22:03- Իտալիայում վերջին մեկ օրում կորոնավիրուսից 99 մահվան դեպք է արձանագրվել, որը նվազագույն մեկօրյա ցուցանիշն է երկրում մարտի 9-ին համազգային կարանտինի սահմանման պահից ի վեր: |tert.am|
21:40- Կանադայում կորոնավիրուսով վարակման դեպքերի թիվը գերազանցել է 77 հազարը, 5,8 հազար մարդ մահացել է։ Վերջին մեկ օրում գրանցվել է 1113 նոր դեպք, մահվան ելքերի քանակը ավելացել է 103-ով: |armenpress.am|
20:50- Նուբար Աֆեյանի Moderna ընկերության ստեղծած պատվաստանյութն առաջին դրական արդյունքներն է գրանցել COVID19-ի դեմ պայքարում:Փորձարկման նպատակն էր հասկանալ՝ արդյոք պատվաստանյութն անվտանգ է, թե ոչ: Բոլոր ութ մասնակիցների մոտ վիրուսը չեզոքացնող հակամարմիններ են ձևավորվել, որոնք համեմատելի են այն մակարդակին, որը զարգանում է կորոնավիրուսով վարակված և ապաքինված մարդու օրգանիզմում առկա հակամարմիններին: |CNN| |24news.am|
20:30- Հունիսի 15-ին պետք է որոշենք՝ կչեղարկենք արդյոք ուղեւորությունների մասին համաշխարհային նախազգուշացումը, թե ոչ։ Աշխատում ենք այդ նախազգուշացումն այլ սկզբունքներով փոխարինելու ուղղությամբ։ Ամառային արձակուրդներին պետք է պատասխանատու ձեւով մոտենալ, եւ դեռ շատ վաղ է խոսել այն մասին, թե որ երկրներում գերմանացիները կկարողանան անցկացնել իրենց արձակուրդը: [Գերմանիայի արտգործնախարար Հեյկո Մաաս] |news.am|
19:20- Բելառուսում մեկ օրում կորոնավիրուսի 922 դեպք է գրանցվել։ Վարակակիրների թիվն ընդհանուր առմամբ 30 հազար 572 է, մահացածներինը՝ 171, ապաքինվածների ընդհանուր թիվը՝ 10 հազար 130։
16:16- Ռուսաստանի 27 շրջաններում պատրաստ են սահմանափակումների աստիճանական մեղմացման: Այս մասին հայտնել է Ռուսաստանի վարչապետ Միխայիլ Միշուստինը: Նա հստակեցրել է՝ քանի որ այդ շրջաններում կորոնավիրուսի տարածման ցուցանիշները ցածր են, և մասնագիտացված բաժանմունքներում մահճակալները դատարկ են, ապա հնարավոր է, որ այդ հատվածներում գնան մեղմացման: Վարչապետը նշել է, որ մեկուսացման ռեժիմը հնարավորություն տվեց ժամանակ շահել և թույլ չտալ հիվանդության տարածման պայթյունավտանգ իրավիճակ: |armenpress.am|
16:09- Չինաստանն առաջիկա երկու տարվա ընթացքում կհատկացնի 2 մլրդ դոլար կորոնավիրուսից տուժած երկրներին աջակցելու համար: Աջակցություն կցուցաբերվի հատկապես զարգացող երկրներին: Այս մասին հայտնել է ՉԺՀ նախագահ Սի Ցզինպինը: |armenpress.am|
15:03- Իրանում կորոնավիրուսի մայիսի 18-ի վիճակագրական տվյալները.
- Վարակակիրների թիվն ավելացել է 2.294-ով
Ընդհանուր՝ 122.492 - Մահացածների թիվն ավելացել է 69-ով
Ընդհանուր՝ 7.057 - Ապաքինվածների թիվն ավելացել է 1.197-ով
Ընդհանուր՝ 95.661
[Իրանում ՀՀ դեսպանություն]
14:51- Ֆրանսիայում մեկուսացման միջոցառումների մեղմացումից հետո գրանցվել է վարակի բռնկման ավելի քան երկու տասնյակ նոր օջախ: Դրանցից երեքը գրանցվել է մսամթերքի արտադրության գործարանում:
Իսպանիայում կայուն ձևով նվազում է վարակի հետևանքով մահերի թիվը:
Իտալիայում սկսել են աշխատել խանութները, ռեստորանները, ինչպես նաև վարսավիրանոցները: Հռոմը հայտնում է մեկուսացման միջոցառումները մեղմելու նոր փուլի մասին: |armenpress.am|
14:41- Թուրքիայի Քյութահյա նահանգում 5 ամսական երեխան հաղթահարել է կորոնավիրուսը։ Երեխայի մոտ կորոնավիրուս է ախտորոշվել 45 օր առաջ։ Նրան միացրել էին արհեստական շնչառության սարք։ Այդ ընթացքում նա մի քանի անգամ թեստավորում է անցել։ Վերջին թեստի պատասխանը բացասական է եղել, և նա դուրս է գրվել հիվանդանոցից։ |ermenihaber.am|
14:35- Վատիկանում կարանտինից հետո բացվել է Սուրբ Պետրոսի տաճարը։ Տաճարն ու հարակից հատվածը երկու օր շարունակ ախտահանվել են: Մարտից Իտալիայում եկեղեցներն ու տաճարները փակվել էին, եկեղեցական արարողությունները կատարվում էին առանց հավատացյալների: |armenpress.am|
11:59-Վրաստանի կառավարության որոշմամբ, այսօրվանից կորոնավիրուսի կանխարգելման նպատակով սահմանված սահմանափակումներից մի քանիսը վերացվում են: Վերացվեց Մառնեուլիի կարանտինային գոտին և տեղի բնակչությունը կարող է լքել մունիցիպալիտետի տարածքը: Մայիսի 11-ին բացվել է մայրաքաղաք Թբիլիսին, մայիսի 14-ին Ռուսթավի քաղաքը և Գարդաբանիի մունիցիպալիտետը: |aliq.ge|
11:55- Բելգիայում հիվանդանոցներից մեկն այցելած վարչապետ Սոֆի Վիլմեսին բժիշկները դիմավորել են՝ կազմակերպելով «ամոթի միջանցք»: Վարչապետը եկել էր հիվանդանոց իր աջակցությունը հայտնելու բուժանձնակազմին և ապշել այդպիսի ընդունելությունից: Երբ ավտոշարասյունը մոտեցել է հիվանդանոցին, բժիշկներն ու բուժքույրերը շրջվել են մեջքով, որպեսզի ցույց տան իրենց վրդովմունքը համաճարակի ժամանակ իշխանությունների գործողությունների առնչությամբ: Ակցիային մասնակցել է 120 մարդ: |armenpress.am|
11։11- Աշխարհի ավելի քան 110 երկիր աջակցություն է հայտնել Ավստրալիայի՝ համավարակի ծագման պատճառն ուսումնասիրելու համար անկախ փորձաքննությունն անցկացնելու առաջարկին: Ավստրալիայի առաջարկին միացել են Ռուսաստանը, Մեծ Բրիտանիան, Հնդկաստանը, Ինդոնեզիան, Կանադան, Նոր Զելանդիան, Ճապոնիան, ԵՄ անդամ երկրները: Ավելի ուշ միացել են աֆրիկյան երկրները։ |armenpress.am|
10։44- Թուրքիայում մայիսի 17-ին կորոնավիրուսից մահացել է 44 մարդ։ 1 օրվա ընթացքում հաստատվել է կորոնավիրուսով վարակվելու 1․368 նոր դեպք։ Նույն ժամանակահատվածում գրանցվել է վարակակիրների մահվան 44 դեպք, իսկ ապաքինվել է 1․825 մարդ։ Թուրքիայում մինչև օրս համավարակից ապաքինվել է ընդհանուր առմամբ 109.962 մարդ, արձանագրվել է վարակման 149.435, իսկ մահվան 4․140 դեպք։ |ermenihaber.am|
10։42- Այսօրվանից Իսպանիան և Իտալիան սկսում են հանել սահմանափակումները։ Մասնավորապես Իտալիայում ավելի քան երկու ամսվա դադարից հետո կվերաբացվեն սրճարաններն ու վարսավիրանոցները։ |bbc.com|
10:32- Վրաստանում կորոնավիրուսի վարակի հաստատված դեպքերն՝ ըստ վերջին տվյալների
Հաստատված դեպքեր- 701 (+6)
Առողջացածներ- 432
Մահեր- 12 |stopcov.ge|
10:24- Աշխարհում COVID-19-ով վարակվածների թիվն անցել է 4 միլիոն 805 հազարը: Մահացածների թիվն անցել է 316 հազարը: Ապաքինվել է 1 միլիոն 860 հազար 036 մարդ: Վարակվածների թվով առաջին տեղում գտնվող ԱՄՆ-ում 1 միլիոն 527 հազար 664 հաստատված դեպք կա: Այստեղ մահացածների թիվը 90 հազար 978 է։ Ընդհանուր ցուցանիշով երկրորդ տեղում հայտնված Ռուսաստանում կա 281 հազար 752 հաստատված դեպք: Մահերի թիվն այստեղ կազմում է 2 հազար 631: |armenpress.am|
Նորություններ կորոնավիրուսի մասին, աշխարհ, 19․05․20
