news.am: Հայաստանի իշխանությունները խոսել են իրավահավասարության և փոխադարձության շրջանակներում ինքնիշխանության և իրավասության սկզբունքի հիման վրա տարածաշրջանային հաղորդակցությունները բացելու պատրաստակամության մասին, Ադրբեջանը, փաստորեն, չհրաժարվեց նման մոտեցումից։ Այդ մասին ամենշաբաթյա ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

«Այս թեման նախապես մանրամասն քննարկվել է եռակողմ աշխատանքային խմբի ձևաչափով, որը համանախագահում էին Ռուսաստանի Դաշնության, Հայաստանի և Ադրբեջանի փոխվարչապետները։ Ցավոք, այս աշխատանքը հիմա կանգ է առել մեր հայ գործընկերների դիրքորոշման պատճառով։ Ինչ վերաբերում է հայտարարության այն կետին, որը վերաբերում է ՌԴ ԱԴԾ սահմանապահ ծառայության վերահսկողությանը Մեղրիի երթուղու վրա, ապա դա տրամաբանական է թե՛ երթեւեկության օպտիմալ կազմակերպման, թե՛ տնտեսական տեսակետից։ Ռուս սահմանապահներն արդեն տեղակայված են Սյունիքի մարզի հարավում, նրանք պաշտպանում են Հայաստանի և Իրանի սահմանը»,- ասել է Զախարովան։

Նա նաև հայտարարեց, որ ՀՀ վարչապետ Նիկոլ Փաշինյանի առաջարկած «խաղաղության խաչմերուկ» նախագիծը այլընտրանք չէ Մեղրիին կամ այլ երթուղուն:

«Ինչ վերաբերում է ոչ տարածաշրջանային խաղացողներին, ապա Հարավային Կովկասում հաղորդակցությունների ապաշրջափակմանը օգնելու նրանց դժկամությունը բացատրվում է բացառապես քաղաքական իրավիճակի նկատառումներով:

Նրանք շահագրգռված չեն Հայաստանի և Ադրբեջանի փոխկապակցվածության մեծացմամբ միմյանց հետ, իրենց հարևանների հետ, նրանք ձգտում են կտոր-կտոր անել տարածաշրջանը, ներկայանալ այնտեղ, իրենց շահերը՝ չմտածելով ուրիշների մասին։ Դե, և այդպիսով խորացնել հակասությունները երկրների միջև»,- ասել է նա։