ՀՀ ոստիկանություն

ՀՀ ոստիկանությունն իրավապահ համակարգի մարմին է, որի պարտականությունն է հանցավոր եւ հակաիրավական այլ ոտնձգություններից պաշտպանել մարդու կյանքն ու առողջությունը, ինչպես նաեւ այլ իրավունքներն ու ազատությունները, սեփականությունը, հասարակության ու պետության շահերը:

Ոստիկանությունն իրականացնում է հանրապետության տարածքում օպերատիվ-հետախուզական եւ փորձաքրեագիտական գործունեության կազմակերպումը։ Ոստիկանությունը գործում է ՀՀ Սահմանադրության, օրենդրության եւ «Ոստիկանության» մասին ՀՀ օրենքի հիման վրա։ Այն ենթակա է Հանրապետության վարչապետին։ 2020 թ. հունիսի 8-ից ոստիկանապետը Վահե Ղազարյանն է։

Ոստիկանները ձերբակալել են մանկապարտեզի աշխատակցին․ ՆԳՆ

Ոստիկանները ձերբակալել են Վեդու մանկապարտեզի 45-ամյա աշխատակցին։ Այս մասին տեղեկանում ենք ՆԳՆ մամուլի քարտուղար Նարեկ Սարգսյանի ֆեյսբուքյան գրառումից․«Հուլիսի 26-ին սոցցանցում տեսանյութ էր տարածվել, որում մանկապարտեզի աշխատակիցը ծեծի էր ենթարկում երեխային։ՆԳՆ ոստիկանությունում կատարված ուսումնասիրությամբ պարզվել է, որ դեպքը տեղի է ունեցել Արարատի մարզի Փոքր Վեդի գյուղի մանկապարտեզում այս տարվա մայիսին։ՆԳՆ ոստիկանության Արարատի բաժին է հրավիրվել մանկապարտեզի տնօրենը, որից ընդունվել է հաղորդում։Տեսանյութում պատկերված մանկապարտեզի 45-ամյա աշխատակիցը հայտնաբերվել է Վեդիի Թումանյան փողոցում, անմիջականորեն ծագած հիմնավոր կասկածի առկայության հիմքով ձերբակալվել և կազմված փաստաթղթերով ներկայացվել ՔԿ Վեդիի քննչական բաժին», - նշված է գրառման մեջ։Հիշեցնենք, որ համացանցում տարածվել էր տեսանյութ, ըստ որի՝ Վեդու մանկապարտեզներից մեկում աշխատակիցներից մեկը բռնության է ենթարկում քնելու պառկած մանկահասակ երեխային։

18:51 - 26 հուլիսի, 2024

Վեդու մանկապարտեզում երեխայի նկատմամբ տեղի ունեցած բռնության դեպքով ՆԳՆ-ում հաղորդում չի ներկայացվել

Համացանցում տեսանյութ էր տարածվել, ըստ որի՝ Վեդու մանկապարտեզներից մեկում աշխատակիցներից մեկը բռնության է ենթարկում քնելու պառկած մանկահասակ երեխային։ «Ինֆոքոմ»-ի հարցին ի պատասխան՝ ՀՀ ՆԳՆ-ից տեղեկացրին, որ դեպքի վերաբերյալ հաղորդում չի ներկայացվել, սակայն իրենք տեսանյութն այս պահին ուսումնասիրում են։ Դեպքը նոր է թե ոչ, իսկապես Վեդիում է թե ոչ՝ դեռեւս պարզ չէ, հավելյալ տեղեկության դեպքում կհայտնեն։ Գլխավոր դատախազությունից եւս տեղեկացրին, որ տեսանյութն ուսումնասիրում են։

17:00 - 26 հուլիսի, 2024

Լարված իրավիճակ Հրազդանում․ ցուցարար չարենցավանցիները պահանջում են, որ Կոտայքի մարզպետը գա անձնագրային բաժին |aravot.am|

aravot.am: «Մենք Կոտայքի մարզպետին հրավիրում ենք անձնագրային բաժին։ Խնդրում ենք իրեն ասեք՝ չարենցավանցիները եկել, ցույց են անում, պահանջում են, որ դուք գաք, ձեր աչքով տեսնեք՝ ինչ է կատարվում»,- քիչ առաջ Հրազդանում բողոքի ցույցի մասնակիցներն այսպիսի հայտարարություն արեցին։ Ի պատասխան՝ ոստիկանության ներկայացուցիչները, որոնք թույլ չտվեցին, որ անգամ հինգ րոպե չարենցավանցիները ճանապարհը փակեն և իրենց իրազեկումն իրականացնեն, դիմելով ցուցարարներին, ասացին՝ մարզպետարանի տեղը չգիտե՞ք։ Նշենք, որ չարենցավանցիների դժգոհությունն է առաջացրել այն, որ Չարենցավան համայնքի անձնագրային բաժինը տեղափոխվել է Հրազդան։ «Ետ ենք բերելու անձնագրային բաժինը» նախաձեռնող խմբի հայտարարության մեջ մասնավորապես նշված է․ «ՆԳՆ նախարար Վահե Ղազարյանի հրամանով արմատական «բարեփոխման» անվան տակ Չարենցավան համայնքի անձնագրային բաժինը տեղափոխվել է Հրազդան` առաջացնելով Չարենցավանի խոշորացված համայնքի բնակիչների զայրույթն ու դժգոհությունը։ Դուք, որպես կառավարության ներկայացուցիչ, նահանգում անուղղակի պատասխանատվություն եք կրում այդ անհեթեթ որոշման համար, իսկ որպես քաղաքական թիմի անդամ ուղղակի եք պատասխանատու այդ բոլոլայի համար։ Ուստի, մենք Ձեզ առաջարկում ենք այց կատարել Հրազդանի անձնագրային բաժին`անձամբ զգալով, թե ինչ ահավոր ու անմարդկային պայմաններ է ստեղծել Ձեր քաղաքական թիմը, խոշորացված Հրազդան, խոշորացված Ծաղկաձոր և խոշորացված Չարենցավան համայնքների բնակիչների համար։ ՀՀ կառավարությունից պահանջում ենք հետ բերել անձնագրային բաժանմունքը»։ Ոստիկանները, դիմելով ցուցարարներին ասացին՝ ճանապարհը չի փակվելու։ Դիմելով ցուցարարներից մեկին, որը կանգնել էր փողոցում՝ պաստառը ձեռքին, ոստիկանության ծառայողն ասաց․ «Ասում եմ՝ դուրս արի ճանապարհից»։ Ցուցարարն ասաց՝ մի գոռա վրաս։ Բոլորը նկարահանվում է, պատասխան ես տալու»։ Ոստիկանության ծառայողն ասաց՝ ես պատասխան կտամ։ Ցուցարարներն ասացին՝ մենք ուզում ենք մեր պահանջը հնչեցնել և դուրս գալ։ Սակայն այդպես էլ ցուցարարներին թույլ չտվեցին փակել ճանապարհն ու իրենց պահանջը հնչեցնել։ Բողոքի ցույցի մասնակիցներին բերման ենթարկեցին։ Այնուհետև նրանք ասացին՝ իրենց ընկերներից Գագիկը մի երգ է հորինել ՆԳ նախարար Վահե Ղազարյանի համար, որը ցանկանում են նվիրել Հրազդանի ոստիկանությանն ու գնալ այստեղից։ Այդ պահին ոստիկանության ներկայացուցիչները խոչընդոտեցին ու բերման ենթարկեցին կիթառ նվագել ցանկացող անձին։ Քիչ անց նրան բաց թողեցին՝ հայտնելով, որ վարչական տույժի է ենթարկվել ճանապարհ փակելու համար։ Մանրամասները՝ aravot.am-ում

12:04 - 26 հուլիսի, 2024

ՆԳՆ-ն հերքել է լուրը, թե հունվարի 1-25-ը ՀՀ-ում երթևեկության կանոնների խախտման 515 հազար 430 արձանագրություն է կազմվել

Հայաստանի ներքին գործերի նախարարության մամուլի քարտուղար Նարեկ Սարգսյանը հերքել է մամուլում տարածված լուրը, թե իբր այս տարվա հունվարի 1-ից 25-ը հանրապետությունում երթևեկության կանոնների խախտման համար կազմվել է վարչական իրավախախտումների վերաբերյալ 515 հազար 430 արձանագրություն։ Նարեկ Սարգսյանն այդ մասին գրել է «Ֆեյսբուք»-ի իր էջում։ «Այսօր մամուլում տեղեկություն է տարածվել, իբր հունվարի 1-ից 25-ը հանրապետությունում երթևեկության կանոնների խախտման համար կազմվել է վարչական իրավախախտման վերաբերյալ 515 430 արձանագրություն։ Նշենք, որ 515 430 արձանագրությունները կազմվել են ոչ թե 25 օրում, այլ հունվարի 1-ից հուլիսի 25-ն ընկած ժամանակահատվածում՝ շուրջ 7 ամսում»,- գրել է Սարգսյանը։

10:30 - 26 հուլիսի, 2024

ՆԳ նախարարը Վանաձորում հանդիպում կունենա քաղաքացիների հետ

Հուլիսի 30-ին՝ ժամը 15.00-ին, Վանաձորում ՀՀ ներքին գործերի նախարար Վահե Ղազարյանը կհանդիպի Լոռու մարզի բնակիչների հետ։ Այդ մասին հայտնում են ՀՀ ՆԳՆ-ից: Ընդունելությունը տեղի կունենա ՆԳՆ ոստիկանության Լոռու մարզային վարչությունում (ք․ Վանաձոր, Տիգրան Մեծի պող., 1/1 շենք)։ Ընդունելությանը մասնակցել ցանկացող քաղաքացիները 14.45-ին կարող են անձը հաստատող փաստաթղթով ներկայանալ ՆԳՆ ոստիկանության Լոռու մարզային վարչություն։

21:07 - 25 հուլիսի, 2024

Պետության շահերին պատճառվել է էական վնաս. ներքին անվտանգության և հակակոռուպցիոն վարչության բացահայտումը

ՆԳՆ ներքին անվտանգության և հակակոռուպցիոն վարչության ու Ազգային անվտանգության ծառայության օպերատիվ-հետախուզական համատեղ միջոցառումներով պարզվել է, որ ոստիկանության գլխավոր ու ավագ պաշտոն զբաղեցնող որոշ անձինք իրենց իշխանական կամ ծառայողական լիազորություններն օգտագործել են ի վնաս ծառայողական շահերի: Իրենց ղեկավարած ստորաբաժանման կողմից պահպանվող մի շարք տնտեսվարողների հետ նրանք կնքել են սահմանվածից ցածր արժեքով պայմանագրեր և ստորաբաժանման նախկին ծառայողներից մեկի միջոցով նրանցից պահանջել և առձեռն ստացել են պայմանագրերով նախատեսվածից ավելի գումարներ: Սրանով էական վնաս է պատճառվել կազմակերպությունների և պետության օրինական շահերին: Ծառայողական քննությամբ ձեռք բերված փաստաթղթերն ուղարկվել են ՀՀ գլխավոր դատախազություն:

21:46 - 24 հուլիսի, 2024

Քննարկվել են թմրամիջոցների և հոգեմետ նյութերի իրացման դեպքերով քննվող դատական պրակտիկայի վերաբերյալ հարցեր

Հուլիսի 23-ին ՆԳ նախարարությունում տեղի է ունեցել Հայաստանի Հանրապետությունում թմրամիջոցների և հոգեմետ (հոգեներգործուն) նյութերի շրջանառության և ապօրինի շրջանառության կանխարգելման միջգերատեսչական հանձնաժողովի հերթական նիստը, որը վարում էր հանձնաժողովի նախագահ, ՆԳՆ ոստիկանության պետի տեղակալ Վարդան Վարդանյանը։ Հանձնաժողովի նախագահն իր խոսքում կարևորել է ներառական կազմով նիստի անցկացումը՝ բարձր գնահատելով թմրամիջոցների անօրինական շրջանառության դեմ պայքարի ուղղությամբ ներդրված համակողմանի ջանքերը։ Վարդան Վարդանյանն անդրադարձել է թմրամիջոցների անօրինական շրջանառության դեմ պայքարի արդյունքներին, այդ թվում՝ պատժի անխուսափելիությանը, կոնկրետ դեպքերով այլընտրանքային խափանման միջոցների կիրառման արդյունավետությանը, ինչպես նաև ապօրինի պահվող զենք-զինամթերքի հայտնաբերման ուղղությամբ ոստիկանության ծավալուն աշխատանքին։ Նա ընդգծել է միասնական պրակտիկայի ձևավորման անհրաժեշտությունը, ինչը թույլ կտա համընդհանուր խնդրի դեմ պայքարում գրանցել դրական արդյունքներ։ Հանձնաժողովի անդամներն իրենց ելույթներում ներկայացրել են գերատեսչությունների կողմից կատարված աշխատանքները, արձանագրված խնդիրները, ինչպես նաև թմրամիջոցների անօրինական շրջանառության հետ կապված այլ հարցեր: Քննարկվել են թմրամիջոցների և հոգեմետ նյութերի իրացման դեպքերով քննվող դատական պրակտիկայի վերաբերյալ հարցեր։ Ներկայացվել է նաև ՆԳՆ ոստիկանության կողմից մշակված «ՀՀ քրեական օրենսգրքում փոփոխություններ և լրացումներ կատարելու մասին» օրենքի նախագիծը։ Հանձնաժողովի կազմում ներգրավված էին ՆԳ նախարարության ոստիկանության, Ազգային անվտանգության ծառայության, Գլխավոր դատախազության, Պաշտպանության, Առողջապահության, Արդարադատության նախարարությունների, Քննչական կոմիտեի և Պետական եկամուտների կոմիտեի համապատասխան ստորաբաժանումների ղեկավարներ։ Հրավիրված էին նաև Բարձրագույն դատական խորհրդի ներկայացուցիչներ, Վճռաբեկ դատարանի քրեական պալատի, Երևան քաղաքի առաջին ատյանի ընդհանուր իրավասության քրեական դատարանի դատավորներ, օգնականներ: Օրակարգի հարցերի շուրջ ծավալվել է ակտիվ քննարկում։ Նախանշված խնդիրների լուծման ուղղությամբ արվել են կոնկրետ առաջարկություններ: Վարդան Վարդանյանն ամփոփելով նիստը՝ շնորհակալություն է հայտնել հանձնաժողովի անդամներին արդյունավետ քննարկման համար և ընդգծել թմրամիջոցների անօրինական շրջանառության դեմ պայքարի արդյունավետության ուղղությամբ առաջիկա անելիքները։

21:21 - 23 հուլիսի, 2024

Թումանյան փողոցում «Մերսեդեսի» վարորդը կրակել է ինքնագլոր վարող երիտասարդի ուղղությամբ

Հուլիսի 21-ի ժամը 17.05-ին ՆԳՆ ոստիկանության օպերատիվ կառավարման կենտրոն զանգած քաղաքացին հայտնել է, որ Թումանյան փողոցում «Մերսեդեսի» վարորդը կրակել է ինքնագլոր վարող տղամարդու ուղղությամբ: Ոստիկանությունից հայտնում են, որ մեկնած օպերատիվ խումբը պարզել է, որ ժամը 16.55-ին Թումանյան փողոցում «Մերսեդեսի» վարորդը վիճաբանել է ինքնագլոր վարող քաղաքացու հետ, որի ընթացքում քաշքշել են իրար, ինչից հետո «Մերսեդեսի» վարորդը մեկ անգամ կրակել է գազային ատրճանակով: Խուլիգանության հատկանիշներով քրեական վարույթ է նախաձեռնվել: Ոստիկանության Երևան քաղաքի վարչության, Կենտրոնական և Էրեբունու բաժինների քրեական հետախույզները համատեղ ձեռնարկած օպերատիվ-հետախուզական միջոցառումների շնորհիվ պարզել են, որ արարքը կատարել է Երևանի բնակիչ 20-ամյա երիտասարդը: Բացատրական աշխատանքի շնորհիվ նա ներկայացել է ոստիկանության Կենտրոնական բաժին և խուլիգանություն կատարելու հիմնավոր կասկածանքով ձերբակալվել: Անձնական խուզարկությամբ նրա հայտնաբերվել են մեկնարկային ատրճանակ և մեկ փամփուշտ: Կազմված փաստաթղթերը ներկայացվել են նախաքննական մարմին: Կատարվում է նախաքննություն:

13:09 - 23 հուլիսի, 2024

Վահե Ղազարյանը ԶԼՄ ներկայացուցիչների հետ քննարկել է համակարգի բարեփոխումների ընթացքը

Հուլիսի 19-ին Ծաղկաձորում ՆԳ նախարար Վահե Ղազարյանը հանդիպում-քննարկում է ունեցել զանգվածային լրատվամիջոցների ներկայացուցիչների հետ։ Այդ մասին տեղեկացնում են ՀՀ ՆԳՆ Ոստիկանությունից: Հանդիպմանը ներկա էին ՆԳ նախարարի տեղակալ Արփինե Սարգսյանը և ՆԳ նախարարի մամուլի քարտուղար, ՆԳՆ հանրային հաղորդակցության և իրազեկման վարչության պետ Նարեկ Սարգսյանը։ Քննարկվել են ՆԳՆ բարեփոխումներին, ինչպես նաև նախարարության ենթակա ծառայությունների՝ Ոստիկանության, Փրկարար ծառայության, Միգրացիայի և քաղաքացիության ծառայության գործունեությանը վերաբերող հարցեր։

13:43 - 22 հուլիսի, 2024

Ոստիկանություն ահազանգ է ստացվել, որ Կապան քաղաքի հրաձգարանի հարակից տարածքում դի կա. ՆԳՆ ոստիկանություն

Հուլիսի 20-ին՝ ժամը 18.45-ին, ՆԳՆ ոստիկանություն ահազանգ է ստացվել, որ Կապան քաղաքի հրաձգարանի հարակից տարածքում դի կա: Այս մասին հայտնում են ՆԳՆ ոստիկանությունից։ «Նշված վայր են մեկնել ՆԳՆ Ոստիկանության և Փրկարար ծառայության աշխատակիցներ: Պարզվել է, որ, ըստ նախնական տվյալների, 64-ամյա քաղաքացին մահացել է պայթյունի հետևանքով: Հանգամանքները պարզվում են», - նշված է հայտարարությունում։

20:44 - 20 հուլիսի, 2024

Ոստիկանության Կոտայքի բաժնում օտարերկրացին կրակել և վնասել է և՛ իրեն, և՛ 2 ոստիկանի. ՆԳՆ |arm.sputniknews.ru|

arm.sputniknews.ru: Գիշերը` 00։50–ի սահմաններում, ոստիկանության Կոտայքի բաժին է բերման ենթարկվել օտարերկրյա քաղաքացի, որը կրակոցներ է արձակել ու ու վնասվածքներ պատճառել և՛ իրեն, և՛ ոստիկանության 2 աշխատակցի։ Sputnik Արմենիային այս մասին հայտնեց ՀՀ ՆԳՆ մամուլի խոսնակ Նարեկ Սարգսյանը։ «Նախնական տեղեկություններով` քաղաքացին ոստիկանության բաժին բերման էր ենթարկվել ինքնավնասում կատարելու համար։ Նա վերցրել է ոստիկաններից մեկի ինքնաձիգը և կրակոցներ արձակել: Արդյունքում հրազենային վնասվածքներ են ստացել օտարերկրացին ու ոստիկանության 2 ծառայող»,– տեղեկացրեց Սարգսյանը: ՆԳՆ ներքին անվտանգության և հակակոռուպցիոն վարչությունում նախաձեռնվել է ծառայողական քննություն։

11:01 - 20 հուլիսի, 2024

Ոստիկանությունն ուժեղացված ծառայություններ է անցկացրել մարզերում

Հուլիսի 16-ի երեկոյան ոստիկանությունն ուժեղացված ծառայություն է անցկացրել հանրապետության տարբեր մարզերում: Մասնակցել են ոստիկանության մարզային վարչությունների ու ենթակա ստորաբաժանումների, պարեկային ծառայությունների, նաև Քրեական ոստիկանության գլխավոր վարչության աշխատակիցներ: Արմավիրի մարզում արձանագրվել է թմրամիջոցի հայտնաբերման՝ երեք և օդաճնշիչ ատրճանակի հայտնաբերման մեկ դեպք: Կոտայքի մարզում արձանագրվել է թմրանյութի հայտնաբերման հինգ դեպք, առգրավվել է մոտ 45 գրամ մարիխուանայի նմանվող զանգված: Արարատի մարզում կազմվել է ճանապարհային երթևեկության կանոնների խախտման 18 արձանագրություն: Երկու դեպքով հայտնաբերվել է մարիխուանայի նմանվող զանգված, մեկ դեպքով` կաթուցիչ և ծալովի դանակ, մեկ դեպքով էլ` գազային ատրճանակ: Արագածոտնի մարզում կազմվել է ճանապարհային երթևեկության կանոնների խախտման 13 արձանագրություն: Արձանագրվել է թմրանյութի հայտնաբերման մեկ դեպք, կազմվել է ոստիկանության ծառայողի օրինական պահանջը չկատարելու վերաբերյալ մեկ արձանագրություն, մեկ տրանսպորտային միջոց տեղափոխվել է ոստիկանության Աշտարակի բաժնի պահպանվող հատուկ տարածք: Միջոցառումները կրում են պարբերական բնույթ:

20:08 - 17 հուլիսի, 2024

Ջրային պարեկները սկուտերի ոչ սթափ վարորդի նկատմամբ կազմել են վարչական իրավախախտման վերաբերյալ արձանագրություն

Ոստիկանությունը հայտնում է, որ հուլիսի 1-ից Ջրային պարեկային ծառայությունը Սևանա լճում և առափնյա գոտիներում անցել է ուժեղացված ծառայության։ Նպատակը քաղաքացիների անվտանգ հանգիստն ապահովելն ու հասարակական կարգի պահպանումն է։ «Ամենօրյա ուժեղացված ծառայության ընթացքում պարեկներն անընդմեջ իրազեկում են քաղաքացիներին լողամիջոցների անվտանգ շահագործման կանոնների մասին և հորդորում՝ խստագույնս պահպանել դրանք։ Կանոնների խախտման առաջին դեպքն արձանագրվել է հուլիսի 14-ին։ Պարեկային ծառայության Գեղարքունիքի մարզի գումարտակի ջրային պարեկները ժամը 15.30-ի սահմաններում Սևանա լճում նկատել են մի սկուտեր, որի վարորդը և ուղևորը դրսևորել են կասկածելի վարքագիծ։ Սկուտերը կանգնեցվել է, ստուգվել է վարորդի սթափության աստիճանը։ Պարզվել է՝ ոչ սթափ վիճակում է։ Նրա նկատմամբ կազմվել է վարչական իրավախախտման վերաբերյալ արձանագրություն»,- ասված է հաղորդագրության մեջ։

17:39 - 15 հուլիսի, 2024

ՀՀ-ում ձերբակալել են հետախուզվող ՌԴ քաղաքացու, ապա ազատ արձակել՝ ՀՀ-ից հեռանալու արգելանքով․ նա մեղադրվում է Բուչայի դեպքերի մասին բարձրաձայնելու համար |factor.am|

factor.am: Հայաստանում հուլիսի 13-ին ձերբակալվել է Ռուսաստանի իրավապահ մարմիների կողմից հետախուզման մեջ գտնվող ՌԴ քաղաքացի Նատալյա Տ.-ն: Այս մասին Factor.am-ին հայտնում են ՆԳՆ նախարարությունից։ Գերատեսչության փոխանցմամբ՝ ձերբակալությունն իրականացվել է հուլիսի 13-ին, ժամը 6.30-ին, Երևան-Տիվատ չվերթի ինքնաթիռի ժամանումից հետո։ Նատալյա Տ.-ն, ըստ ՀՀ ՆԳՆ-ի, հուլիսի 1-ից ՌԴ Մոսկվայի մարզի իրավապահ մարմինների կողմից հետախուզվում էր ՌԴ քրեական օրենսգրքի 207.3-րդ հոդվածի 2-րդ մասի (Ակնհայտ սուտ տեղեկատվության տարածումը) մեղադրանքով: Meduza-ի փոխանցմամբ՝ Նատալյա Տ.-ն 65 տարեկան է, ռուսաց լեզվի և գրականության ուսուցչուհի է։ Ըստ աղբյուրի քրեական հետապնդման պատճառ է դարձել այն, որ ուսուցչուհին «Բարության դաս» դասաժամի ընթացքում դպրոցականներին պատմել է Բուչայում ռուսական բանակի հանցագործությունների մասին, մի քանի տեսանյութ ցուցադրել ուկրաինական լրատվամիջոցներից և Ռուսաստանի ներխուժումն Ուկրաինա անվանել միջազգային իրավունքի խախտում։ Դասն անցկացվել է 2022 թվականին։ Հայաստանի իրավապահները ռուս ուսուցչուհուն մի քանի ժամ բաժնում պահելուց հետո բաց են թողել՝ Հայաստանից չհեռանալու պահանջով, խափանման միջոց է ընտրվել երկրից չբացակայելու մասին ստորագրությունը։ ՆԳՆ-ն փոխանցում է, որ ՌԴ քաղաքացուն հայտնաբերելու մասին հայտնվել է ՌԴ իրավապահներին։ Շարունակությունը՝ սկզբնաղբյուր կայքում

14:56 - 15 հուլիսի, 2024

Քաղաքացին Եղեգնուտի անտառում հատել էր 6 կանգուն ծառ

Ոստիկանության Գուգարքի բաժնի ԱԳ և ԸԲԿ ծառայողներն ու Շրջակա միջավայրի նախարարության Վանաձորի մասնաճյուղի աշխատակիցները հուլիսի 12-ին համատեղ միջոցառումների ընթացքում Եղեգնուտ գյուղի վարչական տարածքի անտառում ստուգման են ենթարկել «ԳԱԶ-66» մակնիշի մի մեքենա, որը բեռնված էր 4-5 խմ փայտանյութով: Եղեգնուտ գյուղի բնակիչ 38-ամյա վարորդը փայտանյութի վերաբերյալ համապատասխան փաստաթուղթ չի ներկայացրել։ Հայտնել է, որ փայտանյութը պատկանում է իրեն, գյուղի հարակից անտառից բենզասղոցով հատել է տարբեր տեսակի և տրամաչափի կանգուն վեց ծառ։ Փայտանյութով բեռնված «ԳԱԶ-66»-ը տեղափոխվել է ՇՄՆ Վանաձորի մասնաճյուղի հատուկ պահպանվող տարածք: Կազմված փաստաթղթերը ներկայացվել են Լոռու մարզի քննչական վարչություն:

11:58 - 15 հուլիսի, 2024

Ուժեղացված ծառայության ընթացքում տարբեր իրավախախտումների և պարզաբանումների համար բաժին է տեղափոխվել 26 անձ․ ՆԳՆ ոստիկանություն

Հուլիսի 11-ի երեկոյան, մինչ կեսգիշեր, Երևանի կենտրոնում` ոստիկանության Կենտրոնական բաժնի սպասարկման տարածքում, իրականացվեց ուժեղացված ծառայություն: Այս մասին հայտնում են ՆԳՆ ոստիկանությունից․«Միջոցառմանը ներգրավված էր 170 ոստիկան, կազմվել էր շարժական 35 խումբ:Ուժեղացված ծառայության ընթացքում ստուգվել է 350 տրանսպորտային միջոց, տարբեր իրավախախտումների և պարզաբանումների համար բաժին է տեղափոխվել 26 անձ:Արձանագրվել է թմրամիջոցի հայտնաբերման 7 դեպք, հայտնաբերվել է գողության մեղադրանքով մեկ հետախուզվող, 5 սառը զենք և երկու գազային ատրճանակ: Մեկ անձի մոտ հայտնաբերվել է վարորդական իրավունքի կեղծ վկայական:Նման ուժեղացված ծառայություններ կազմակերպվում են պարբերաբար», - նշված է ոստիկանության հայտարարությունում։

19:19 - 13 հուլիսի, 2024