Աշխատանքային այցով Ադրբեջանում գտնվող Թուրքիայի ազգային պաշտպանության նախարար Հուլուսի Աքարը հանդիպում է ունեցել Ադրբեջանի պաշտպանության նախարար Զաքիր Հասանովի հետ։ Այս մասին տեղեկանում են Ադրբեջանի պաշտպանական գերատեսչության տարածած հաղորդագրությունից։
Ըստ հաղորդագրության՝ Հասանովը Հուլուսի Աքարին է ներկայացրել օպերատիվ իրավիճակը, որը ստեղծվել է «հայկական կողմի սադրանքներից ու Ադրբեջանի ԶՈՒ ստորաբաժանումների վճռական պատասխան գործողություններից հետո»։
«Հանդիպմանը հատուկ նշվել է ԶՈՒ անձնակազմի մասնագիտական մակարդակի հետագա բարձրացման նպատակով համատեղ զորավարժությունների անցկացման կարևորությունը»,- ասված է հաղորդագրության մեջ։
Նշվում է, որ քննարկվել են նաև երկու երկրների միջև ռազմական, ռազմատեխնիկական, ռազմական կրթության և այլ ոլորտներում համագործակցության զարգացման հեռանկարները, տարածաշրջանային անվտանգությանը վերաբերող, ինչպես նաև փոխադարձ հետաքրքրություն ներկայացնող մի շարք հարցեր։
comment.count (0)