factor.am Ադրբեջանը հայ դիզայներ Արամ Նիկոլյանի նկատմամբ միջազգային հետախուզում է հայտարարել։ Այս մասին հայտնում են ադրբեջանական լրատվամիջոցները։
Ադրբեջանի գլխավոր դատախազությունը հայտնում է, որ պատճառը Ադրբեջանի դրոշի այրումն է ապրիլի 14-ին Երևանում ծանրամարտի Եվրոպայի առաջնության բացման արարողության ժամանակ։
Ադրբեջանում դրոշի այրման համար քրեական գործ են հարուցել ու հետաքննություն են իրականացնում։
Հիշեցնենք, որ ս․թ․ ապրիլի 14-ին Երևանում Ծանրամարտի Եվրոպայի առաջնության բացման արարողության ժամանակ դահլիճում ներկա գտնվող դիզայներ Արամ Նիկոլյանը մոտեցել էր Ադրբեջանի պետական դրոշին, վերցրել այն և այրել։ Անվտանգության աշխատակիցները նրան հեռացրել էին դահլիճից, և նոր դրոշ էր բերվել։ Այնուհետև Նիկոլյանին բերման էին ենթարկել ոստիկանության Մալաթիայի բաժին, նրա փաստաբան Ալեքսանդր Կոչուբաևը հայտնել էր, որ նախնական տեղեկություններով նախաձեռնվել է քրեական վարույթ խուլիգանության հատկանիշներով: Նիկոլյանն այնուհետև ազատ է արձակվել։
Արդեն հաջորդ օրը՝ ապրիլի 15-ին, Ադրբեջանի Երիտասարդության և սպորտի նախարարությունը ու Ադրբեջանի Ազգային օլիմպիական կոմիտեն համատեղ հայտարարություն են տարածել՝ հայտնելով, որ ադրբեջանցի մարզիկները վերադառնում են իրենց երկիր։
ՀՀ ԿԳՄՍՆ-ն մտահոգիչ էր համարել այս հայտարարությունը՝ նշելով․ «Բացման հանդիսավոր արարողության ժամանակ տեղի ունեցած միջադեպը, որը շատ արագ հարթվել է, որևէ առնչություն չունի մարզիկների անվտանգության և նրանց բնականոն մրցելույթների ապահովման հետ։ Անհրաժեշտ բոլոր պայմանները լիարժեքորեն ապահովված են եղել»։
Ավելի ուշ՝ ապրիլի 17-ին ՀՀ ԿԳՄՍՆ-ն հաղորդագրություն տարածեց՝ ընդգծելով, որ դրոշի միջադեպը «չի արտահայտում ՀՀ իշխանությունների դիրքորոշումը և դատապարտելի է սպորտային արժեքների և արդար խաղի (Fair Play) համընդհանուր սկզբունքների տեսանկյունից»։
Այս հայտարարությունը ողջունեց Ծանրամարտի Եվրոպայի ֆեդերացիայի նախագահը՝ նաև «հաստատելով անվտանգության բարձր մակարդակը, որը միջոցառման մեկնարկից ապահովվել է սպորտային պատվիրակությունների համար»։
Նիկոլյանի նկատմամբ միջազգային հետախուզում հայտարարելու վերաբերյալ մանրամասները կարդացեք factor.am-ում
