shantnews.am: ԱՄՆ Ներկայացուցիչների պալատի դատական հարցերի հանձնաժողովը, որում դեմոկրատները մեծամասնություն են, հրապարակել է ԱՄՆ նախագահ Դոնալդ Թրամփին իմպիչմենտի ենթարկելու վերաբերյալ ամբողջական զեկույցը, հաղորդել է «ՌԻԱ Նովոստին»:

658 էջանոց թղթում հանձնաժողովի անդամները սահմանում են նախագահին իմպիչմենտի ենթարկելու իրավական հիմքերը, մեղադրում են Թրամփին՝ լիազորությունները չարաշահելու և Կոնգրեսի աշխատանքները խոչընդոտելու համար:

Զեկույցում նշվում է, որ Թրամփի գործողությունները «խաթարում են Սահմանադրությունը»: Նաև փաստաթղթի հեղինակները պնդում են, որ գործող նախագահի պահվածքը «շարունակում է վտանգել ազգային անվտանգությունն ու ընտրությունների արդարությունը»:

Այդ կապակցությամբ հանձնաժողովի անդամները Ներկայացուցիչների պալատից պահանջում են զեկույցը համարել հրատապ հարց:

Նախատեսվում է, որ Ներկայացուցիչների պալատում իմպիչմենտի վերաբերյալ քվեարկությունը տեղի կունենա այս շաբաթ: Եթե իմպիչմենտը հայտարարվի քվեարկության արդյունքներից հետո, գործը կդիտարկվի սենատորների կողմից։ Թրամփին իշխանությունից հեռացնելու համար կպահանջվի Սենատի ձայների երկու երրորդը: Նշվում է, որ Սենատի տեղերի մեծ մասը զբաղեցնում են հանրապետականները, ովքեր մտադրություն չունեն պաշտոնից հեռացնելու ԱՄՆ ներկայիս նախագահին։