Գորիսի համայնքապետ Առուշ Առուշանյանի պատիժը խստացվել է |arm.sputniknews.ru|

arm.sputniknews.ru: Վերաքննիչ քրեական դատարանը՝ դատավոր Մնացական Հարությունյանի նախագահությամբ, որոշել է խստացնել Գորիսի համայնքապետ Առուշ Առուշանյանի պատիժը։ Վճիռը հրապարակվել է այսօր։ Քրեական դատարանի խոսնակ Լիանա Ռաֆայելյանը Sputnik Արմենիայի հետ զրույցում հայտնեց, որ դատարանը մասնակի է բավարարել ՀՀ գլխավոր դատախազության պատիժների և այլ հարկադրանքի միջոցների կիրառման նկատմամբ հսկողության վարչության պետ Լ․ Չարխիֆալակյանի և դատապարտյալ Առուշ Առուշանյանի պաշտպան Սերգեյ Մարաբյանի հատուկ վերանայման բողոքները։

Հանցանքների համակցման կանոններով՝ վերջնական պատիժ սահմանվել է 1 տարի 11 ամիս ժամկետով ազատազրկումը: Սա նշանակում է, որ ՀՀ Սյունիքի մարզի առաջին ատյանի ընդհանուր իրավասության դատարանի` 2024 թվականի սեպտեմբերի 10-ի որոշումը՝ 1 տարի 8 ամիս ժամկետով ազատազրկել Առուշանյանին, խստացվել է, ավելացվել է ևս 3 ամիս։

Դատարանի` 2024 թվականի սեպտեմբերի 10-ի որոշումը մնացած մասով մնացել է անփոփոխ:

Առուշանյանի պաշտպան Սերգեյ Մարաբյանը Sputnik Արմենիայի հետ զրույցում հայտնեց, որ պաշտպանական կողմն առայժմ գրավոր որոշումը չի ստացել, ուստի մեկնաբանել չի կարող։ Որոշումը ստանալուց հետո կքննարկվեն հետագա քայլերը։

Քրեական գործը, որի շրջանակում Առուշանյանը մեղավոր է ճանաչվել, վերաբերում է պաշտոնեական դիրքը չարաշահելուն, ինքնիրավչությանը, ինչպես նաև դիտավորությամբ այլ մարդու առողջությանը վնաս պատճառելուն։