի համալսարան)» և «1915-ը կրկնվում է»։
Համալսարանի՝ միջոցառումը հյուրընկալելու որոշումը դժգոհություն էր առաջացրել դեռ օրեր առաջ: Երեքշաբթի օրը համալսարանի Հայ ուսանողների ասոցիացիան Instagram-ում հայտարարություն էր տարածել՝ նշելով, որ Մերջանը «հայտնի է Հայոց ցեղասպանության ժխտման Թուրքիայի քաղաքականությունն ուղղակիորեն պաշտպանելու համար»:
«Արտաքին դիվանագիտության մեջ կամ համալսարանում ցեղասպանության քաղաքականությունը տեղ չունի»,- նշվում էր հրապարակման մեջ։
Ուսանողները որոշ ժամանակ փակել էին սրահի բոլոր մուտքերը, ինչի հետևանքով թուրք դիվանագետը չի կարողացել դուրս գալ այնտեղից, չնայած միջոցառումը ավարտված է եղել։
Ըստ համացանցում տարածված տեսանյութերի՝ համալսարանի անվտանգության աշխատակիցները ուժ կիրառելով հեռացրել են ուսանողներին ու բացել մուտքերը։
comment.count (0)