Համայնքային ոստիկանության Արմավիրի բաժնում ստացվել էր օպերատիվ տեղեկություն, որ Արմավիր քաղաքի Երևանյան փողոցի մի բնակիչ ապօրինի պահում է զենք-զինամթերք, թմրամիջոց, նաև ձեռք բերում և իրացնում է կեղծ ալկոհոլային խմիչք ու անակցիզ ծխախոտ։
ՆԳՆ ոստիկանության փոխանցմամբ՝ հունիսի 17-ին նախաձեռնվել է քրեական վարույթ, որի շրջանակում նույն փողոցում գտնվող՝ Արմավիր քաղաքի 53-ամյա բնակչի վաճառքի կետում կատարվել է զննություն։ Հայտնաբերվել է 16 դեղահաբ, սվին-դանակ, նաև՝ առանց ակցիզի 24 շիշ կեղծ օղի, տնային պայմաններում պատրաստված օղիով և կոնյակով լցված պլաստիկ 120 շիշ ու 12 հազար 246 տուփ առանց դրոշմանիշի ծխախոտ։
Հետագա միջոցառումների արդյունքում իրավապահները պարզել են, որ դեղատոմսով նշանակվող դեղամիջոց «Դիազեպամը» 53-ամյա տղամարդուն իրացրել է նրա 47-ամյա համաքաղաքացին։
Նույն օրը 53-ամյա տղամարդը ձերբակալվել է, ներկայացվել Արմավիրի մարզային քննչական վարչություն ու տեղափոխվել ձերբակալվածների պահման վայր։
Հանգամանքները նախաքննությամբ պարզվում են։
