ԱՄՆ պետքարտուղար Էնթոնի Բլինքենը կարծում է, որ Եվրոպայում կայունությունը վտանգի տակ է Ուկրաինայում Ռուսաստանի գործողությունների արդյունքում։ Այս մասին նա ուրբաթ հայտարարել է Բրյուսելում մամուլի ասուլիսի ժամանակ։

«Մենք Բրյուսելում ենք վճռորոշ ժամանակ, Եվրոպայում կայունությունը մազից է կախված։ Կանոնների վրա հիմնված միջազգային կարգը, որն առանցքային նշանակություն ունի խաղաղության պահպանման և անվտանգության համար, փորձությունների է ենթարկվում Ուկրաինա Ռուսաստանի չհրահրված և անհիմն ներխուժմամբ»,- ասել է Բլինքենը։

ԱՄՆ-ն Ռուսաստանին կոչ է անում կանգնեցնել ռազմական օպերացիան ուկրաինական ատոմային օբյեկտների մոտ, ասել է Բլինքենը․ 
«Կրեմլը պետք է անհապաղ դադարեցնի բոլոր հարձակումները ուկրաինական ատոմային օբյեկտների մոտ, ինչպես նաև քաղաքացիական անձնակազմին հնարավորություն տա կատարել իր աշխատանքը՝ այդ օբյեկտների անվտանգությունն ապահովելու մասով, որը կոչ է արել նաև ՄԱԳԱՏԷ-ն»։

Ոչ թռիչքային գոտի

Ուկրաինայի վրա ոչ թռիչքայն գոտի ստեղծելու Արևմուտքի փորձերը կհանգեցնեին ՌԴ-ի հետ պատերազմի, հստակեցրել է նա։

«Չնայած մենք (ԱՄՆ-ն դաշնակիցների հետ) անում ենք ամեն հնարավորը, որպեսզի ուկրաինացիներին ապահովենք ՌԴ-ից պաշտպանվելու արդյունավետ միջոցներով, միևնույն ժամանակ մենք պատասխանատվություն ենք կրում, որ պատերազմը Ուկրաինայի սահմաններից դուրս չտարածվի։ Ոչ թռիչքային գոտի մտցնելու միակ միջոցը ՆԱՏՕ-ի ինքնաթիռները ուկրաինական օդային տարածք ուղարկելն ու ռուսական ինքնաթիռները խոցելն է։ Եվ դա կարող է հանգեցնել լայնամասշտաբ պատերազմի Եվրոպայում։ Եվ ինչպես հստակ հասկացրեց նախագահ Ջո Բայդենը, մենք մտադիր չենք Ռուսաստանի հետ պատերազմի մեջ մտնել»,- նշել է նա։

«Ամեն օր մենք դիտարկում ենք՝ ինչ կարող ենք տրամադրել Ուկրաինային, որպեսզի նա կարողանա պաշտպանել իրեն»,- ասել է պետքարտուղարը՝ նշելով, որ այս հարցը բառացիորեն ամենօրյա ռեժիմով քննարկում են Ուկրաինայի պաշտոնական անձանց հետ, նաև իրենց դաշնակիցների ու գործընկերների։