armenpress.am Հայաստանի վարչապետ Նիկոլ Փաշինյանը վտանգավոր է համարում ընդդիմադիր քաղաքական ուժերի հայտարարությունները, որոնք ասում են, որ Հայաստանը չպետք է բավարարվի 29 հազար 743 քառակուսի կիլոմետր տարածքով։
Փաշինյանն այս մասին ասաց լրագրողների հետ զրույցում՝ անդրադառնալով հարցին, թե ինչո՞ւ են իշխող «Քաղաքացիական պայմանագիր» կուսակցության ներկայացուցիչները պնդում, որ ընդդիմադիր որոշ ուժերի իշխանության գալու դեպքում պատերազմ է լինելու:
«Եթե քաղաքական ուժն ասում է, որ Հայաստանը չպետք է բավարարվի 29 հազար 743 քառակուսի կիլոմետրով, դա անխուսափելի պատերազմ է, այդտեղ շատ վիճելու բան չկա էլ»,- ասաց վարչապետը:
Ավելի վաղ ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանն էր հայտարարել, որ Հայաստանը մեծ սփյուռք ունեցող երկիր է և չպետք է սահմանափակվի իր 29 հազար 743 քառակուսի կիլոմետր տարածքով։
