azatutyun.am: Բաքուն խստորեն դատապարտել է ԱՄՆ պետքարտուղար Էնթոնի Բլինքենի երեկվա հայտարարությունը՝ այն որակելով կողմնակալ։

Ադրբեջանի արտաքին գործերի նախարարության մամուլի ծառայության ղեկավար Այխան Հաջիզադեն այն համարել է «միջամտություն Ադրբեջանի դատական և իրավական գործընթացներին», որը «խեղաթյուրում է երկրում մարդու իրավունքների և ազատությունների իրավիճակը»։

«Ցավոք, Ադրբեջանի ներքին գործերին ԱՄՆ պետքարտուղարության միջամտության պատճառով վերջին 4 տարիները համարում ենք կորած ադրբեջանամերիկյան հարաբերությունների համար, որոնք հայտնի էին բարեկամությամբ և համագործակցությամբ», - հայտարարել է Հաջիզադեն՝ նշելով, թե Ադրբեջանում մարդու իրավունքների ներկա իրավիճակի վերաբերյալ «Բլինքենի երկակի ստանդարտների քաղաքականությունը կաթվածահար է արել ԱՄՆ-ի քաղաքականությունն ամբողջ Հարավային Կովկասում»։

«Մենք հուսով ենք, որ ԱՄՆ նոր վարչակազմի օրոք Ադրբեջանի և Միացյալ Նահանգների միջև բարեկամական և գործընկերային հարաբերությունները կվերականգնվեն»,- եզրափակել է ադրբեջանցի դիվանագետը։

Նախօրեին ԱՄՆ պետքարտուղարությունը հայտարարել է, որ Վաշինգտոնը խիստը մտահոգված է Ադրբեջանում քաղաքացիական հասարակության և լրատվամիջոցների նկատմամբ աճող ճնշումներով՝ հորդորելով անհապաղ ազատ արձակել մարդու իրավունքների պաշտպանությամբ զբաղվող մի շարք գործիչների և լրագրողների։