Ճամբարակի համայնքապետ Վազգեն Ադամյանին առնչվող «Շինտեխնիկա» ՍՊԸ-ն մասնակցում և հաղթում է նույն համայնքի գնումներում։ Իսկ համայնքապետի հայրը չի հայտարարագրել իրեն պատկանող շինտեխնիկան, որը վարձակալությամբ տվել է այդ ընկերությանը։

Մինչև վերջերս Ճամբարակի համայնքապետ Վազգեն Ադամյանի պաշտոնական կենսագրության մեջ կարող էիք կարդալ, որ նա 2014 թ․ հիմնադրել է  «Շինտեխնիկա» ՍՊԸ-ն։ Համայնքապետի հիմնադրած ընկերությունը ակտիվ մասնակցում և հաղթում է Ճամբարակի պետական գնումներում։ Վերջին 6 տարում համայնքապետարանն ընկերության հետ կնքել է ավելի քան 479 մլն դրամի 19 պայմանագիր:

2018 թվականից սկսած՝ «Շինտեխնիկա» ՍՊԸ-ն Ճամբարակում իրականացրել է համայնքի բնակավայրերի ճանապարհների հարթեցման, փոսալցման, մանկապարտեզներից մեկի վերանորոգման, ջրամբարների նորոգման և նոր ջրագծի կառուցման, ներքին ցանցի ջրամատակարարման համակարգի վերակառուցման և շինարարական այլ աշխատանքներ։  

Ըստ գնումների էլեկտրոնային համակարգի տվյալների՝ 2018-2024 թթ․ ընթացքում  Ճամբարակի համայնքապետարանը իրականացրել է 195 գնման ընթացակարգ, որից 41-ին «Շինտեխնիկա» ՍՊԸ-ն հայտ է ներկայացրել, իսկ 19-ում ճանաչվել հաղթող մասնակից։ Միևնույն ժամանակ, համակարգի «Պայմանագրեր» բաժնում հրապարակված է սույն ընկերության և Ճամբարակի համայնքապետարանի միջև կնքված ընդամենը 7 պայմանագիր։

Համայնքապետարանից խնդրել էինք տրամադրել չհրապարակված պայմանագրերը։ Մեր հարցմանն ի պատասխան՝ համայնքապետարանից նշել են․

«Տեխնիկական պայմաններից ելնելով՝ «Շինտեխնիկա» ՍՊԸ-ի հետ կնքված պայմանագրերի մի մասը դեռևս չի տեղադրվել www.armeps.am  համակարգում, որի գործընթացը ընթացքի մեջ է։ Ինչ վերաբերում է նշված 14 ծածկագրերով մրցույթների պայմանագրերը տրամադրելու վերաբերյալ, ապա դրանց, ծավալուն լինելու պատճառով, կարող եք ծանոթանալ Ճամբարակի համայնքապետարանում»։

«Գնումների մասին» օրենքի համաձայն՝ գնման պայմանագիր կնքելուց յոթ աշխատանքային օրվա ընթացքում պատվիրատուն գնման գործընթացի մասին լիազորված մարմին է ներկայացնում հաշվետվություն: Ֆինանսների նախարարությունից մեզ հայտնեցին, որ այդ հաշվետվությունը ենթադրում է նաև, որ պայմանագրերը պետք է գնումների էլեկտրոնային համակարգ ներբեռնվեն։ 

Համայնքապետարանը «Շինտեխնիկա» ՍՊԸ-ի հետ վերջին անգամ պայմանագիր է կնքել այս տարվա սեպտեմբերի 20-ին՝ 61․2 մլն դրամով։ Ըստ պայմանագրի՝ «Շինտեխնիկա» ՍՊԸ-ն «Վիռա» ՍՊԸ և Ճամբարակի ՃՇՇՁ-ի հետ համատեղ պետք է իրականացնի Ճամբարակ քաղաքի Նժդեհ փողոցի սկզբնամասում գտնվող հենապատի և փլված կամուրջի վերանորոգման աշխատանքներ։ 

«Վիռա» ՍՊԸ-ի հիմնադիրը Ճամբարակի համայնքի ավագանու նախկին անդամ Թաթուլ Դումանյանն է։ Նրա մահվանից հետո ընկերության հավատարմագրային կառավարումն իրականացնում է կինը՝ Նարինե Հարությունյանը։ 

Այս ընկերությունն էլ 2018-2024 թթ․ մասնակցել է համայնքի իրականացրած գնման 195 ընթացակարգերից 25-ին, որոնցից 12-ում հաղթող է ճանաչվել՝ կնքելով ընդհանուր մոտ 250 մլն դրամի պայմանագրեր։

Համայնքապետը չի էլ հիշում՝ ում է օտարել ընկերությունը. ենթադրում է Ճամբարակի աշխատակազմի քարտուղարը

«Շինտեխնիկա» ՍՊԸ-ն ստեղծվել է 2013 թվականի սեպտեմբերի 6-ին։ Այժմ միակ մասնակիցը և տնօրենը Նվեր Նադարյանն է։ Ոչ կազմակերպության նախկին մասնակիցների,  ոչ իրական շահառուների ցանկում Ճամբարակի համայնքապետ Վազգեն Ադամյանի անունն առկա չէ։

Ճամբարակի համայնքապետարանի աշխատակազմի քարտուղար Արտակ Ստեփանյանը նշեց, որ այդ ընկերությունը կապ չունի համայնքապետի հետ։

Հարցին, թե այդ դեպքում ինչու է համայնքապետն իր կենսագրական տվյալներում նշել, որ հիմնադրել է մի ընկերություն, որի հետ կապ չունի, աշխատակազմի քարտուղարը պատասխանեց․ 

«2017 թվականից, ինչ համայնքի ղեկավար է ընտրվել, միգուցե դրանից առաջ հիմնադրել է, բայց դրանից հետո փոխկապակցված չի եղել, միգուցե օտարել է, բայց փայ ու մասնաբաժին չունի ընտրվելուց հետո։ Ինքը երբեք էլ ընկերության իրական շահառու չի հանդիսացել, ընկերության տվյալներում գործադիր տնօրեն, մասնակիցներ, բոլորն այլ մարդիկ են, հաշվետվություններում էլ կարող եք տեսնել։ Դե, հավանաբար, օտարել է ընկերությունը և դրանից հետո նույնիսկ չի էլ հիշում, թե ում է օտարել, ընդամենը հիմնադրել է, և դրանից հետո որևէ փոխկապակցվածություն չունի ընդհանրապես»։

Աշխատակազմի քարտուղարի հետ զրույցից հետո, համայնքապետի՝ ընկերություն հիմնադրելու մասին տեղեկությունը հեռացվեց կայքից։

Ճամբարակի համայնքապետի պաշտոնական կենսագրության մեջ տեղի ունեցած փոփոխությունը տեսնելու համար գծիկը տեղաշարժեք ձախ, այնուհետև աջ։

Ավելի ուշ՝ սեպտեմբերի 11-ին, այս թեմային առնչվող մեր գրությանը պատասխանեց ինքը՝ համայնքապետ Վազգեն Ադամյանը.

«Ճամբարակ համայնքի պաշտոնական կայքում նշված գրառումը, որ իբրև ես եմ հիմնադրել «Շինտեխնիկա» ՍՊԸ-ն, իրականության հետ կապ չունի: Կատարված գրառումը տեխնիկական սխալի արդյունք է եղել, որը հետագայում շտկվել է»։

Նշենք, որ նույն «տեխնիկական սխալը» կարծես թե ի հայտ է եկել նաև Գեղարքունիքի մարզպետարանի պաշտոնական կայքում, քանի որ համայնքապետի՝ ընկերություն հիմնադրելու մասին տեղեկությունն առկա է նաև մարզպետարանի կայքի՝ «Ճամբարակ խոշորացված համայնքի ղեկավարի մասին» ենթաբաժնում։

Բացի համայնքի պաշտոնական կայքում տեղադրված, իսկ հետո հեռացված տեղեկությունից՝ համայնքապետի և «Շինտեխնիկա» ՍՊԸ-ի միջև կապի մասին է փաստում ևս մի հանգամանք։

Հրապարակային ծանուցումների պաշտոնական կայքում՝ azdarar.am-ում, առկա է համայնքապետի հոր՝ Արարատ Ադամյանին սեփականության իրավունքով պատկանող շինարարական մեքենայի տեխանձնագրի կորստի մասին մի հայտարարություն։

«2022 թվականի սեպտեմբերին Վազգեն Ադամյանի հոր՝ Արարատ Ադամյանին պատկանող էքսկավատորը Վարդենիսում մնում է ադրբեջանցիների վերահսկողության տակ անցած տարածքում  և այդպես էլ կորում է»,- մեզ հետ զրույցում պատմեց Ճամբարակի համայնքապետարանի աշխատակազմի քարտուղար Արտակ Ստեփանյանը։

Հայտարարության մեջ նշված է Վազգեն Ադամյանի հոր բնակության հասցեն (համընկնում է համայնքապետի բնակության հասցեին), հեռախոսահամարը և  [email protected] էլ․հասցեն։ 

Այս նույն էլ. հասցեն նշված է նաև Ճամբարակ համայնքի գնումներին «Շինտեխնիկա» ՍՊԸ-ի ներկայացրած 3 հայտերում։

Մեր հարցին, թե ինչպես է ստացվել, որ նույն էլեկտրոնային հասցեն կիրառում են թե՛ իր հայրը, թե՛ «իր հետ կապ չունեցող» ընկերությունը, համայնքապետը պատասխանեց․

«Իմ հորը՝ Արարատ Ադամյանին պատկանող շինարարական տեխնիկայի տեխանձնագրի կորստյան վերաբերյալ հայտարարության մեջ նշված էլփոստի հասցեն նշված է «Շինտեխնիկա» ՍՊԸ-ի հասցեն, քանի որ նախկինում տվյալ տեխնիկան վարձավճարով շահագործվել է «Շինտեխնիկա» ՍՊԸ-ի կողմից»:

Վազգեն Ադամյանին խնդրեցինք տրամադրել ընկերությանը տրամադրված շինտեխնիկայի վարձակալության պայմանագրերը։ Համայնքապետը պատասխանեց, որ իր հորը պատկանող տեխնիկան «Շինտեխնիկա» ՍՊԸ-ին վարձակալությամբ տրամադրվել է շուրջ 8 տարի առաջ, և այժմ հնարավոր չէ ճշտել՝ այդ շինտեխնիկան ինչ գումարի դիմաց է աշխատել և ինչքան ժամանակով, որովհետև փաստաթղթերը չեն պահպանվել։

Հատկանշական է, որ նշված շինտեխնիկան համայնքապետի հայրը չի հայտարարագրել 2022 թվականի իր տարեկան հայտարարագրում, իսկ  2021 թվականի հայտարարագիրը նա չի ներկայացրել։ 

Համայնքապետի հայրը իր տարեկան եկամուտները գերազանցող արժեքով ավտոմեքենա է գնել

Ճամբարակի համայնքապետի հայրը՝ Արարատ Ադամյանը, 2023 թվականին 8 մլն դրամ արժողությամբ  Տոյոտա մակնիշի ավտոմեքենա է գնել՝ տարվա ընթացքում ունենալով ընդամենը 2․6 մլն դրամ եկամուտ։ Արարատ Ադամյանը 2023 թվականի դրությամբ չի ունեցել նաև բանկային ավանդներ և այլ դրամական միջոցներ։ Այսինքն՝ նրա գնման 6.4 մլն դրամը հայտարարագրված եկամուտներով չի հիմնավորվում։ Համայնքապետ Վազգեն Ադամյանին հարցրինք, թե ինչպես է իր հայրը գնել ավտոմեքենա, որն, ըստ վերջինիս հայտարարագրած եկամտի, չէր կարող գնել։

Համայնքապետը պատասխանեց, որ ավտոմեքենայի արժեքի մեծ մասը վճարվել է իր գործարար եղբոր՝ Պավլիկ Ադամյանի կողմից, իսկ մի մասը ընտանիքի՝ նախկին տարիներից գոյացած խնայողությունների հաշվին։ 

Սակայն նախկին տարիների խնայողությունները, եթե չեն ծախսվել և առկա են եղել նաև 2023 թվականին, պետք է արտահայտված լինեին Վազգեն Ադամյանի և նրա ընտանիքի անդամների հայտարարագրերում՝ բանկային հաշիվների մնացորդների, առկա կանխիկի, բանկային ավանդների կամ հանձնված փոխառությունների ձևով։

Մենք ուսումնասիրեցինք նաև Վազգեն Ադամյանի, նրա կնոջ և մոր 2023 թվականի տարեկան հայտարարագրերը, որտեղ վերոնշյալ դաշտերում հայտարարագրված միջոցներ առկա չէին։ 

Ավելին՝ համայնքապետի եղբոր՝ ավտոմեքենայի համար վճարած գումարը պետք է արտացոլված լիներ համայնքապետի հոր՝ Արարատ Ադամյանի 2023 թվականի հայտարարագրի եկամուտներում՝ որպես որդուց ստացած նվիրատվություն։ Նման նշում, սակայն, հայտարարագրում առկա չէ։

Նշենք նաև, որ համայնքապետի ընտանիքի անդամները չեն ներկայացրել մի շարք հայտարարագրեր։ 

Կոռուպցիայի կանխարգելման հանձնաժողովը, մեր հարցման հիման վրա իրականացրած ուսումնասիրության արդյունքում հայտնաբերելով օրենքով սահմանված կարգով և ժամկետում հայտարարագրեր չներկայացնելու փաստեր՝ գրավոր ծանուցումներ է ուղարկել Վազգեն Ադամյանին և նրա ընտանիքի անդամներին։ Ըստ դրանց՝ Վազգեն Ադամյանը և նրա ընտանիքի անդամները չեն ներկայացրել 6 հայտարարագիր։

Ծանուցումներից հետո ևս հայտարարագրերը չեն ներկայացվել, ինչի արդյունքում Հանձնաժողովի Հայտարարագրերի վերլուծության վարչության կողմից 2024 թվականի հոկտեմբերի 15-ին կազմվել են վարչական իրավախախտման վերաբերյալ արձանագրություններ և փոխանցվել Վարույթների և իրավական ապահովման վարչություն՝ գործի հետագա ընթացքը լուծելու նպատակով:

Սուսինա Խաչատրյան