Դոնալդ Թրամփը երեկ երդվեց՝ պաշտոնապես ստանձնելով Միացյալ Նահանգների 47-րդ նախագահի պաշտոնը նոյեմբերին կայացած ընտրություններում վճռական քամբեքից հետո։
Երդմնակալության 29 րոպեանոց ելույթում Թրամփը խոստացավ վերականգնել ամերիկյան երազանքը՝ միաժամանակ զգուշացնելով նախորդ վարչակազմի թողած, իր նկարագրությամբ, քաոսի և ավերածությունների մասին: BBC-ն հայտնել է Թրամփի ելույթի կարևոր հատվածները, որը ներկայացնում ենք ստորև.
«Ամերիկայի ոսկեդարը»
Թրամփն իր ելույթը սկսեց դրական նոտայով:
«Ամերիկայի ոսկեդարը մեկնարկում է հենց հիմա: Այսօրվանից հետո մեր երկիրը կծաղկի և հարգանքի կարժանանա»,- հայտարարեց նա:
Նախագահը խիստ գնահատական տվեց այսօրվա Ամերիկային՝ այն ներկայացնելով որպես «ծայրահեղ և կոռումպացված կառույց», որը «չի կարող կառավարել նույնիսկ սովորական ճգնաժամը տանը»՝ նկատի ունենալով Լոս Անջելեսում բռնկված հրդեհները:
«Մենք այլևս թույլ չենք տա, որ մեզ շահագործեն»,- ասաց Թրամփը:
Քաղաքական քայլերի երկար ցանկը
Նախագահները հակված են իրենց երդմնակալության ելույթը որպես հնարավորություն օգտագործել՝ միասնության կոչ անելու, մեծ ու վեհ խոստումներ տալու, ինչպես նաև իրենց քաղաքականության մանրամասները ներկայացնելու համար:
Բայց ոչ Դոնալդ Թրամփը:
Հանրապետական նախագահը միանգամից կոնկրետ կետեր ներկայացրեց՝ անցնելով քաղաքական խոստումների և գործողությունների ամբողջական ցանկի վրայով, որը պատրաստվում է իրականացնել առաջին 100 օրվա ընթացքում:
Թրամփը հայտնեց, որ արտակարգ դրություն է հայտարարելու երկրի հարավային սահմանին (նույնը արել է 2019-ին) և զորքեր է տեղակայելու ներգաղթը հսկելու համար, ինչը խոստացել էր քարոզարշավի ժամանակ:
Նա նաև հայտարարեց, որ հատուկ հրաման է ստորագրելու՝ «անհապաղ դադարեցնելու գրաքննությունը և հետ բերելու ազատ խոսքն Ամերիկայում»:
«Փրկված Աստծով»
Թրամփը վերադարձրեց բոլորին նախագահական ամենաքաոտիկ և բուռն քարոզարշավի երևի ամենաշոկային պահ՝ իր դեմ մահափորձ:
«Նրանք, ովքեր ցանկանում են կանգնեցնել մեր գործը, փորձել են խլել իմ ազատությունը ու նույնիսկ իմ կյանքը»,- ասաց նա:
«Մի քանի ամիս առաջ Փենսիլվանիայի գեղեցիկ դաշտում մարդասպանի գնդակն անցավ ականջիս միջով, բայց ես հետո զգացի և հիմա ավելի շատ եմ հավատում, որ իմ կյանքը ինչ-որ պատճառով է փրկվել»,- ասաց նա՝ ընդգծելով. «Ինձ փրկել է Աստված՝ Ամերիկան նորից ավելի մեծ դարձնելու համար»:
Մարսը և Պանամայի ջրանցքը
Թրամփը հայացք գցեց նաև դեպի արտաքին աշխարհ՝ խոստանալով դրամատիկ գործողություններ Ամերիկայից դուրս, ինչպես նաև երկնքում:
Նա նշեց, որ ինքը ցանկանում էր, որ Պանամայի ջրանցքը լինի ԱՄՆ վերահսկողության տակ՝ սխալմամբ պնդելով, որ ներկայումս այն ղեկավարվում է Չինաստանի կողմից: Պանաման ջրանցքի նկատմամբ ինքնիշխանություն ունի:
«Մենք այն հետ ենք վերցնում»,- ասաց Թրամփը:
Թրամփը ավելի առաջ գնաց՝ խոստանալով «հետևել իրենց ճակատագրին դեպի աստղերը» և խոսելով Մարսի մասին:
«Գոյություն ունի միայն երկու սեռ»
Ամենաերկար ու բարձր ծափահարությունները հնչեցին, երբ Նախագահ Թրամփն ասաց. «Այսուհետ սա կլինի Միացյալ Նահանգների պաշտոնական քաղաքականությունը, որ գոյություն ունի միայն երկու սեռ՝ արական և իգական»:
Թրամփը խոստացավ կանխել ջանքերը՝ «ինտեգերելու ռասան և սեռը հանրային և անձնական կյանքի բոլոր ասպեկտներում»:
Նա խոստացավ մի երկիր ստեղծել, որը «առանց գույների է և հիմնված արժանիքների վրա»:
