armenpress.am: Երկրաշարժից տուժած Սիրիայի իշխանությունները համաձայնել են ժամանակավորապես երկու լրացուցիչ անցակետ բացել մարդասիրական օգնություն ներկրելու համար: Այս մասին հայտարարել է ՄԱԿ-ի գլխավոր քարտուղար Անտոնիո Գուտերեշը։
«Ես ողջունում եմ Սիրիայի նախագահ Բաշար ալ-Ասադի այսօրվա որոշումը նախնական երեք ամսով Թուրքիայից դեպի հյուսիս-արևմտյան Սիրիա տանող Բաբ ալ-Սալամ և Ալ Ռայե երկու անցակետերը բացելու վերաբերյալ», – ասվում է Գուտերեշի հայտարարության մեջ:
ՄԱԿ-ի գլխավոր քարտուղարը հավելել է, որ դա թույլ կտա օպերատիվ կերպով տեղ հասցնել հումանիտար օգնությունը։ Մինչև այժմ թուրք-սիրիական սահմանին գործել Է միայն մեկ նման անցակետ: Ավելի վաղ Սիրիայի և Թուրքիայի միջև լրացուցիչ անցակետեր բացելու օգտին հանդես էր եկել ԱՄՆ-ի պետքարտուղարության պաշտոնական ներկայացուցիչ Նեդ Փրայսը։
Հիշեցնենք, որ Թուրքիայում` Սիրիայի սահմանից ոչ հեռու, փետրվարի 6-ի գիշերը 7,8 մագնիտուդ հզորությամբ երկրաշարժ է եղել: Սիրիայում և Թուրքիայում զոհերի թիվը հատել է 34 հազարը։ Փետրվարի 7-ին Հայաստանը փրկարարական ջոկատներ է ուղարել Սիրիա և Թուրքիա, իսկ փետրվարի 11-ին Հայաստանի արտաքին գործերի նախարարության խոսնակը հայտնել է, որ Հայաստանը հումանիտար օգնություն է ուղարկել Թուրքիա․ «Հումանիտար օգնության բեռնատարները հատել են սահմանային Մարգարայի կամուրջը և շարժվել դեպի երկրաշարժից տուժած շրջան»,-գրել էր նա։
