Եթե 10 րոպեն մեկ ինտենսիվ ծեծ է եղել, պիտի լինեն արձանագրումներ դատաբժիշկի կողմից. ՆԳ նախարարը՝ արցախցու դեպքի մասին
|news.am|
news.am: Ես այս թեմային անդրադարձա եւ իմ խոսքում չկար որևէ հերքում կամ հաստատում, ես նշեցի, որ ցանկացած հանցագործության մասին ահազանգ պիտի ենթարկվի օբյեկտիվ քննության և կոնկրետ արձագանք լինի, կհաստատվի կամ կհերքվի տվյալ վարույթի շրջանակներում, դրանից հետո կանդրադառնանք կոնկրետ գնահատականներին։ Այս մասին այսօր՝ մարտի 21-ին, ԱԺ-ում լրագրևողների հետ զրույցում նշեց ՆԳ նախարար Արփինե Սարգսյանը՝ անդրադառնալով ոստիկանների կողմից արցախցի Տիգրան Ուլիբաբյանի խոշտանգման դեպքին:
«Իհարկե հասկանում եմ խոշտանգման առումով հարցի ավելի մտահոգիչ լինելը, ավելի զգայուն լինելը, բայց պատկերացրեք, օրինակ, որ ձեզ մեղադրում են պայմանականորեն որևէ անձի նկատմամբ բռնություն գործադրելու մեջ և միանգամից առանց քննության ֆիքսում ենք, որ դուք եք մեղավորը: Դուք կհանդուրժեի՞ք նման պրոցեսը: Քննությունը կտա բոլոր հարցերի պատասխանները և ես չեմ հավակնում մտածելու, որ բոլորը սուտ է կամ բոլորը կեղծ է, որովհետև այս պահին նման պնդում անել որևէ մեկը իրավասություն չունի»,-ասաց նա:
Դիտարկմանը, որ Տիգրանի փաստաբանն ասում է, որ նախ փորձաքննություն իրականացվել է դեպքից մի քանի օր հետո, բացի այդ, հիվանդանոցում արդեն իսկ տղայի վրա արձանագրվել են մարմնական վնասվածքները, դուք ինչո՞ւ եք հակված հավատալ չորս օր հետո արված փորձաքննությանը, այլ ոչ թե դեպքից անմիջապես հետո հիվանդանոցի տված եզրակացությանը, նախարարը պատասխանեց. «Ես ոչ մի բանի հակված չեմ հավատալու, որովհետև սրանք հարցեր են, որոնք անաչառ դիտորդի մոտ պիտի առաջանան, եթե անաչառ դիտորդը ցանկություն ունի օբյեկտիվ պատկերը հասկանալու։ Հիմա, եթե կար արձագանք, որ 10 րոպեն մեկ ինտենսիվ ծեծ է եղել, անաչառ դիտորդի մոտ պիտի տպավորություն ստեղծի, որ պիտի լինեն այլ արձանագրումներ թե՛ հիվանդանոցում, թե՛ դատաբժիշկի կողմից։
Իմ նշած հանգամանքը միայն այն է, որ ես, որպես այս պահին արդեն իսկ անաչառ դիտորդ, քրեական վարույթի աչքերով, այդ հարցերը առնվազն քննարկման առարկա եմ դարձնում ինքս ինձ համար, որպեսզի հասկանամ, թե հետագայում արդեն քննության արդյունքներով ինչպիսի ընթացք պիտի լինի։
Կարծում եմ, որ նույն այդ հանգամանքները, նույն այդ հարցադրումները վստահ պաշտպանական կողմը կդարձնի քննարկման առարկա կոնկրետ վարույթի շրջանակներում։ Կարիք կլինի կրկնակի փորձաքննության, կրկնակի փորձաքննություն կնշանակվի:
Քննչական կոմիտեն պիտի նաև հարցաքննի ոստիկաններին, կրկին տուժողին, կարիք լինի առերեսում իրականացնելու: Առանց այդ դատավարական գործողությունների գնահատական տալը կլինի միակողմանի: Այսինքն, եթե ես հակված եմ մտածելու, որ կա խոշտանգում, ավտոմատ կերպով ես այդ ուղղությամբ եմ մտածելու և իմ բոլոր մտքերը այդ ուղղությամբ պիտի դասավորեմ, բայց ես ՆԳ նախարարն եմ և կարիք ունեմ օբյեկտիվորեն իրավիճակը հասկանալու, որը մի կողմից կպաշտպանի մեր քաղաքացուն, ով ցանկացած պրոցեսի շրջանակներում կարող է ոստիկանի ոչ իրավաչափ ներգործության ենթարկվել, մյուս կողմից, եթե չկա այդպիսի ներգործություն, բայց կա կեղծ մեղադրանք, պաշտպանելու այն ոստիկանության ծառայողին, որը չի կատարել որևէ ներգործություն: Նորից եմ շեշտում, ես այս պահի դրությամբ այդ դեպքի մասով որևէ գնահատական տալ չեմ կարող: Համարեք բարձրաձայն մտածել եմ, որովհետև ինձ մոտ այդ հարցադրումները առաջացել էին, մնացյալը քննությունը պիտի տա»,- հայտարարեց Արփինե Սարգսյանը:
16:34 - 21 մարտի, 2025
