Արդարադատության նախարարի առաջին տեղակալ Քրիստիննե Գրիգորյանի մասնակցությամբ այսօր տեղի է ունեցել Հայաստանում իրականացվող բարեփոխումների մասին իրազեկող միասնական www.reforms.am կայքի շնորհանդես-ասուլիսը:

Այս մասին հայտնեցին ՀՀ արդարադատության նախարարության տեղեկատվության և հասարակայնության հետ կապերի վարչությունից:

Քրիստիննե Գրիգորյանն իր խոսքում, շնորհակալություն հայտնելով հրավերի համար, կարևորել է նման նախաձեռնությունը` նշելով, որ կայքը քաղաքացիական իրազեկվածության և վերահսկողության ևս մեկ գործիք է հայ հանրության ձեռքում:

Անդրադառնալով հանրային իրազեկման ուղղությամբ Արդարադատության նախարարության նախկին վերլուծություններին՝ փոխնախարարն ընդգծել է, որ ուսումնասիրության արդյունքում ի հայտ եկած իրազեկման բացը լրացնելու համար 2019-2020թթ. 4-ից ավելի ոլորտային ռազմավարությունների մշակման դեպքում ներդրվել է հաղորդակցության բաղադրիչը՝ իր արտաքին և ներքին հաղորդակցման բաղկացուցիչներով:

Որպես Քաղաքացիական վերահսկողության մեկ այլ կարևոր գործիք՝ փոխնախարար Գրիգորյանը նշել է ոլորտային ռազմավարությունները համակարգող խորհուրդների կազմերում ձայնի իրավունքով քաղաքացիական հասարակության ներկայացուցիչների մասնակցության ապահովումը: