ՀՀ-ի և Ադրբեջանի միջև բոլոր հարցերի խաղաղ կարգավորմանն աջակցելու նպատակով ԱՄՆ-ն կշարունակի ներգրավվածությունը երկկողմ և բազմակողմ ձևաչափերով․ դեսպանատուն
ՀՀ-ում ԱՄՆ դեսպանատունը ամփոփել է Կովկասյան բանակցությունների հարցերով ավագ խորհրդական, ԵԱՀԿ ՄԽ ամերիկացի համանախագահ Ֆիլիպ Ռիկերի՝ Հայաստան կատարած այցը։
«Ֆիլիպ Ռիքերը սեպտեմբերի 8-10-ը Հայաստան կատարած այցի ընթացքում հանդիպեց ՀՀ վարչապետ Նիկոլ Փաշինյանին, ՀՀ արտաքին գործերի նախարար Արարատ Միրզոյանին, ՀՀ անվտանգության խորհրդի քարտուղար Արմեն Գրիգորյանին, հայ-թուրքական հարաբերությունների կարգավորման գործընթացում ՀՀ հատուկ բանագնաց Ռուբեն Ռուբինյանին։
Դեսպան Ռիկերը վերահաստատեց Միացյալ Նահանգների հանձնառությունը՝ հարավկովկասյան տարածաշրջանում անվտանգ, կայուն, ժողովրդավար, բարեկեցիկ ու խաղաղ ապագան խթանելու հարցում։ Հայաստանի և Ադրբեջանի միջև բոլոր հարցերի համապարփակ և խաղաղ կարգավորմանն աջակցելու նպատակով Միացյալ Նահանգները կշարունակի ներգրավվածությունը երկկողմ և բազմակողմ ձևաչափերով, ինչպես նաև համախոհ գործընկերների հետ, ինչպիսին է Եվրամիությունը»։
Հիշեցնենք, որ Ռիքերը իր տարածաշրջանային այցի ընթացքում այցելելու է նաև Վրաստան և Ադրբեջան։ ԱՄՆ պետքարտուղարությունից հայտնել էին, որ Ռիքերը հանդիպումներ է ունենալու երեք երկրների բարձրաստիճան պաշտոնյաների հետ։
comment.count (0)