Ղրղզստան

Բիշքեկում վաղը տեղի կունենա Թյուրքական պետությունների կազմակերպության 11-րդ գագաթնաժողովը |1lurer.am|

1lurer.am: Նոյեմբերի 6-ին Ղրղզստանի մայրաքաղաք Բիշքեկում տեղի կունենա Թյուրքական պետությունների կազմակերպության 11-րդ գագաթնաժողովը: Միջոցառման գլխավոր թեման հետևյալն է. «Թյուրքական աշխարհի հզորացում. տնտեսական ինտեգրում, կայուն զարգացում, թվային ապագա և անվտանգություն բոլորի համար»։ Ղրղզստանի նախագահի աշխատակազմից հայտնել են, որ գագաթնաժողովին կմասնակցեն կազմակերպության անդամ երկրների ղեկավարները, ինչպես նաև դիտորդ պետությունների ներկայացուցիչները: Այսօր արդեն պետական այցով Ղրղզստան է մեկնել Թուրքիայի նախագահ Ռեջեփ Էրդողանը: Ելույթ ունենալով Ղրղզստանի նախագահ Սադիր Ժապարովի հետ համատեղ մամուլի ասուլիսում՝ Թուրքիայի ղեկավարը թյուրքական աշխարհին կոչ է արել վճռական դիրքորոշում որդեգրել Գազայի հատվածում հումանիտար ողբերգության ֆոնին: Էրդողանը կմասնակցի նաև Թուրքիա-Ղրղզստան բարձր մակարդակի ռազմավարական համագործակցության խորհրդի 6-րդ նիստին: Ղրղզստան է մեկնել նաև Ադրբեջանի նախագահ Իլհամ Ալիևը:

18:41 - 05 նոյեմբերի, 2024

Բիշքեկում քննարկվել են տրանսպորտի ոլորտում Հայաստանի և Ղրղզստանի միջև համագործակցության հեռանկարները

2024թ․ հոկտեմբերի 29-ին Բիշքեկում կայացել է Ղրղզստանում համատեղության կարգով (նստավայրը՝ Աստանա) Հայաստանի դեսպան Արմեն Ղևոնդյանի հանդիպումը Ղրղզստանի տրանսպորտի և կոմունիկացիաների նախարար Աբսատտար Սիրգաբաևի հետ։ Քննարկվել է Հայաստանի ու Ղրղզստանի միջև տրանսպորտի ոլորտում փոխգործակցության զարգացման՝ երկու երկրների միջև փոխադարձ ապրանքաշրջանառության ծավալի աճի և տարանցիկ ներուժի ավելացման շեշտադրմամբ, դիտարկվել է նոր փոխշահավետ, այդ թվում՝ մուլտիմոդալ տրանսպորտային կապուղիների վերհանմանը միտված քայլերի և գործողությունների հերթականությունը։

10:19 - 01 նոյեմբերի, 2024

Դիտարկվել է Հայաստանի և Ղրղզստանի մայրաքաղաքների մակարդակով փոխգործակցության հեռանկարը

2024թ․ հոկտեմբերի 28-ին Ղրղզստանում աշխատանքային այցելությամբ գտնվող Ղրղզական Հանրապետությունում Հայաստանի Հանրապետության արտակարգ և լիազոր դեսպան Արմեն Ղևոնդյանը (նստավայրը՝ Աստանա) հանդիպել է Բիշքեկի քաղաքապետ Այբեկ Ջունուշալիևի հետ։ Այս մասին տեղեկացնում են Ղրղզստանում ՀՀ դեսպանությունից: Հայ-ղրղզական ապակենտրոնացված համագործակցության ընդլայնման համատեքստում հանդիպմանը հանգամանալից դիտարկվել է Հայաստանի և Ղրղզստանի մայրաքաղաքների մակարդակով փոխգործակցության հեռանկարը՝ վերջինիս իրավական ամրագրման շեշտադրմամբ։ «Երկուստեք ընդգծվել է ջանքերի պահանջվածությունը՝ միտված առաջարկությունների մշակման, որոնք կարող են լրացուցիչ հնարավորություններ ընձեռել փոխշահավետ առևտրատնտեսական նախագծերի, ինչպես նաև մշակութային-հումանիտար ոլորտում փոխադարձ հետաքրքրություն իրականացնող նախաձեռնությունների իրականացման համար։ Ձեռք է բերվել համաձայնություն Երևանի և Բիշքեկի համագործակցության ներուժի գործնական իրագործմանը միտված հետագա քայլերի մասով»,- ասված է հաղորդագրության մեջ։

16:34 - 30 հոկտեմբերի, 2024

Բիշքեկում մեկնարկել է ԱՊՀ անդամ պետությունների անվտանգության և հատուկ ծառայությունների ղեկավարների խորհրդի 54-րդ նիստը |factor.am|

factor.am: Այսօր Բիշքեկի Ալա-Արչա պետական նստավայրում մեկնարկել է ԱՊՀ անդամ պետությունների անվտանգության և հատուկ ծառայությունների ղեկավարների խորհրդի 54-րդ նիստը։ Ղրղզստանի նախագահ Սադիր Ջապարովը կհանդիպի նիստի մասնակիցների հետ, փոխանցում է ղրղզական Akipress-ը։ Երկրի ԱԴԾ կայքում հրապարակված հաղորդագրության համաձայն՝ ակնկալվում է, որ հանդիպման ընթացքում կքննարկվեն Համագործակցության երկրների անվտանգությանը սպառնացող վտանգների գնահատման ընդհանուր մոտեցումների մշակումը և դրանց չեզոքացման համար հետախուզական ծառայությունների միջև փոխգործակցության արդյունավետությունը: Հայաստանից նիստին մասնակցում է ՀՀ ԱԱԾ տնօրենի տեղակալ Սամվել Հայրապետյանը։ Ադրբեջանը ներկայացնում է Ադրբեջանի ԱԱԾ պետԱլի Նագիևը։

11:35 - 24 մայիսի, 2024

Պակիստանը բողոք է հայտնել Ղրղզստանին Բիշքեկի անկարգություններից հետո |news.am|

news.am: Պակիստանի արտաքին գործերի նախարարությունը շաբաթ օրը հայտնել է, որ բողոքի նոտա է հանձնել երկրում Ղրղզստանի բարձրագույն դիվանագետին՝ ի պատասխան պակիստանցի ուսանողների նկատմամբ կիրառված բռնության, տեղեկացրել է Reuters-ը։ «Ղրղզստանի գործերի հավատարմատարին կարծիք է հայտնվել, որ Ղրղզստանի կառավարությունը պետք է բոլոր հնարավոր միջոցները ձեռնարկի պակիստանցի ուսանողների եւ քաղաքացիների անվտանգությունն ապահովելու համար»,- նշվել է Պակիստանի ԱԳՆ հայտարարությունում։ Հայտարարությունում ասվում է, որ Ղրղզստանի առողջապահության նախարարությունը հաստատել է, որ չորս պակիստանցու ցուցաբերվել է առաջին օգնություն, նրանք դուրս են գրվել, իսկ մեկը դեռեւս բուժման մեջ է գտնվում։ Պակիստանը հայտնել է, որ շտապ օգնության թեժ գծեր է բացել նրանց համար, ովքեր տուժել են բռնությունից։ Շարունակությունը` սկզբնաղբյուր կայքում։

15:30 - 18 մայիսի, 2024

Տասնյակ վիրավորներ՝ գիշերը Բիշքեկում տեղի ունեցած բախումների հետևանքով |azatutyun.am|

azatutyun.am: Ղրղըզստանի կառավարությունը հայտնում է, որ մայիսի լույս 18-ի գիշերը Բիշքեկում տեղի ունեցած բախումների հետևանքով 28 մարդ է տուժել, այդ թվում՝ երեք օտարերկրացի։ Պակիստանի դեսպանությունն իր հերթին հաղորդում է, որ միջադեպի հետևանքով Պակիստանի 14 քաղաքացի է վիրավորվել՝ հերքելով երեք պակիստանցիների սպանության մասին տեղեկությունները: Ավելի վաղ պակիստանյան որոշ լրատվամիջոցներ հայտնել էին, որ գիշերը Բիշքեկում տեղի ունեցած բախումների հետևանքով հնարավոր է պակիստանցիներ են սպանվել։Մայիսի 17-ի լույս 18-ի գիշերը հարյուրավոր մարդիկ էին հավաքվել Բիշքեկի Կուրմանժան Դատկա փողոցում գտնվող օտարերկրացիների հանրակացարանի մոտ՝ բարձրացնելով Ղրղըզստան եկող օտարերկրացիների հարցը։ Ներքին գործերի նախարարությունը նշել էր, որ լուսադեմին հավաքվածները ցրվել են, իրավիճակը փողոցներում կայուն է։Շարունակությունը՝ սկզբնաղբյուր կայքում։

10:42 - 18 մայիսի, 2024

Ղրղզստանն իր թեկնածությունն է առաջադրել է 2027-28 թթ. ՄԱԿ-ի Անվտանգության խորհրդի ոչ մշտական անդամի համար |armenpress.am|

armenpress.am: Ղրղզստանի նախագահ Սադիր Ժապարովը ՄԱԿ-ի գլխավոր քարտուղարի տեղակալ, համաշխարհային կազմակերպության Հակաահաբեկչական վարչության ղեկավար Վլադիմիր Վորոնկովի հետ կայացած հանդիպմանը հայտնել է 2027-2028 թվականներին ՄԱԿ-ի Անվտանգության խորհրդի (ԱԽ) ոչ մշտական անդամների կազմում հանրապետության թեկնածության առաջադրման մասին։ Այս մասին հաղորդել է Ղրղզստանի նախագահի մամուլի ծառայությունը։ «Զրույցի ընթացքում նախագահը հայտնել է 2027-2028 թվականներին ՄԱԿ-ի Անվտանգության խորհրդի ոչ մշտական անդամի համար Ղրղզստանի թեկնածության առաջադրման մասին: Ընտրությունները տեղի կունենան ՄԱԿ-ի Գլխավոր ասամբլեայի 80-րդ նստաշրջանի ընթացքում՝ 2026 թվականի հունիսին», - ասված է հաղորդագրության մեջ։ Նախագահի խոսքով՝ Ղրղզստանը «համակողմանիորեն հանձնառու է» ՄԱԿ-ի կանոնադրության նպատակներին և ձգտում է իր ուժերի ներածին չափով ներդրում ունենալ «ամբողջ աշխարհում խաղաղության, գլոբալ անվտանգության, կայուն զարգացման և սոցիալական առաջընթացի ապահովման» ընդհանուր գործում։ Ժապարովը նաև հիշեցրել է, որ 2023 թվականին ՄԱԿ-ի աջակցությամբ երկրում ընդունվել է 2023-2027 թվականներին ծայրահեղականության և ահաբեկչության դեմ պայքարի պետական ծրագիր։ «Նախագահը նշել է, որ տարածաշրջանային մակարդակով Ղրղզստանը հաջողությամբ համագործակցում է ՄԱԿ-ի և Կենտրոնական Ասիայի երկրների հետ՝ ծայրահեղականության կանխման և ահաբեկչությանը հակազդման, ինչպես նաև դրանց հետ կապված անդրսահմանային հանցավորության այլ տեսակների դեմ համատեղ գործողությունների ծրագրի իրականացման շրջանակներում, ներառյալ՝ թմրավաճառությունը, փողերի լվացումը և ահաբեկչության ֆինանսավորումը», - նշված է հաղորդագրության մեջ։ Նախագահը նաև ընդգծել է, որ հանրապետությունը վճռականորեն դատապարտում է ահաբեկչությունն իր բոլոր դրսևորումներով և ակտիվ մասնակցություն է ունենում ՄԱԿ-ի Գլոբալ հակաահաբեկչական ռազմավարության իրականացման գործում, որը «հաստատուն հիմք է ապահովում միջազգային ահաբեկչությանն արդյունավետ հակազդման համար»:

17:38 - 17 մայիսի, 2024

Ղրղզստանի սահմանապահների և Տաջիկստանի բնակիչների միջև փոխհրաձգություն է տեղի ունեցել |armenpress.am|

armenpress.am: Ղրղզա-տաջիկական սահմանին փոխհրաձգություն է տեղի ունեցել Տաջիկստանի բնակիչների և Ղրղզստանի սահմանապահների միջև։ Այս մասին հայտնել է Ղրղզստանի ազգային անվտանգության պետական կոմիտեի սահմանային ծառայություն։ «2024 թվականի մայիսի 7-ին պետական սահմանի Ղրղզստան-Տաջիկական հատվածում հրազենի գործադրման հետ կապված միջադեպ է տեղի ունեցել։ Բատկենի շրջանի Լեյլեքի շրջանի Ակ-Բոսոգո գյուղի մոտ (Ղրղզստան), Ղրղզստանի սահմանապահը նկատել է Տաջիկստանի քաղաքացիների՝ հովիվների, որոնք արածեցնելիս են եղել իրենց անասունները Ղրղզստանի տարածքում՝ պետական սահմանային գծից 250-300 մ հեռավորության վրա»,- նշվում է հաղորդագրության մեջ։ Նշվում է, որ Տաջիկստանի քաղաքացիներն անտեսել են սահմանապահների՝ Ղրղզստանի տարածքը լքելու պահանջը, ավելին՝ սկսել են քարեր նետել զինվորականների ուղղությամբ։ «Հովիվներից մեկը 2-3 կրակոց է արձակել Ղրղզստանի սահմանապահի ուղղությամբ։ Իրավիճակի սրումը կանխելու համար Ղրղզստանի Հանրապետության սահմանապահները նախազգուշական կրակոցներ են արձակել օդ, որից հետո հովիվները փախել են դեպի Տաջիկստանի տարածք»,- ասվում է տարածված հաղորդագրության մեջ։ Նախնական տեղեկություններով՝ միջադեպի ժամանակ ոտքից վիրավորվել է Տաջիկստանի քաղաքացիներից մեկը։ «Սակայն ի՞նչ հանգամանքներում, ե՞րբ և որտե՞ղ է ստացվել վնասվածքը, անհայտ է, քանի որ Տաջիկստանի իրավապահները տրամադրել են միայն լուսանկար», - նշվում է հաղորդագրության մեջ։ Հաղորդվում է, որ առաջիկայում տեղի կունենա կողմերի սահմանային ներկայացուցիչների հանդիպումը։ «Ներկայումս իրավիճակը ղրղզ-տաջիկական հատվածում գնահատվում է կայուն»,- նշել են սահմանապահ ծառայությունում։

18:35 - 07 մայիսի, 2024

Ղրղզստանի և Տաջիկստանի սահմանին երկրաշարժ է տեղի ունեցել |shantnews.am|

shantnews.am: Ղրղզստանի և Տաջիկստանի սահմանին չորեքշաբթի 4 բալ ուժգնությամբ երկրաշարժ է տեղի ունեցել, հայտնում է Ղրղզստանի սեյսմոլոգիայի ինստիտուտը։ Ինստիտուտի տվյալներով՝ 4 բալ ուժգնությամբ ստորգետնյա ցնցումներ են գրանցվել 7.37-ին՝ Ղրղզստանի Կարամիկ գյուղից 18 կմ հարավ-արևմուտք և Բատկեն քաղաքից 105 կմ հեռավորության վրա: Եվս մեկ երկրաշարժ, ինչպես հայտնում է ինստիտուտը, տեղի է ունեցել Ղրղզստանում ժամը 12.02-ին՝ 3,8 մագնիտուդով։ Ստորգետնյա ցնցումների օջախը գտնվել է Տրանս-Ալայ լեռնաշղթայի լեռներում՝ Բոր-Դեբե գյուղից 9 կիլոմետր հարավ-արևելք։ Բնակավայրում ցնցումների ուժգնությունը կազմել է մոտավորապես 3 բալ։

15:43 - 01 մայիսի, 2024

Ղրղզստանում ևս դադարեցնում են «Միր» քարտերի սպասարկումը |hetq.am|

hetq.am: Ռուսական «Միր» վճարային համակարգի քարտերն ապրիլի 5-ից կդադարեն գործել Ղրղզստանում։ Այդ մասին հայտնում է РБК-ն՝ հղում անելով Ղրղզստանի ազգային «Էլքարտ» վճարային համակարգի օպերատորի տարածած հայտարարությանը։ Հայտարարության մեջ ասվում է, որ ընկերությունը «երկրորդային պատժամիջոցների ռիսկը նվազագույնի հասցնելու համար» դադարեցնում է «Միր» բանկային քարտերի սպասարկումն այն պատճառով, որ ԱՄՆ-ն արգելափակող պատժամիջոցներ է սահմանել Ռուսաստանի վճարային քարտերի ազգային համակարգի (NSPK) և «Միր» օպերատորի նկատմամբ: Ղրղզստանում «Միր» ծառայության դադարեցումից հետո «Էլքարտ» համակարգի քարտերը կդադարեն գործել արդեն Ռուսաստանում: «Միր» քարտերը Ղրղզստանում գործում էին 2019 թվականից սկսած՝ երկու վճարային համակարգերի՝ ռուսական «Միր»-ի և ղրղզական «Էլքարտ»-ի ինտեգրման շրջանակներում (այս համակարգին մասնակցում է 21 բանկ): Ղրղզստանի շատ բանկեր (23 ընկերություններից 10-ը) 2022 թվականի հոկտեմբերին դադարեցրել էին «Միր» քարտերի սպասարկումը, երբ ԱՄՆ ֆինանսների նախարարությունը սպառնաց պատժամիջոցներ սահմանել օտարերկրյա այն ընկերությունների նկատմամբ, որոնք Ռուսաստանի սահմաններից դուրս սպասարկում էին «Միր» քարտերը։ ԱՄՆ-ն 2024 թվականի փետրվարին արգելափակող պատժամիջոցներ սահմանեց «Միր» վճարային քարտերի օպերատորի նկատմամբ։ Այդ ժամանակ «Միր» քարտերը սպասարկվում էին Ղազախստանի, Բելառուսի, Վենեսուելայի, Վիետնամի, Ղրղզստանի, Տաջիկստանի, Կուբայի, մասամբ ճանաչված Աբխազիայի և Հարավային Օսիայի որոշ բանկերի կողմից։ Պատժամիջոցների սահմանումից հետո «Միր» քարտերը դադարեցին սպասարկել ղազախական Bereke Bank-ը և Halyk Bank-ը։ Մարտի 30-ից սկսած «Միր» քարտերի սպասարկումը դադարեցրին նաև Հայաստանի գրեթե բոլոր բանկերը, բացի «ՎՏԲ Հայաստան» բանկից։

12:12 - 03 ապրիլի, 2024

Ղրղզստանում ձերբակալվել է Ադրբեջանի հինգ քաղաքացի, որոնք մահափորձ են ծրագրել երկրի ղեկավարության դեմ |1lurer.am|

1lurer.am: Ղրղզստանում ձերբակալվել է անդրազգային հանցավոր խմբավորման հինգ անդամ, որոնք մահափորձ էին ծրագրել երկրի ղեկավարության դեմ` հայտնել են այդ երկրի ազգային անվտանգության պետական կոմիտեից: Նշվում է, որ բոլորը Ադրբեջանի քաղաքացի են։ Հատուկ ծառայության տվյալներով՝ ձերբակալվածներից մեկը քրեական աշխարհում այսպես կոչված «թափառաշրջիկի» կարգավիճակ ունի։ «Նրանց հանցավոր ծրագրերը սկիզբ են առել Ղրղզստանում կազմակերպված հանցավոր խմբավորման դեմ պայքարի ֆոնին։ Դա հարուցել է արտասահմանյան քրեական առաջնորդների դժգոհությունը»,- հայտնել են Ղրղզստանի ազգային անվտանգության պետական կոմիտեից։

16:07 - 23 մարտի, 2024

Խոշոր վթար՝ Բիշքեկի ՋԷԿ-ում. շրջանառվում է դիվերսիայի վարկածը |tert.am|

tert.am: Բիշքեկի ՋԷԿ-ում տեղի է ունեցել խոշոր վթար, ինչի հետևանքով Ղրղզստանի մայրաքաղաքում 2,493 բազմաբնակարան շենք մնացել է առանց ջեռուցման և տաք ջրի։ Արտակարգ իրավիճակների նախարարությունը քննարկում է տեղի ունեցածի երկու վարկած, որոնցից մեկը դիվերսիա է, գրում է sputnik.kg կայքը։ Բռնկված հրդեհը մարվել է տեղի ժամանակով ժամը 05:05-ին, հայտնում է ԱԻՆ-ը։ Վթարի հետևանքով տուժել է 5 մարդ, որոնցից երկուսն ուղարկվել են ամբուլատոր բուժման։ Այրվածքներով ևս երկուսը ծանր վիճակում գտնվում են վերակենդանացման բաժանմունքում։ Մեկ հոգի գտնվում է այրվածքների բաժանմունքում, նրա վիճակը միջին ծանրության է։ Բիշքեկի բոլոր դպրոցները մինչև երկուշաբթի անցնում են առցանց ուսուցման, այսօր փակ են նաև մանկապարտեզները։ Ղրղզստանի նախագահ Սադիր Ջապարովն անձնական հսկողության տակ է վերցրել իրավիճակը Բիշքեկի ՋԷԿ-ում, ասել է պետության ղեկավարի մամուլի քարտուղար Ասկատ Ալագոզովը։ Նրա խոսքով՝ վթարից հետո նախագահին անմիջապես տեղեկացրել են տեղի ունեցածի մասին։ Նա հանձնարարել է հնարավորինս արագ վերացնել արտակարգ իրավիճակի հետևանքները։

10:13 - 02 փետրվարի, 2024

Հայաստանը Չեխիայում ու Ղրղզստանում ռազմական կցորդներ կունենա |1lurer.am|

1lurer.am: Կառավարության նիստի ընթացքում ընդունված որոշումների համաձայն՝ Հայաստանի Հանրապետությունը Չեխիայում ու Ղրղզստանում ռազմական կցորդներ կունենա։ Հայաստանի և Չեխիայի միջև ռազմական և ռազմատեխնիկական ոլորտում առկա համագործակցության մեծ ներուժը և չեխական կողմի՝ փոխգործակցությունը խորացնելու ուղղությամբ վերջին ժամանակաշրջանում ցուցաբերած մեծ հետաքրքրությամբ է պայմանավորված Չեխիայի Հանրապետությունում Հայաստանի Հանրապետության ռազմական կցորդ ունենալու անհրաժեշտությունը: Չեխիայում ռազմական կցորդի հաստիքը համատեղվելու է Գերմանիայի Դաշնային Հանրապետությունում ՀՀ դեսպանությանը կից ռազմական կցորդի կողմից: Որոշումը հնարավորություն կստեղծի ՊՆ-ի համար Չեխիայում ռազմական կցորդի միջոցով երկու երկրների պաշտպանական գերատեսչությունների արդյունավետ աշխատանքի համար, այն նոր որակ կհաղորդի ռազմական ոլորտում գործընկերային հարաբերություններին և կնպաստի բարեկակամական կապերի հետագա խորացմանը, ինչպես նաև ռազմական և ռազմատեխնիկական համագործակցության հնարավորությունների ընդլայնմանը: Նախագծի ընդունմամբ Հայաստանի Հանրապետությունը կունենա Չեխիայում հավատարմագրված ռազմական կցորդ, որը կիրականացնի պետությունների ռազմական և ռազմաքաղաքական համագործակցության համադրման և կոորդինացման աշխատանքները, կամրապնդի երկկողմ փոխգործակցության մակարդակը, ինչպես նաև կներկայացնի երկու երկրների միջև համագործակցության հեռանկարային զարգացման վերաբերյալ առաջարկություններ: Ինչ վերաբերում է Ղրղզստանին, ապա երկու երկրների միջև համագործակցությունն իրականացվում է հիմնականում ՀԱՊԿ-ի, ԵԱՏՄ-ի և ԱՊՀ-ի կազմակերպությունների շրջանակներում՝ բազմակողմ համագործակցության ձևաչափով: Սակայն երկու երկրները պաշտպանության ոլորտում, ինչպես նաև ռազմատեխնիկական բնագավառում հարաբերությունների հետագա զարգացման զգալի ներուժ և հեռանկարներ ունեն: Ռազմական կցորդի առկայությունը Ղրղզստանում կնպաստի երկու երկրների միջև պաշտպանության ոլորտում փոխգործակցության հետագա զարգացմանը, նոր թափ կհաղորդի երկու երկրների միջև պաշտպանական ոլորտում համատեղ միջոցառումների իրականացմանը: Ռազմական կցորդի առկայությունը կապահովի պաշտպանության ոլորտում հայ-ղրղզական հարաբերությունների բարձրացմանը գործընկերության ավելի բարձր մակարդակի: Ղրղզստանում ռազմական կցորդի հաստիքը համատեղվելու է Ղազախստանի Հանրապետությունում ՀՀ դեսպանությանը կից ռազմական կցորդի կողմից:

11:51 - 25 հունվարի, 2024

Չինաստանի և Ղրղզստանի սահմանին երկու ժամում 3 երկրաշարժ է տեղի ունեցել |tert.am|

tert.am: Ղրղզստանի և Չինաստանի սահմանին 2 ժամում երեք երկրաշարժ է տեղի ունեցել։ Վերջին ցնցումների ուժգնությունը կազմել է 5,8 մագնիտուդ, հայտնում է Ուզբեկստանի սեյսմոլոգիական կենտրոնը։ Առաջին երկրաշարժը 7 մագնիտուդ ուժգնությամբ է գրանցվել, երկրորդը՝ 5,7 մագնիտուդ ուժգնությամբ։ Զոհերի և ավերածությունների մասին տեղեկություններ չկան։

09:53 - 23 հունվարի, 2024

Չինաստանի և Ղրղզստանի սահմանին 7 մագնիտուդ ուժգնությամբ երկրաշարժ է գրանցվել |tert.am|

tert.am: Չինաստանի և Ղրղզստանի սահմանին 7 մագնիտուդ ուժգնությամբ երկրաշարժ է գրանցվել, հայտնում է Ուզբեկստանի արտակարգ իրավիճակների նախարարությունը։ Լուրջ ցնցումները տևել են մոտ մեկ րոպե: Զոհերի և ավերածությունների մասին տեղեկություններ չկան։ Ալմաթիի բնակիչները զանգվածաբար լքում են իրենց տները:

23:06 - 22 հունվարի, 2024

Բիշքեկում տեղի են ունեցել Ղրղըզստանի եւ Թուրքիայի արտաքին գործերի նախարարների բանակցությունները |news.am|

news.am: Բիշքեկում տեղի են ունեցել Ղրղըզստանի եւ Թուրքիայի արտաքին գործերի նախարարների՝ Ժեենբեկ Կուլուբաեւի եւ Հաքան Ֆիդանի բանակցությունները, տեղեկացրել է Yeni şafak-ը։ Բանակցությունների ընթացքում կողմերը քննարկել են ընթացիկ իրավիճակը եւ երկու պետությունների միջեւ երկկողմ ռազմավարական եւ եղբայրական հարաբերությունների հետագա ընդլայնման հեռանկարները։ Հավաստիացնելով առեւտրատնտեսական համագործակցության դինամիկայի զարգացման կարեւորությունը՝ Ղրղըզստանի եւ Թուրքիայի ԱԳ նախարարները նշել են, որ պատրաստ են համատեղ ջանքեր գործադրել երկու երկրների միջեւ ապրանքաշրջանառության մակարդակն ավելացնելու ուղղությամբ։ Այդ թվում՝ երկկողմ ղրղըզա-թուրքական ներդրումային ֆոնդի ստեղծման միջոցով։ Կողմերը նշել են նաեւ երկրների միջեւ ռազմատեխնիկական եւ ռազմապաշտպանական ոլորտներում ակտիվորեն զարգացող համագործակցությունը եւ այս ոլորտում համագործակցության հետագա ընդլայնման առկա պոտենցիալը։

12:57 - 10 հունվարի, 2024