Սա շանտաժ է, սա գործադուլ չէ. Այս մասին հայտարարեց Երևանի փոխքաղաքապետ Սուրեն Գրիգորյանը՝ անդրադառնալով անդրադառնալով վաղ առավոտից «Երևանի ավտոբուս» ՓԲԸ-ում իրականացվող գործադուլին։
«Ոչ մեկը չի խոստացել, որ բարեփոխումները հեշտ են անցնելու: Եվ երբ խոսքը օրական միջինում մոտ 5 միլիոն դրամ կորսված եկամուտի մասին է (նկատի ունի տրանսպորտային համակարգի ստվերային շրջանառությունը՝ խմբ.), բնականաբար, այդ գումարը հետևից բերում է շատ հետաքրքություններ, շահագրգռվածություններ: Մարդիկ չեն ուզում, էդ գումարից հենց այնպես, կներեք էս խոսքիս համար, կտրվեն: Մենք այս ճանապարհն անցնելու ենք մինչև վերջ, շանտաժին չենք տրվելու:
Փորձ է կատարվում քաղաքային իշխանության վրա ճնշում գործադրել, գեներացնել հանրային դժգոհություն, որ մենք էլ ասենք՝ եկեք կոմպրոմիսի գանք՝ մի քիչ քիչ գողացեք, մի քիչ ավել գողացեք: Այս խոսակցությունները չեն լինելու»,- հրավիրված ասուլիսի ժամանակ հայտարարեց Գրիգորյանը:
Նա հավելեց, որ կան նաև օբյեկտիվ դժգոհություններ, որոնք բարձրացնում են վարորդները:
